Jobe 10 - Mukanda Wa Zambi 1970

¹ Mwono wami hiwangubihila mungwambulula kunenganyana chami, munguhanjika ni yinyengo mu mbunge yami.

² Zambi, kanda unguhisa. Ngulweze kama mulonga wami.

³ Kuma chinalite kungumwesa lamba libwa haha, nyi? Ni kulelesa yami chitanga cha moko je, nyi? Ni kuwahilila ni manyonga abi a yingulungulu, nyi?

⁴ Uli ni meso a musunya, nyi? Wakumona ngwe chize twakumona yetu atu, nyi?

⁵ Matangwa ja mwono we kaali akepe ngwe a yetu, nyi? Miaka ya mwono we yili chimuwika ngwe ya atu, nyi?

⁶ Kashika wakufupafupa milonga yami, ni kuhengula yibi yami yeswe, nyi?

⁷ Yena Unanyingika ngwe, chishi kwami ni uhiso; niumwe mahasa kungulamwina mu moko je.

⁸ Yena Zambi wangwumbile, wangutangile, hindu haliabwila unalumuka ungushihe, nyi?

⁹ Iwuluka chize wangutangile ni uma. Kuma muunguhilwisa nawa ku mavu, nyi?

¹⁰ Yena wahele tata tachi ja kungusema. Wangutatwishile mu jimo lia mama.

¹¹ Yena wangujikile ni chikowa ni musunya, wangutokekele ni yifwaha ni mijiba.

¹² Wanguhele mwono, yiungulweza utu, yiungufunga kanawa.

¹³ Alioze tala yize waswekele ku mbunge ye, wanyongene kungumwesa lamba.

¹⁴ Yena te wakungutala, nyi navulumuma, uchine kungusambisa.

¹⁵ Nyi nalinga chibi, muungumwesa lamba! Chibwe ngulinge yibema, hindu kuuchi kuyalula. Lamba ni sonyi hiyanguwana.

¹⁶ Nyi nahetuka muunguhanga ngwe tambwe, muungumwesa lamba chibwe ni yilayi.

¹⁷ Matangwa eswe uli ni amwe yela waze anangusumu milonga, wakwokesa utenu we, tujita twe kaakuhamika ni yami nawa ni nawa.

¹⁸ Zambi, mumu yika wanguchijile mu jimo lia mama? Kachi nafwile kwami shimbu niumwe kanda achingumona.

¹⁹ Kachi te anguchijile mu jimo lia mama ni kungutwala lume ku fuka, kachi te nabwile ngwe chishiko.

²⁰ Matangwa ja mwono wami kaali akepe, ngweche kama nguwahilile hakepe,

²¹ shimbu kanda nguchiya kuze chichi kukatuka ko, ku chifuchi cha milima bwii,

²² ku chifuchi cha kuvundangenya, kuze pangu hako liabwa milima.