Jobe 23 - Mukanda Wa Zambi 1970

Jobe

^1-2 Ndoo ni musono nakulinyenga kuli Zambi, kwoko lienyi linaleme hali yami.

³ Nyi nanyingika kuze munguhasa kumuwana ni mana akuheta ko kama.

⁴ Kachi te mungumulumbunwina yikuma yami, munguyilumbununa yeswe kanawa.

⁵ Te kachi mungunyingika chize mamba, ni chize mangukumbulula.

⁶ Kuma, Zambi te malimika ni yami ni ndundo jenyi jeswe, nyi? Ka, kamungwivwa chize mungwamba.

⁷ Kwenako yami, mukwa ululi, munguhasa kumulumbunwina mulonga wami. Neye makangusambisa pundu.

⁸ Ngunakafupa Zambi ku chivumbuko, alioze keshiko, ngunakamufupa ku chitokelo, alioze Chamumwene ko.

⁹ Muze te analingi milimo ku norde, chamumwene. Muze te anendangana ku sude, hindu Chamumwene.

¹⁰ Chibwe chocho, Zambi kananyingika jila yize ngunende; muze mangweseka mangumona ngwenyi, nguli ni mbunge yibema ngwe oru.

¹¹ Nakukaula kanawa jila yize akungusongwela, chapiasukile nihakepe.

¹² Nakufunga kanawa Shimbi jenyi, nakusweka maliji jenyi ngwe ubite Ubema mu mbunge yami.

¹³ Zambi keshi kwalumuka, mba iya mahasa kuhamika nenyi, hanji kumukinda chize anambe kulinga?

¹⁴ Kumamanununa yeswe yize hanalulika hali yami; kali nawa ni manyonga anji akwo.

¹⁵ Ngunachikima ni woma ku meso jenyi.

¹⁶ Zambi halezumwisa mbunge yami; Mukwa Ndundo Jeswe hanguvwisa mwongo.

¹⁷ Hi milima ko yinangwehe woma, chibwe hiyangufuka ku meso.