Jobe 18 - Mukanda Wa Zambi 1970

Bildade

^1-2 Jobe, kuma mutu ngwe yena kuwahashile kulihumikiza, nyi? Tweche ni yetu tuhanjike.

³ Kuchi unatutale ngwe tuli ngombe, ngwe tuli yihepuke?

⁴ Unalibihisa yena mwene ni utenu we. Kafwa atu eswe maakatuka hashi mumu hali yena, nyi? Hanji milundu muyitutuluka mumu hali yena, nyi?

⁵ Ndeya ya yingulungulu muyijima, kahia kayo keechi kutemuka nawa.

⁶ Pangu lia mu zuwo lienyi mulialumuka milima, ndeya yenyi muyijima.

⁷ Tambu lienyi litangu linakokoloka; Mana jenyi mwene kakumulimbwisa.

⁸ Kanaliate mu Wanda, mba molu jenyi kaanakashiwa.

⁹ Muheto unamukwata ku molu, kumwecha ka.

¹⁰ Kambwila linamujikinyina hashi, muheto unamuswamina mu jila.

¹¹ Sali ni sali yuma yakumuvwisa mwongo, kuyakumukaula kweswako maya.

¹² Te pichi, alioze haliabwila zala hiyamuwana, lamba linamutwaminyina.

¹³ Musongo wa kufwa hiwamukwata, moko ni molu haabutuka kubola.

¹⁴ Hamuchiza mu zuwo muze te akutwama mu uhwimino, ni kumutwala maha Mwanangana Sakufwa.

¹⁵ Atu akwo maahasa kutwama mu zuwo lienyi, nyi haalakumwina mo yitumbo.

¹⁶ Miji yenyi kushi yinomu; mitango yenyi kwilu yinomu.

¹⁷ Lufuma wenyi hahwa mu chihunda chenyi ni mu chifuchi cheswe, atu keeshi kumwiwuluka nawa.

¹⁸ Mamutuhwisa mu pangu ni kumuhangila mu milima; mamuhuma mukachi ka akwa mwono.

¹⁹ Keshi ana, chibwe vungu.

²⁰ Chize ku chivumbuko ndoo ku chitokelo, atu eswe waze akwivwa sango jenyi kaakuchikima ni woma.

²¹ Lino lili lamba lia yingulungulu, lamba lia waze kaanyingikine Zambi.