Jobe 21 - Mukanda Wa Zambi 1970

Jobe

^1-2 Hibanjikenu yize ngunambe, ngulembejekenu kama, nungwivwe.

³ Ngutayizenu nguhanjike, mba muze hinamana, munuhasa kunguyunga, nyi nunazange.

⁴ Chishi kuhamika ni atu. Mumu yika Changutamba kulihumikiza?

⁵ Ngutalenu nulishimwoke, nukwate kwoko ku kanwa.

⁶ Nyi nanyonga yeswe yize hiyanguwana, ngunevu woma, mujimba weswe unachikima.

⁷ Mumu yika Zambi akutayiza yingulungulu kutwama kanawa ni kuheta ku ushinakaji?

⁸ Kaali ni ana ni ajikulu jo, kaakwamona chize anakolo.

⁹ Kaali mu uhwimino mu mazuwo jo, Zambi keshi kwamwesa lamba.

¹⁰ Yimuna yo kaakusema kanawa.

¹¹ Ana jo kaakutumbwoka ngwe ana ja pembe,

¹² kaakwimba ngoma ni tulialia, kaakuhangana.

¹³ Kaakutwama kanawa mu uhwimino; kaakufwa nawa mu uhwimino, kumona lamba ka.

¹⁴ Yingulungulu kaakwambila Zambi ngwo: “Katuka! Kutwazangile kukaula majila je.”

¹⁵ Kaakunyonga ngwo, kulingila Zambi chili chamokomoko, chibwe kumuwayila.

¹⁶ Kaakunyonga ngwo, maakayula ni tachi jo ene, alioze yami Chishi kutayiza manyonga jo.

¹⁷ Zambi te hajima kulu ndeya ya umwe chingulungulu, nyi? Umuwika uliko yoze hamona kama lamba, nyi? Zambi hamwesa kulu umwe chingulungulu lamba ni utenu wenyi,

¹⁸ ni kumuhehula ni fuji ngwe mwambu, hanji ngwe yizungu ni kangonga, nyi?

¹⁹ Nwakwamba ngwenu, Zambi kakumwesa ana lamba mumu ha milonga ya atato. Kaa! Chinalite Zambi amwese yivulumunyi lamba ha milonga yo ene, hanga achinyingike.

²⁰ Chinalite yivulumunyi amone lamba lio ene, nikulita ni chize Zambi Mukwa Ndundo Jeswe akwevwila ufwatulo.

²¹ Muze mwono wa mutu wakuhwa, mahasa kunyonga nawa akwa zuwo lienyi, nyi?

²² Mutu mahasa kulongesa Zambi, yoze wakubatwila akwa mwiku, nyi?

²³ Atu akwo kaakubwa ni tachi ndoo ku kufwa cho, kaakufwa ni kufwa chibema,

²⁴ Mijimba yo yakubwa ya maji ha maji, usongosongo wa yifwaha yo unovula.

²⁵ Akwo keeshi uwahililo nihakepe, kakufwa ni chinyengo.

²⁶ Alioze eswe kaakufwa, ni kaakwafunda, kaakwalia kuli mavuno.

²⁷ Ngunanyingika manyonga jenu abi waze nuli no hali yami.

²⁸ Nunahula ngwenu: “Haliabwila zuwo lia mutu munene lilihi lio, zuwo lize lia chingulungulu?”

²⁹ Kuma, kanda nuchitayiza kama atu waze anende mu jila, nyi? Kunwanyingikine sango jo, nyi?

³⁰ Ha tangwa lize Zambi akutenuka ni kumwesa atu lamba, chingulungulu keshi kumona lamba.

³¹ Wakuhi yoze mamusuma mulonga, hanji kumufwetesa yeswe yize hanalingi.

³² Muze akumutwala ku fuka, kaakusa ko tufunga.

³³ Atu anji akuya nenyi kunyima ni kulutwe, chibwe mavu a ha mafuka kakumulakumukina hakepe hakepe,

³⁴ Alioze yenu nuneseka kungulembejeka ni maliji amokomoko. Kumbululo lienu heswe lili lia mahuza.