Jeremia 9 - Mukanda Wa Zambi 1970

¹ Nyi kachi mutwe wami wabwile shima lia meya, meso jami kachi abwile tusulo twa masoji, mba kachi ngubwe ni kuyeka mwalwa ni ufuku mumu hali atu jami waze haanashihi.

² Nyi nabwile ni kamwe kazuwo mu puya, kachi te munguhichika atu jami, nguye kwekuze. Mumu eswe kaali yihulia, kaali mbunga ya mafwefwe.

³ Kaakuzanga kuhanjika mahuza matangwa eswe, kaakuyula chifuchi ni uhenge, hi ni umwenemwene ko. Mwene Zambi kanambe ngwenyi: “Atu jami kaakuwezela yibi ha yikwo, keeshi kutayiza ngwo, nguli Mwene Zambi yo.”

⁴ Mutu mweswe akanyame ni mwenyembo wenyi, niumwe kanda afuliela mwanakwo, mumu mutu mweswe kakuzanga kwonga mukwo ngwe chize alingile Yakoba, mutu mweswe kaakulamikiza masepa jenyi.

^5-6 Ayo eswe kaakwonga masepa jo, kukushi niumwe yoze wakuhanjika umwenemwene; haanejilila kuhanjika mahuza, keeshi kulitwamina kuvulumuna. Kaakuwezela kubinjisa ha kubinjisa, ni kwonga ha kwonga. Mwene Zambi kanambe ngwenyi atu jenyi haanalitunu ye.

⁷ Kashika Mwene Zambi Mukwa Ndundo Jeswe kanawezela ngwenyi: “Mungubemesa atu jami ngwe chize akubemesa utale, mungweeseka. Atu jami haanavulumuna, mba chika chikwo munguhasa kulinga kuli ayo?

⁸ Makanwa jo kaali ngwe mivwi ya kushiha nayo; kaakuhanjika mahuza matangwa eswe. Mutu mweswe kakuhanjika ni maliji abema kuli mwenyembo wenyi, alioze ku mbunge kakumutela muheto.

⁹ Kuma kuchatambile kwamwesa lamba mumu ha yuma yino, nyi? Kuma chichi kukala milonga ha vungu ngwe lino, nyi? Yami Mwene Zambi nachamba.”

¹⁰ Yingwamba ngwami: “Mungunenganyana mumu ha milundu, mungulila mumu ha ulilo wa yimuna, mumu yeswe hiyoma; niumwe wakuhi unendangana mo. Ngombe keeshi kuteta mo nawa, tujila ni tushitu a mu yambu haachina mo.”

¹¹ Mwene Zambi kanambe ngwenyi: “Mungupwisa Yerusaleme mulumba wakwenyeka, muma mwakutwama mikuza; membo ja Ayuda maalumuka puya, muma muze kumwatwamine atu.”

¹² Yami yinguhula ngwami: “Aa Mwene Zambi, mumu yika chifuchi hichalialiangana chichize, hichabwa ngwe puya, ni yoze mendela mo nawa wakuhi? Iya uli ni mana a kunyingika yuma yino? Hiunayilumbununa kama kuli iya yoze mahasa kuyilweza akwo?”

¹³ Mwene Zambi yakumbulula ngwenyi: “Yuma yino yinabu Chenacho mumu atu jami haanehuka longeso liami. Koononokene ko kuli yami ni kaalingile ko chize naambile.

¹⁴ Alioze haanabu akwa pami, haanakombelela mahamba ja Bale ngwe chize aalongesele kuli atato.

¹⁵ Kashika banjikenu ku chize mungulinga yami, Mwene Zambi Mukwa Ndundo Jeswe, Zambi ya Aisraele; mungulisa atu jami mihuko yisasu ni kwanwisa ulembe.

¹⁶ Mungwamwangina mukachi ka mavungu waze ayo, chibwe tushakulu two, kaanyingikine ko. Mungwatumina tujita ha kulimika no ndoo mungwanongesa eswe.”

Aisraele yaakololoka aalamwine

¹⁷ Mwene Zambi Mukwa Ndundo Jeswe yamba ngwenyi: “Achinyongenu chize chinabu! Tambikenu akwa kulila mbimbi ni mapwo waze anyingika kwimba miaso ya kulila nayo.”

¹⁸ Atu yaamba ngwo: “Alwezenu alipupwise atwimbile kama miaso ya kulinyenga nayo, ndoo meso jetu maalundumioka masoji, ni yindayizo yetu yiule ni kuyeka.”

¹⁹ Banjikenu liji lia mbimbi mu Zione ngwo: “Kutwanonga! Sonyi hijatukwata! Chatutamba kukatuka mu chifuchi chetu; haabuzwola mazuwo jetu.”

²⁰ Yingwamba ngwami: “Yenu mapwo, banjikenu kuli Mwene Zambi, kanyamenu ku maliji jenyi. Longesenu ana jenu a mapwo kulila mbimbi, ni masepa jenu kwimba miaso yakulinyenga nayo.

²¹ Kufwa hichanjila mu tupenda twetu, hichanjila mu mazuwo jetu a wanangana: hichashiha ana mu majila, ni hichashiha akweze ku makano.

²² Mijimba ya afu haayimwangina kweswe, ngwe milumba ya pinga mu minda, ngwe chize mbuto yakuholoka muze anayibatula, mbuto yize niumwe mahasa kuyikunga. Mwene Zambi yangulweza ngwambe yino yuma.”

²³ Mwene Zambi kanambe ngwenyi: “Akwa mana kanda alisamba ni mana jo, chibwe chitakame ni tachi jo, chibwe pichi ni ubite wo.

²⁴ Yoze mazanga kulisamba, alisambe ngwenyi, kanangunyingika ni kakungwivwa. Mumu zango liami kulishi kuhwa, nakulinga yuma ya ululi ni yize yinalite. Yino ye yuma yize yakunguwahila. Yami Mwene Zambi nachamba.”

^25-26 Mwene Zambi hanambe ngwenyi: “Tangwa kulineza lize mungukamwesa akwa Egiptu lamba, ni Ayuda, ni Aedome, ni Aamone, ni Amoabe, ni atu waze akutwama mu puya, waze akukamba kambu jo. Mavungu wano eswe kaali yilima, alioze keeshi kufunga Usendo wami. Atu wano eswe chibwe Aisraele keeshi kufunga Usendo wami.”