Jobe 15 - Mukanda Wa Zambi 1970

Pande ja muchaali Elifaze

^1-2 Jobe, mutu wa mana mahanjika maliji amokomoko waze ali ngwe fuji, nyi?

³ Mukwa mana mahasa kuhanjika maliji waze keechi kufumbula nichimwe, nyi?

⁴ Nyi yena walinga chize unazange, mutu niumwe kechi kulemesa Zambi, niumwe kechi kulemba kuli iye.

⁵ Uhenge we wakubihisa maliji je; unahanjika ni maliji a ukanyama we.

⁶ Yami kwami chakuhishile ko, maliji je e akukuhisa, hi yami ko; wakulihisa yena mwene.

⁷ Yena uli mutu mutangu kusemuka, nyi? Yena wabwile ko muze te Zambi kanda achitanga milundu, nyi?

⁸ Yena wabwile ko muze Zambi atwamine punga, nyi? Unamono ngwe yena wika uli ni mana, nyi?

⁹ Chuma chika Unanyingika chize yetu kutwachinyingikine? Kuma yena hiwanyingika chize yetu kutwanyingikine, nyi?

¹⁰ Yetu twatambwile mana kuli waze ali ni kambu jitoma, waze asemukine muze te tatenu kanda achisemuka.

¹¹ Mwene Zambi kanazange kukufumba, mumu yika unalitunu. Yetu hitwahanjika ne ni kukulembejeka.

¹² Kuchi mbunge ye yinalipupula chocho? Ni meso je anatutumuka ngwe kahia?

¹³ Ni kutenukina Zambi ni wuli? Ni kuhanjika maliji abwa haha?

¹⁴ Mutu muka mahasa kubemena ku meso ja Zambi? Mutu muka mahasa kubwa mukwa ululi?

¹⁵ Zambi keshi kufuliela chibwe tunganda twenyi a mwilu, chibwe lilu liene hi libema ko ku meso jenyi.

¹⁶ Alioze mutu kakunwa uhenge ngwe meya; kali chihenge lume, kali wamokomoko.

¹⁷ Jobe, banjika, ngukulweze yize ngunanyingika.

¹⁸ Akwa mana haanangulongesa nawa, waze alongesele kuli atato; kaaswekele ko Chuma nichimwe.

¹⁹ Ha matangwa waze kaabwile ko ni yilambala mu chifuchi, mutu niumwe kabwile ko ha kwapiangula.

²⁰ Chingulungulu yoze wakumwesa akwo lamba, makamona lamba matangwa eswe a mwono wenyi.

²¹ Kakwivwa mwongo matangwa eswe, chibwe mayuka, hindu chononyi mamuwana.

²² Kahashile kuchina milima ka, kuli umwe mukwa mukwale kanamushimbwila amushihe.

²³ Pupa kakushimbwila kulia mujimba wenyi, kananyingika ngwenyi, kulutwe lamba lili ko.

²⁴ Kulifwita ni kubinda kuchakumwaha mwongo, ngwe mwanangana yoze anambe kwasa nenyi jita.

²⁵ Lienalio mulikabwa lamba lia mutu yoze unamika Zambi kome, yoze unahamika ni Mukwa Ndundo Jeswe.

^26-27 Mutu yoze kali mukwa kulengumuka, mukwa kulimika; kakukwata lukebwe wenyi, nikwasa jita ni Zambi.

²⁸ Mwenawo hatambula membo ni mazuwo muze atu haachina, alioze membo ni mazuwo waze, maabuzwola mu jita.

²⁹ Kechi kubwa nawa pichi ku miaka yeswe; ubite wenyi kuuchi kalinduluka. Chibwe chizulie chenyi muchijimuka.

³⁰ Kechi kuhasa kuchina milima. Makabwa ngwe mutondo, uze mitango yawo hiyawema ni kahia, ni yitemo yawo hiyahehuka ni fuji.

³¹ Nyi masa mbunge ku yuma yamokomoko, kumafumbula nawa yuma yamokomoko.

³² Muze matangwa jenyi kanda achizuka, kumakoma ngwe mutango, kuuchi kubwa nawa wa wisu.

³³ Makabwa ngwe mutondo wa vinyu uze unalukumuka mawundu jawo muze kanda achikola, hanji ngwe mutondo wa olive uze unalukumwona yitemo yawo.

³⁴ Yitanganyanyi keechi kabwa ni ana, kahia kumukalalisa mazuwo waze atambwile ni uhenge.

³⁵ Waze akumita uhulia, kaakusema uhenge, mbunge jo hijinazala ni kwonga.