Jeremia 8 - Mukanda Wa Zambi 1970

¹ “Ha matangwa waze yifwaha ya mianangana ni ya akwa lutwe ja Yuda, ni ya mahako, ni ya akwa munanyi ni ya atu akwo waze atwama mu Yerusaleme kumaakayivumbwola mu mafuka jo.

² Yifwaha yize keechi kayikunga ni kuyifunda, alioze muyikabwa ngwe pinga. Kumaakayimwanga kulutwe lia tangwa ni kakweji, ni matongonoshi, yuma yino te atu akuzanga kulingila, ni kuyivulwoka ni kuyikombelela.

³ Atu a vungu lino libi waze maakasala ko, waze atwama kuma kuze naamwanginyine, maakazanga kufwa. Yami Mwene Zambi Mukwa Ndundo Jeswe nachamba.”

Shili ya atu ni lamba lize makaamwesa kuli Zambi

⁴ Mwene Zambi yangwamba ngulweze atu jenyi ngwenyi: “Muze umwe malimbuka, kechi kuhinduka nawa, nyi? Nyi ngwe umwe hapianguka mu jila, keshi kuhiluka nawa, nyi?

⁵ Mba kuchi kevwe yenu atu jami hinunapianguka chichize, kunushi kuhiluka nawa? Nwakulalaminya ku mahamba jenu nikulituna kuhiluka kuli yami.

⁶ Nabanjikile, alioze kunwahanjikile ko umwenemwene. Niumwe wa kuli yenu wevwile chinyengo mumu ha shili yenyi; niumwe wahulile kama ngwenyi; ‘Chibi chika ngunakalinga kama?’ Alioze mutu ni mutu kakuya mu jila yenyi mwene, ngwe chize kavwalu akunjila mu jita.

⁷ Chibwe yitwanjimbu kaakunyingika kangonde ko; ni membe, ni tupiasa, ni yitokola kaakunyingika kakweji ko wa kuhiluka. Alioze yenu atu jami, kunwanyingikine Shimbi jize nakunuyula najo.

⁸ Mba ngwe kuchi munuhasa kulisamba ngwenu, nuli akwa mana, nunanyingika Shimbi jami? Talenu, alongeshi a uhenge haalumuna Shimbi jami.

⁹ Akwa mana jenu heevwa sonyi; kaanatatajala, haakwachika. Haanalitunu maliji jami; mba haliabwila mana jo ali?

¹⁰ Kashika munguhana minda yo kuli atu eka, ni mapwo jo kuli malunga eka. Atu eswe anene ni akepe, kaaneseka kufumbula mbongo ni uhenge. Chibwe akwa munanyi ni mahako kaakwonga atu.

¹¹ Kaakunyonga ngwo, yilonda ya atu jami yili yamokomoko. Kaakwamba ngwo: “Yeswe yinawaha,” alioze kuma ka!

¹² Ayenu atu jami, kunushi kwivwa kama sonyi mumu ha yizelwokeso yize nwakulinga, nyi? Kunwajivwile ko nihakepe, nimwene kunwahashile kwivwa sonyi! Kashika munukalimbwoka ngwe amwe akwo haanalimbwoka; lienalio mulikabwa songo lienu. Yami Mwene Zambi, nachamba.

¹³ “Mala, te nazangile kukunga atu jami, ngwe chize mutu akukunga mbuto yenyi; alioze ayo kaali kwo ngwe mitondo ya vinyu yize kuyishi mihuko, hanji ngwe mukuyu uze kuushi makuyu, chibwe mafwo haalela. Ha chino hingunatayiza kuhana chifuchi cho kuli tundaka.”

¹⁴ Atu ja Zambi kaanalihula ngwo; “Ayenu, kuchi mba tunalihulika chichize nee? Tukatukenu, tuchinyine ku membo akukoleka, tukafwile ko, mumu Mwene Zambi hatutakwila kufwa; hatwaha ulembe usasu ha kunwa, mumu hitwamuvulumuna.

¹⁵ Twasele ko mbunge kubwa mu uhwimino ni tangwa lia kutuwuka, alioze kenu, shina mwongo wika.

¹⁶ Akwa kole jetu haanjila kulu mu limbo lia Dane; tunevu kubwoza cha tuvwalu two. Chifuchi cheswe chinachikima muze anevu kukangwoka cha tuvwalu two. Akwa kole jetu heeza ni kwonona chifuchi chetu ni yuma yamo yeswe, ni limbo lietu ni e atu jamo eswe.”

¹⁷ Mwene Zambi kanambe ngwenyi: “Kanyamenu! Ngunatumu tupela mukachi kenu, kaali tupela a ulembe waze keeshi kuhasa kwahombola, kumaakanusuma.”

Jeremia yevwila atu jenyi chinyengo

¹⁸ Chinyengo chami kuchahashile kuhwa; ngunanenganyana kuhiana.

¹⁹ Banjikenu mu chifuchi cheswe! Ngunevu atu jami kaanakololoka ngwo: “Kuma Mwene Zambi keshi nawa mu Zione, nyi? Mu Zione mwanangana keshimo nawa, nyi?” Mwene Zambi mwanangana wo kanakumbulula ngwenyi: “Mumu yika unanguvwisa ufwatulo, ha kukombelela mahamba jenu, ni kufukamina mazambi jenu amokomoko a tundaka?”

²⁰ Atu kaanakololoka ngwo: “Matangwa a kuhela mbuto haabalika, mbuto haayihela, alioze yetu kaatulamwinyine.”

²¹ Mbunge yami yinasasaminya, mumu atu jami haafwenya; ngunanenganyana; hinazeya liakulu.

²² Kuma mu Gileade yitumbo kuyishimo, nyi? Chibwe mbuki keeshimo, nyi? Kuchi mba, atu jami kaawukile ko?