Jobe 2 - Mukanda Wa Zambi 1970

Sakwonga yeseka nawa Jobe

¹ Limwe tangwa tunganda twa Zambi yeeza nawa ku meso ja Mwene Zambi, Sakwonga neye yabwa hakachi ko.

² Mwene Zambi yamuhula ngwenyi: “Kulihi unakatuka?” Sakwonga ngwenyi: “Akwendangana hashi ni kujingajinga ho.”

³ Mwene Zambi yamuhula ngwenyi: “Kuchi, hiunashishika kavumbi kami Jobe, nyi? Hashi kuheshi niumwe yoze alifwa nenyi. Kali mutu mubema, mukwa ululi yoze wakungulemesa ni kulifunga ku yibi. Unakangwitaye ngumumwese lamba hamokomoko, hindu Jobe kali mukwa kushishika ngwe hatangu.”

⁴ Sakwonga ngwenyi: “Chikowa che chikowa. Mutu mahana yeswe yize ali nayo hanga alamwine mwono wenyi.

⁵ Alioze nyi muubinjisa mujimba wenyi, kumakushililika.”

⁶ Mwene Zambi ngwenyi: “Kuheshi Chuma, kali mu moko je, alioze kanda umushiha.”

⁷ Hohene Sakwonga yakatuka ku meso ja Mwene Zambi. Mba yapwisa mujimba wa Jobe weswe ni mahute, chize ku molu ndoo ni ku mutwe.

⁸ Jobe yaya ni kutwama mu chichichila cha uto, yanda chiyo cha ndeho (yimbia) alicheke nacho.

⁹ Pwo lienyi yamwamba ngwenyi: “Kuma, ndoo ni haliabwila unashachila hali Zambi, nyi? Mushililike, ufwe kwe!”

¹⁰ Jobe ngwenyi: “Unahanjika ngwe chihepuke. Muze Zambi akutulingila yibema, twakuwahilila nayo. Alioze ngwe kuchi mutulinyenga nyi hatutumina lamba?” Chibwe mu lamba ngwe lize, hindu Jobe kashililikile ko Zambi.

Masepa ja Jobe yaaheta

¹¹ Jobe yabwa ni masepa wano atatu: Elifaze wa ku limbo lia Temane, ni Bilidade wa ku chifuchi cha Shua, ni Zofare wa ku chifuchi cha Nama. Muze heevwa ngwo, Jobe kanamono lamba, yaalivwisa kuya ni kumulembejeka.

¹² Shimbu te achili kusuku, yaamumona, alioze kaamunyingikine ko. Muze haamunyingika, yaabutuka kulila, yaatanuna mahina jo, yaatakumuna fufuta kwilu ni ha mitwe yo ni chinyengo.

¹³ Yaatwama nenyi kuluu matangwa shimbiali, kaahanjikile ko nichimwe mumu amwene lamba lienyi.