Jobe 3 - Mukanda Wa Zambi 1970

Jobe yalinyenga ku meso ja Zambi

¹ Mba Jobe yabutuka kuhanjika, yashinga tangwa lia kusemuka chenyi:

Jobe

^2-3 Aa Zambi, Shinga tangwa lize nasemukine, Shinga nawa ufuku uze mama akile ufumba.

⁴ Zambi, tangwa lize lialumuke milima, kanda uliwuluka nawa, pangu kanda litemuka nawa ha tangwa lize.

⁵ Tangwa lize lialumune milima bwii, malelwa alifuke, tangwa libwe lilaa.

⁶ Jimuna ufuku uze ku mwaka, kanda uwalula nawa ku matangwa a mwaka, kanda ulialula nawa ku matangwa a kakweji.

⁷ Ufuku uze ukaseka, kanda akevwamo liji lia uwahililo.

⁸ Nganga akashinge kama tangwa lize, waze anyingika kuhombola luchazangombe.

⁹ Mutumbu kanda akasoloka, tangwa kanda likatwa mwalwa, kutemuka cha chichamene kanda chikatemuka.

¹⁰ Shinga ufuku uze watayijile kusemuka chami, mba ngumone lamba lino.

¹¹ Mumu yika kanguselumwine ko? Mumu yika kanguwondele ko?

¹² Mumu yika mama angukangayikile? Mumu yika angwamwishinyine?

¹³ Kachi nabombele kuluu, kachi nayile tulo a kuhwima,

¹⁴ ngwe mianangana ni akwa kuyula, waze atungulwile mazuwo jo a mawe,

¹⁵ Kachi nabombele hamwe ni ana ja mianangana waze abichile oru, waze azalishile mazuwo jo ni prata,

¹⁶ mumu kaanguswekele ko ngwe mwana wa kuselumuna, ngwe ana waze kamwene pangu.

¹⁷ Mu fuka yingulungulu keeshi kubinjisa nawa, ni akwa yikatalo kakuwana uhwimino.

¹⁸ Chibwe funge kaakubwa ni uhwimino, keeshi kwivwa nawa liji lia tufunga.

¹⁹ Kwenako anene ni akepe ali hamuwika, ndungo haantusuka kuli akako.

²⁰ Mumu yika kuhana pangu kuli yoze unanenganyana? Ni mwono kuli yoze uli ni chimbangwinya mu mbunge?

²¹ Kakuzanga kufwa alioze kuchichi kwiza, kakuchifupa ngwe ubite.

²² Kakuwahilila kuhiana ahete ku fuka.

²³ Mumu yika kuhana ndeya kuli yoze kanyingikine jila, yoze Zambi hamuseleka?

²⁴ Chishi kulia, shina kunenganyana, Chishi kuhasa kulitwamina kutwa mikuma.

²⁵ Chuma chize nakuvwila woma che nakuzanga. Chuma chize chakungukolesa mwongo che chakungulundumukina.

²⁶ Chishi kuhwima nihakepe, chishi kuhola; chahashile kwoloka, shina lamba wika.