Jeremia 6 - Mukanda Wa Zambi 1970

Akwa kole yaaseleka Yerusaleme

¹ Yenu vungu lia Benjamine, Chinenu hanga nulilamwine! tuhukenu mu Yerusaleme! Humunenu chitavwi mu chihunda cha Tekoa, Senu chimwe chinyingi cha kahia mu chihunda cha Bete Hakereme. Lamba ni kwonona kuyinakatuka ku norde.

² Limbo lia Zione lili libema, alioze kumaakalionona;

³ mianangana ni tujita two maakasa ko misumba yo. Limbo kumaakalijingilika ni mazuwo jo a makubu, mutu mweswe makajika zuwo lienyi kweswako anazange.

⁴ Kumaakamba ngwo: “Lulikenu twase jita ni Yerusaleme! Lulikenu, mutwasa no jita tangwa ha muchima!” Alioze hindu kumaakamba nawa ngwo: “Eehee, tunalaluka, hikwabwa kulu chingoloshi, tangwa hiliaya kulu, ni yizulie hiyasuhwasuhwa kulu.

⁵ Mutukasa no jita ha ufuku; mutubuzula chipanga cho chakukoleka.”

⁶ Mwene Zambi Mukwa Ndundo Jeswe hanalweze mianangana wano kupakula mitondo hashi ni kulumbika milumba yakuseleka nayo Yerusaleme. Hanambe nawa ngwenyi: “Mungumwesa limbo lino lamba mumu hilinazala ni akwa kubinjisa.

⁷ Ngwe chize shima liakufunga meya jalio akekema, Chenacho nawa Yerusaleme akufunga ungulungulu wenyi. Ngunevu upupilo ni kwonona mu limbo; ngunamono shina misongo ni yilonda.

⁸ Yenu akwa Yerusaleme, lamba lino linukanyamise kama. Nyi ka, mungunwehuka, limbo lienu mungulipwisa ngwe puya, kuze niumwe kechi kutwama mo nawa.”

Aisraele yaakatukila Mwene Zambi

⁹ Mwene Zambi Mukwa Ndundo Jeswe yangwamba ngwenyi: “Israele maakamuhela ngwe chize akuhela mihuko yeswe ya ku mitondo ya vinyu. Kashika Chakutamba kulamwina mweswawo muuhasa kulamwina nikawashi.”

¹⁰ Yingukumbulula ngwami: “Iya mangubanjika nyi mungwakanyamisa? Kaali kwo akwa pami, kaakulituna kubanjika maliji je; kaakulelesa kwo yeswe yize wakungwamba ha kwalweza.

¹¹ Ufwatulo we wakulimika no ni yami nawa unangwocho, Mwene Zambi, yuma yino ni yami chahashile kulihumikiza nayo nawa.” Mba Mwene Zambi yangwamba ngwenyi: “Nyi Chenacho, solola ufwatulo wami hali ana mu majila ni ha mbunga ya akweze. Malunga ni mapwo jo, chibwe tushinakaji maakaatwala mu undungo.

¹² Mazuwo jo maakaahana kuli atu eka, ni ye minda yo ni e mapwo jo. Akwa chifuchi chino mungukaamwesa lamba.

¹³ Atu eswe anene ni akepe, kaaneseka kufumbula mbongo ni uhenge; chibwe akwa munanyi ni mahako kaakwonga atu.

¹⁴ Kaakunyonga ngwo, yilonda ya atu jami yili yamokomoko. Kaakwamba ngwo: ‘Yeswe yinawaha,’ alioze kuma ka.

¹⁵ Kevwile ko kama sonyi mumu ha yizelwokeso yize akulinga, nyi? Ka, kaajivwile ko nihakepe, nimwene te keeshi kuhasa kwivwa sonyi. Kashika muze mungukaamwesa lamba, maakalimbwoka ngwe chize amwe akwo haanalimbwoka. Lienalio mulikabwa songo lio. Yami Mwene Zambi nachamba.”

Israele yalituna kukaula jila ya Zambi

¹⁶ Mwene Zambi yambila atu jenyi ngwenyi: “Achimanenu ha makano nuchitale. Shishikenu majila akulu nuchimone kuze kuli jila yibema. Nwende mo, mba nubwe mu uhwimino.” Alioze ayo ngwo: “Ka, kutusolo!”

¹⁷ Mba Mwene Zambi yatongola tufunga hanga alongese kutoweza cha chitavwi. Alioze ayo ngwo: “Kutuchi kubanjika.”

¹⁸ Kashika Mwene Zambi yamba ngwenyi: “Yenu mavungu, banjikenu yuma yize muyikeza hali atu jami.

¹⁹ Hashi, banjikenu! Lamba lino heswe mungukaneha lia kwonona atu wano, mumu haanehuka longeso liami, kaasolo kwononoka ku maliji jami.

²⁰ Milambu yo ya mbuto ya vumba libema, yika muyikwasa, chibwe yakwiza ku Sheba hanji ku chifuchi chikwo kusuku? Chichi kutayiza yawana yo, hanji kuwahilila ni milambu yo.

²¹ Mungukaatalingisa ni kwalimbwisa. Atato ni ana a malunga, ni masepa ni enyembo kumaakafwa.”

Akwa kole a ku norde yaanjila mu Yuda

²² Mwene Zambi kanambe ngwenyi: “Talenu, atu kaaneza a ku chifuchi cha ku norde, vungu lia tachi lia kusuku kaanalulika kwasa jita.

²³ Kaanambata mata jo a kwasa ni mikwale yo; kaali yiswii, keeshi keke. Muze akwendela ha tuvwalu two, lushindu wo kali ngwe lundunjila wa kalunga lwiji. Haalulika kwasa jita ni Yerusaleme.”

²⁴ Akwa Yerusaleme ngwo: “Hitwevwa sango jize ni mwe mu moko kekee. Tunevu yikola ngwe pwo yoze unafumbajala ha kusema.

²⁵ Kutwahashile ko kuya ni kwendangana mu jila chibwe ku minda, mumu akwa kole jetu haalulika jita. Mwongo tunevu sali ni sali.”

²⁶ Mwene Zambi yambila atu jenyi ngwenyi: “Zalenu mianji, lilangumunenu mu uto. Lilenu mbimbi ngwe yoze unalili mwanenyi wa wika, mumu yoze uneza ni kunwonona kumeza susumuku.

²⁷ Jeremia, acheseka atu jami, ngwe chize akweseka utale, hanga umone chize anabu.

²⁸ Eswe kaali yihulia ni akwa pami, akalu ngwe unengu ni utale. Eswe kaanali mbongo ja mbenga, kaanendangana ni kumwanga sango jibi.

²⁹ Mwaze unalingi ni tachi, alioze maleka a utale kaasolo kushituka. Chenacho nawa yibi ya atu jami kuyisolo kuhwa, mumu yingulungulu kaachijile mo.

³⁰ Kumaakavuluka ngwo, maleka amokomoko, mumu yami Mwene Zambi hinalitunoo.”