Jobe 12 - Mukanda Wa Zambi 1970

Jobe

^1-2 Chamwenemwene yenu nuli e atu, mba muze munukafwa, mana keechi kabwa nawa hano hashi.

³ Alioze yami nawa nguli ni yinyingi ngwe yenu, Kunwanguhianyine nihakepe, Yino yeswe nunambe, iya kayinyingikine?

⁴ Chibwe masepa jami kaanangusehe haliabwila; alioze chalingile kwami chibi nichimwe, nguli mukwa ululi. Te nakutambika Zambi, neye mangukumbulula.

⁵ Atu waze ali mu uhwimino kaakulelesa lamba ngwe lili lume lia waze akutalinga.

⁶ Mazuwo ja mihuza kaali kanawa, akwa kwihia Zambi kali mu uhwimino, waze akumbata zambi yo mu moko jo.

⁷ Hulenu tushitu, no maanulongesa, ni tujila, no maanulweza.

⁸ Hulenu he hashi, muhanulongesa ni yishi a mu kalunga lwiji, no maanwambulwila.

⁹ Umwe uliko mukachi ko yoze kanyingikine ngwenyi, Mwene Zambi walingile chino, nyi?

¹⁰ Iye wakwata mwono wa yuma yeswe; mwono wa mutu mweswe uli mu kwoko lienyi.

¹¹ Ngwe chize limi liakuzanga yakulia, chenacho matwi jenu akuzanga kubanjika maliji.

^12-13 Tushinakaji kaali ni mana, alioze Zambi kali ni mana ni ndundo. Tushinakaji kaali ni yinyingi, alioze Zambi kali ni yinyingi ni chiyulo.

¹⁴ Nyi Zambi wabuzula Chuma chimwe, niumwe mahasa kuchitungulula; nyi wakwata mutu, niumwe mahasa kumutusula.

¹⁵ Nyi Zambi wajika meya, mavu mooma; nyi waajikula, monona hashi heswe.

¹⁶ Zambi kali mukwa ndundo, kakukumba matangwa eswe, mukwa kwonga ni mukwa kwongoloka kaali mu chiyulo chenyi.

¹⁷ Kakupwisa akwa mana yihepuke, kakubinjisa ngaji.

¹⁸ Kakujitula funge ja mianangana, kakupwisa mianangana funge,

¹⁹ Kakuzula mahina ja uvumbiko kuli mahako, kakuchiza akwa tachi mu chiuyulo cho.

²⁰ Kakukumisa ngaji, kakutokesa mana ja makulwana.

²¹ Akwa tachi kakwakolesa sonyi, kakuzeyesa akwa kuyula.

²² Kakufukula milima, kakuneha yuma ya milima ku Pangu.

²³ Kakutakamisa mavungu ni kwaapwisa alemu, alioze mba kulutwe maakaatwala mu undungo.

²⁴ Makulwana jo kakwapwisa yihepuke, kakwendanganyisa muma mwamokomoko ngwe akwa kuzengewa.

²⁵ Kaakupapata mu milima, pangu liakuhi; kaakupeliangila ngwe akwa kuzengewa.