Jobe 22 - Mukanda Wa Zambi 1970

Pande ja muchitatu Elifaze

^1-2 Kukuli mutu, chibwe mukwa mana kuhiana, yoze mahasa kufumbula kuli Zambi, nyi?

³ Yitanga ye ya ululi yakukwasa Zambi, nyi? wuli we muukolesa Zambi, nyi?

⁴ Nyi Zambi kanakufumbu ni kukweseka, hi mumu wakumuvwila woma ko.

⁵ Ka. Mumu uli Chivulumunyi, mumu hiwavulumuna kuhiana.

⁶ Hiunatambula yifungo kuli akwenu mokomoko; hiunatambula mahina kuli atu niwahichika uselesele.

⁷ Akwa kuhonga kuwahele ko meya, akwa zala kuwahele ko yakulia.

⁸ Ku tachi je ni lufuma we, hiunatambula chifuchi cheswe.

⁹ Hiunalitunu kukwasa twamishi waze haanafwisa malunga jo, hiunatambula yuma ya ana a shiwa, hiunaamwesa lamba.

¹⁰ Kashika makambwila anakujingilika, ni susumuku Unevu woma unji.

¹¹ Milima hiyeza yinji, kuwahashile kumona nawa; muhuji wa meya unakufuku.

¹² Kuma, Zambi katwamine ko mwilu mwahiana, nyi? Matongonoshi chibwe kaali mwilu, kuma, katwamine ko mushi lienyi, nyi?

¹³ Hindu yena wakwamba ngwe: “Zambi yika ananyingika? Malelwa haamufuka, ngwe kuchi mahasa kutubatwila?”

¹⁴ Wakunyonga ngwe, malelwa alemu kaakumufuka ku meso, kahashile kumona, muze akwendangana ha kuzazuluka cha mwilu.

¹⁵ Kuma, wakuzanga lume kwenda mu jila yize yingulungulu akwenda matangwa eswe.

¹⁶ Atu waze yaahungumuka ni mihuji, muze mwaka wo kanda uchiheta.

¹⁷ Atu waze ambilile Zambi ngwo: “Katuka kuli yetu!” Yaanyonga ngwo, mukwa ndundo jeswe kahashile kwalinga nichimwe.

¹⁸ Hindu Zambi yazalisa mazuwo jo ni yuma yibema. Yami Chanyingikine manyonga ja yingulungulu.

¹⁹ Akwa ululi kaakuwahilila, ni waze kaavulumwine kaakuseha, muze akumona chize Zambi akumwesa yingulungulu lamba.

²⁰ Kaakwambamba ngwo: “Yuma yo yeswe hiyafwa, ubite wo hiwawema ni kahia.”

²¹ Jobe, wana ni Zambi, ubwe mu uhwimino, mba makakuwahisa ni yuma yinji.

²² Tayiza longeso lietu, lifunge mu mbunge ye.

²³ Chakutamba kuhiluka kuli Mukwa Ndundo Jeswe ni mbunge yibema, ni kuchiza yibi yeswe yize haanalinga mu zuwo lie.

²⁴ Mbila oru ye mu uto, oru ye yibema mukachi ka mawe ni mungulunga.

²⁵ Mba Mukwa Ndundo Jeswe mabwa oru ye, ni prata ye yibema.

²⁶ Mba muuwahilila ni Zambi Mukwa Ndundo Jeswe, ni kumuhetwila meso.

²⁷ Muze mulemba, makwivwa, muumanununa nawa yilakenyo yeswe.

²⁸ Yeswe yize muulinga muyiwaha; pangu mulipanguka mu jila ye.

²⁹ Zambi kakukehesa akwa kulengumuka; kakulamwina akwa kulikehesa.

³⁰ Ni yena nawa makakulamwina nyi kuwavulumwine ko, nyi yize wakulinga yili ya ululi.