Jobe 13 - Mukanda Wa Zambi 1970

^1-2 Maliji eswe waze nunahanjika, hinguneevu kulu. Yuma yize nunanyingika, ni yami nawa ngunayinyingika. Kunwanguhianyine nihakepe.

³ Alioze yami ngunahamika ni Mukwa Ndundo Jeswe, ngunazange kulilumbununa kuli Zambi.

⁴ Alioze yenu nwakusweka uhepuke wenu ni mahuza; nuli ngwe mbuki waze kaahashile kuwuka mutu niumwe.

⁵ Nyi ngwe nwahola kama, kachi munubwa ni mana.

⁶ Banjikenu ulumbunwiso wami. Ivwenu maliji jami.

⁷ Mumu yika nunahanjikila mahuza? Nunanyongo ngwenu, mahuza jenu maakwasa Zambi, nyi?

⁸ Kuma nunambe kuhakwila Zambi, nyi? Nunazange kuhamika mumu hali iye, nyi?

⁹ Nyi Zambi manushishika, yika mamona muli yenu? Hanji nunazange kumwonga ngwe chize nwakwonga atu, nyi?

¹⁰ Nyi nwabwa ni katonde ku tenga, makanukumika pundu,

¹¹ ni ndundo jenyi mujinuvwisa woma unji.

¹² Yishima yenu yili yamokomoko ngwe uto, kuhamika chenu ngwe uma.

¹³ Holenu kuluu, ngwechenu nguhanjike! Cheswacho muchibwa, chibwe.

¹⁴ Kuheshi Chuma, chibwe mungufwa ngufwe.

¹⁵ Hinachiza ko mbunge; kuheshi Chuma chibwe Zambi mangushiha, hindu ngunalihakwila.

¹⁶ Henaho mangulamwina, tangwa likwo hamu liami mulingulamwina, mumu yingulungulu keeshi kuhamuka ni kukundama ku meso jenyi.

¹⁷ Haliabwila banjikenu kanawa. Matwi jenu evwe chize ngunambe.

¹⁸ Hinalulika chikuma chami, mumu ngunanyingika ngwami, ngunasambe.

¹⁹ Zambi, unahase kungusuma mulonga, nyi? Nyi chocho, ngunaholo kuluu, ngufwe lume.

²⁰ Aa Zambi, ngutayize kama yuma yaali wika, mba chichi kweseka kuswama ku meso je:

²¹ hi echa kungumwesa lamba, chibwe kunguvwisa mwongo.

²² Zambi, ngutambike, mba mungukutaya, hanji nguhanjike, mba muungukumbulula.

²³ Uhenge wami ni milonga yami yingahi? Ngulweze kama mulonga wami ni shili yami.

²⁴ Mumu yika unanguswekela meso je ni kungutala ngwe nguli mukwa kole ye?

²⁵ Muukolesa woma lifwo lize linaholoka ni fuji, nyi? Hanji kuhanga yizungu yumu?

²⁶ Unangukokela milonga yinji yisasu, chibwe ha yitanga ya ukweze wami.

²⁷ Wakukashila molu jami mu kuli, wakutala majila jami eswe waze nakwenda, chibwe kuhengula ngano jami.

²⁸ Kashika nguli ngwe mutondo wabola, ngwe chikuto chize hichahwa ni ndulu.