Jobe 11 - Mukanda Wa Zambi 1970

Zofare

^1-2 Kukushi niumwe yoze makumbulula maliji wano amokomoko, nyi? Kuma kuhanjika chinji chakasambisa mutu, nyi?

³ Jobe, unanyongo ngwe yetu kutwahashile kukumbulula, nyi? Hanji kulenya che kuchichi kukukolesa sonyi, nyi?

⁴ Yena unambe ngwe: “Longeso liami lili liamwenemwene, ngunabeme ku meso ja Zambi.”

⁵ Aa, kachi Zambi mwene akuhanjikise!

⁶ Kuchi makulweza yijimbikilo ya mana, yikwo atu kaahashile kuyinyingika. Milonga ye yinahiana lamba lize Zambi akukumwesa.

⁷ Muuhasa kunyingika yijimbikilo ya Zambi, nyi? Muuhasa kushishika Mukwa Ndundo Jeswe, nyi?

⁸ Kukwasuhwa kuhiana lilu, alioze yena kuwahashile kuheta ko. Kananyingika kuma kwa afu, alioze yena kuwanyingikine ko.

⁹ Unene wa Zambi kuwahiana hashi, kuwahiana kalunga lwiji.

¹⁰ Nyi Zambi makukasa ni kukutwala ku ubatwilo, iya mamukwika?

¹¹ Zambi kananyingika akwa mahuza, nyi mamona uhenge, kechi kuufunjika, nyi?

¹² Chihepuke makabwa mukwa mana, muze chimbulu wa mu yambu makasema mwana mutu.

¹³ Jobe alumuka ku mbunge, Zoza moko je kuli Zambi.

¹⁴ Nyi uli ni uhenge mu moko je, umbile, Kanda utayiza ungulungulu kubwa mu zuwo lie.

¹⁵ Mba muuhetuka, sonyi ka; muumana nguu, woma ka.

¹⁶ Mba kuuchi kewuluka nawa lamba lie, mulibwa ngwe meya waze haanabalika.

¹⁷ Mwono we muutemuka kuhiana tangwa ha muchima, ni milima yawo ngwe kucha cha chichamene.

¹⁸ Muusa mbunge kuli Zambi. Neye makufunga, ni yena muubwa mu uhwimino.

¹⁹ Kuuchi kevwa woma wa akwa kole je; atu anji maakeza hanga ukaakwase.

²⁰ Alioze yingulungulu maatala sali ni sali, keechi kumona chize moomboka, maasa mbunge jo lume ku kufwa.