Jeremia 7 - Mukanda Wa Zambi 1970

Jeremia yalongesa mu zuwo lia Zambi

^1-3 Mwene Zambi yangutuma ku chikolo cha zuwo lia Zambi kuze akuyaya Ayuda ni kuwayila. Yangwamba ngumane ko ni kulongesa yize Mwene Zambi Mukwa Ndundo Jeswe, Zambi ya Aisraele, maalweza. Ngwami: “Alumukenu ku mbunge, litwaminenu ndako jenu jibi, mba mungunutayiza kutwama kuno.

⁴ Litwaminenu kufuliela maliji akwonga ngwo, ‘Tunawaha! Lino lie zuwo lia Mwene Zambi, lino lie zuwo lia Mwene Zambi, lino lie zuwo lia Mwene Zambi!’

⁵ “Alumukenu ku mbunge, litwaminenu ndako jenu jibi. Lilingenu yibema umwe ni mukwo.

⁶ Litwaminenu kulakila yilambala, ni shiwa, ni waze haanafwisa malunga. Litwaminenu kushiha atu waze keeshi milonga mu chifuchi. Litwaminenu kuwayila mazambi eka. Nyi ka, munukafwa.

⁷ Nyi nwalumuka ku mbunge, mba mungunutayiza kutwama mu chifuchi chino nahanyine kuli tushakulu twenu kubwa chihinga cho cha miaka yeswe.

⁸ “Talenu, nwakujikijila ha maliji a kwonga.

⁹ Nwakwiya, nwakushiha, nwakulinga utanji, nwakulishinga ni mahuza, nwakulambula milambu kuli hamba Bale, nwakuwayila mazambi waze te kunwanyingikine.

¹⁰ Nwakulinga yuma yize nakuvutwokela. Munubwamuze munwiza ni kumana ku meso jami, mu zuwo liami, nikwamba ngwenu: ‘Tunawaha!’

¹¹ Kuma yenu nwakunyonga ngwenu, zuwo liami hiliabwa chivwenge cha mihuza, nyi? Naakumona yeswe yize nwakulinga.

¹² Achiyenu mu limbo lia Shilo, kuma kutangu kuze nwatongwele ha kunguwayila; nuchitale chize nalingile ko mumu ha milonga ya atu jami Aisraele.

¹³ Hinunavulumuna milonga yino yeswe, alioze chibwe muze hingunanushinjila nawa ni nawa, hindu kunushi kwivwa. Muze nakutambika kunushi kungukumbulula.

¹⁴ Kashika, yeswe yize nalingile ku Shilo munguyilinga nawa ku zuwo liami, lize nwakujikijila. Homa hano nahanyine kuli tushakulu twenu ni yenu, mungulinga ho nawa ngwe chize nalingile ku Shilo.

¹⁵ Mungunuhuma mu chifuchi ngwe chize nahumine usoko wenu, Aisraele. Yami Mwene Zambi nachamba.”

Uhulia wa Ayuda

¹⁶ Mwene Zambi yamba ngwenyi: “Jeremia, kanda ulembela atu wano. Kanda ulinyenga hanji kwaahakwila; kanda ungulembejeka, mumu chichi kukubanjika.

¹⁷ Yena kusolo kumona yize akulinga mu membo ja Ayuda ni mu majila a mu Yerusaleme, nyi?

¹⁸ Ana kaakuchaya kunyi, makulwana kaakuwika kahia, ni mapwo kaakuchaka wunga wa kulinga mbolo ya zambi wa pwo yoze akuvuluka ngwo, Mwanangana wa Kwilu. Kaakuzujila nawa milambu kuli mazambi eka, ni kunguvwisa chinyengo.

¹⁹ Kuma yami anevwisa chinyengo, nyi? Ka, ayo ene analivwisa chinyengo ni kulikokela sonyi.

²⁰ Kashika yami, Mwene Zambi Mukwa Ndundo Jeswe, munguvwila zuwo lino lia kuwayila ufwatulo, ni atu ni yimuna, chibwe mitondo ni ye mbuto. Ufwatulo wami muukabwa ngwe kahia kaze niumwe kahashile kujima.

²¹ “Yenu atu jami, milambu yikwo nwakuyochela liakulu ha chilumbilo, yikwo nunahase kulia. Alioze yami Mwene Zambi ngunambe ngwami, munuhasa kuyilia yeswe.

²² Tushakulu twenu chahele ko Shimbi hakutwala ku milambu ya kwocha hanji ku milambu yikwo yeka ni yeka, muze nanutuhwishile mu chifuchi cha Egiptu.

²³ Alioze naambile angwononokene, mba hanga ngubwe Zambi yo, no abwe atu jami. Naambile alinge ngwe chize ngunaambe, hanga awahe kwo.

²⁴ Alioze koononokene ko chibwe kukanyama. Alioze yaalinga cheswacho azangile ni pami ni mbunge jo jibi, mba yaalilimuna liakulu.

²⁵ Chize ku tangwa lize tushakulu twenu atuhukile mu Egiptu ndoo musono nakutumatuma tuvumbi twami ni akwa munanyi kuli yenu.

²⁶ Chibwe chocho, niumwe hanabanjika hanji hanakanyama, alioze hinunabu yihulia ni akwa pami kuhiana tushakulu twenu.

²⁷ “Kashika, yena Jeremia, muuhanjika maliji wano eswe kuli atu jami, alioze keechi kukubanjika; muwaatambika, alioze keechi kukumbulula.

²⁸ Muwaalweza ngwe, vungu lio keeshi kungwononokena, yami Mwene Zambi yo, hanji kulilongesa ku lamba lio. Umwenemwene hiunahu, hikeechi kuta nawa pande.

Yitanga yibi ya Ayuda mu chikulo cha Hinome

²⁹ “Yenu akwa Yerusaleme, lilenu mbimbi, tewulenu kambu jenu nujimbile. Imbenu miaso ya lungungu helu lia milundu, mumu yami Mwene Zambi, ngunevu ufwatulo, hinalituna atu jami.

³⁰ “Ayuda haalinga Chuma chibi. Haasa mahamba jo, waze nakuvutwokela, mu zuwo liami, haalipwisa lia luchisa.

³¹ Haatunga chilumbilo mu chikulo cha Hinome chize akuvuluka ngwo Tofete, hanga ahase kulambwila ho ana jo a malunga ni a mapwo mu kahia. Alioze yami chaalwezele ko kuchilinga, Chuma chino chibwe mu manyonga jami ku chishimo.

³² Kashika tangwa kulineza, lize keechi kachivuluka nawa ngwo Tofete, chibwe chikulo cha Hinome, alioze chikulo cha Kushihila Atu. Kwenako maakafundafunda atu, mumu keechi kumona nawa kuma kukwo.

³³ Mijimba muyikabwa kulia cha tujila ni tushitu a mu yambu, niumwe kechi kabwa ko ha kwahuma.

³⁴ Che chifuchi muchalumuka puya. Mu membo ja Yuda ni mu majila ja Yerusaleme keechi kevwa mo nawa milolo ya chiseke ni uwahililo ni ngunda ja uwahililo ja umbachiso.