Jobe 16 - Mukanda Wa Zambi 1970

Jobe

^1-2 Hingunevu kulu yuma ngwe yize; kulembejeka chenu kuchakungubinjisa.

³ Kunuchi kwecha kuhanjika maliji wano amokomoko, nyi? Chuma chika chakunukoka, kashika nwakungukumbulula?

⁴ Yenu nyi nuli ngwe yami, ni yami nguli ngwe yenu, kachi munguhasa kuhanjika ngwe chize nunahanjika yenu; kachi te munguhasa kunyikwoka mutwe, ni kunwambamba yuma yinji.

⁵ Alioze ka, yami te mungunutakamisa ni longeso liami, ni kunulembejeka.

⁶ Nyi ngunahanjika, kuchichi kungukwasa, chibwe nguhole kuluu, hindu lamba liami kulichi kuhwa.

⁷ Zambi, hiwanguhongesa, hiwashiha atu jami eswe.

⁸ Hiwangukwata. Kuuli mukwa kole yami. Hinawangama, hinasala yifwaha wika. Kashika atu haafuliela ngwo, navulumwine.

⁹ Mu ufwatulo wenyi Zambi hangubatula yipinji yipinji, kahangutale ni ufwatulo.

¹⁰ Atu kaanangusehe, kaanangujingilika, kaanangulambe mbangala ha matafu.

¹¹ Zambi hangukunjika kuli yitanganyanyi; haanangumbila mu moko ja yingulungulu.

¹² Te ngunatwama kwami mu uhwimino, alioze Zambi yeza, yangukwata ha kota, yangulambalamba, yangubatwola yipinji yipinji. Kanangumika ngwe washilo wenyi.

¹³ Kanangwase mivwi sali ni sali, mivwi yize yinangulokwola ni kungulemeka; chibwe chocho kasolo kunguvwila keke.

¹⁴ Kanangulemeka kwami, kanangulundumukina ngwe kajita.

¹⁵ Ngunalili, hinazala mwanji, hinatwama ha uto, tachi jakuhi.

¹⁶ Meso jami haachila ni kulila, yindayizo yami yinaleme,

¹⁷ alioze upupilo wakuhi mu moko jami, ngunawayila Zambi ni mbunge yibema.

¹⁸ Mavu kanda usweka manyinga jami! Kanda aholesa kulila chami!

¹⁹ Alioze chela nguli nenyi mwilu; hako liami uliko.

²⁰ Masepa jami kaanangusaula; alioze ngunalili masoji kuli Zambi.

²¹ Ngunazange umwe anguhakwile kama ku meso ja Zambi, ngwe chize mutu akuhakwila sepa lienyi.

²² Mumu miaka yami hiyasala yikepe ngunende mu jila yize chichi kuhiluka.