Jeremia 52 - Mukanda Wa Zambi 1970

Kwenyeka cha Yerusaleme

¹ Zedekia te habwa ni miaka makumi aali ni kashi muze amupwishile mwanangana wa Yuda; yayula mu Yerusaleme miaka kumi ni kashi. Naye jina lienyi te Hamutala, mwana wa Jeremia wa ku limbo lia Libna.

² Mwanangana Zedekia yavulumuna Mwene Zambi, ngwe chize alingile mwanangana Jehoakime.

³ Mwene Zambi yevwila akwa Yerusaleme ni Ayuda ufwatulo kuhiana, kashika yaahuma ku meso jenyi. Zedekia yakatukila mwanangana Nebukanezore wa ku chifuchi cha Babilonia,

⁴ kashika Nebukanezore yeza ni tujita twenyi eswe ni kwasa jita ni Yerusaleme ha tangwa lia muchikumi lia kakweji wa muchikumi ha mwaka wa muchilivwa wa kuyula cha mwanangana Zedekia. Yaajika musumba hehi ni limbo, yaajingilika ko chipanga cha kwajikinyina,

⁵ yaatwama ko ndoo ha mwaka wa kumi ni umuwika wa kuyula cha Zedekia.

⁶ Ha tangwa lia muchilivwa lia kakweji wa muchiwana wa mwaka uzewene, mu limbo yimubwa zala yinji. Atu yaahona yuma yakulia. Mwaabwamuze tujita twa Babilonia

⁷ yaalokola chipanga cha lie limbo. Chibwe te tujita twa Babilonia kaanajikinyina limbo, hindu tujita twa Ayuda eswe yaachina ha ufuku. Yaabalikila mu chikolo cha hakachi ka yipanga yaali, hehi ni munda wa mwanangana, yaachina ni kutalikisa ku chikulo cha Yordau.

⁸ Alioze tujita twa Babilonia yaahanga mwanangana Zedekia, yaamukwachila mu yana hehi ni limbo lia Yeriku. Tujita twenyi eswe yaamuchina.

⁹ Yaatwala Zedekia maha mwanangana Nebukanezore mu limbo lia Ribla mu chifuchi cha Hamate. Kwenako amusopeselele.

¹⁰ Ku Ribla yaashiha ana ja mwanangana Zedekia a malunga kwe ku meso jenyi, yaashiha nawa akwa lutwe ja Ayuda.

¹¹ Mwaabwamuze, yaalokola meso ja Zedekia yaamukasa mu ngoji ja utale, yaamutwala ku Babilone. Zedekia yatwama mu zuwo lia lamba ndoo ni ku kufwa chenyi.

Kubuzuka cha zuwo lia Zambi

¹² Ha tangwa lia muchikumi lia kakweji wa muchitano wa mwaka kumi ni wa muchilivwa wa kuyula cha mwanangana Nebukanezore wa chifuchi cha Babilonia, Nebuzaradane, mukwa mana wa mwanangana kanda mwata wa tujita twenyi, yanjila mu Yerusaleme.

¹³ Yocha zuwo lia Zambi, ni lia mwanangana, ni mazuwo ja atu alemu eswe a mu limbo;

¹⁴ tujita twenyi yaabuzwola yipanga ya lie limbo.

¹⁵ Mba Nebuzaradane yatwala masalila eswe ku Babilonia, yilangaji ni eswe waze alikunjikile kuli Ababilonia.

¹⁶ Alioze mu Yuda yahichika mo amwe yiswale, waze te keeshi ni yuma ya ayo ene; yaaha milimo ya kulima minda ya vinyu ni ya mbuto.

¹⁷ Ababilonia yaabatwola manguji a unengu a mu zuwo lia Zambi ni matemba, ni lumbashila lwa unengu, yaayitwala yeswe ku Babilone.

¹⁸ Yaambata nawa ndeho, ni yula ya kukombela uto, ni yifuko ya kujimina kahia, ni yenga, ni yikwachilo yeswe ya unengu ya ha chilumbilo.

¹⁹ Yaambata nawa yuma yeswe ya prata ni oru, yenga, ni ndeho, ni yula, ni milondo ni yikwachilo ya ndeya, ni misenge.

²⁰ Yuma ya unengu yize alingile mwanangana Solomone ya mu zuwo lia Zambi, manguji aali, ni matemba, ni lumbashila, ni makuji a ngombe kumi ni aali waze te akulumbata, yabwile yilemu kuhiana ha kuyipezala.

^21-22 Manguji aali yaabwa chimuwika: kusuhwa cha manguji yichibwa metro 8, ha kujingilika metro 5 ni sentimetro 30, yaabwa ni pako muchima, utale yiubwa ni ndama milimetro 75. Ha masongo ja manguji yihabwa chipangula cha unengu cha metro 2 ni sentimetro 20 ha kusuhwa. Yachitunga ni kuchiseleka ni unengu ni kuchola ni mawundu a pomegrade ya unengu.

²³ Yikubwa mawundu ngwe granade kulakaji; muze mutu ali hashi mamona shina makumi livwa ni asambano.

Ababilonia yaatwala Ayuda funge

²⁴ Nebuzaradane mwata wa tujita, yatwala mu ufunge Seraya mwata wa mahako, ni Zefania yoze te wamuhata, ni akwa lutwe atatu a mu zuwo lia Zambi.

²⁵ Mu limbo yachiza mo mwe mwata wa tujita, ni akwa kuyula ja mwanangana atano waze asalile, ni mulopo wa mwata wa tujita yoze te wakusoneka sango ja jita, ni atu akwo alemu makumi asambano.

²⁶ Nebuzaradane yaatwala kuli mwanangana wa Babilonia, ku limbo lia Ribla,

²⁷ mu chifuchi cha Hamate. Kwenako abinjishilile ni kwashiha kuli mwanangana. Chenacho achijile Ayuda mu chifuchi cho ni kwatwala mu undungo.

²⁸ Chino che kwalula cha atu waze Nebukanezore atwalile funge: ha mwaka wa muchishimbiali wa kuyula chenyi, 3,023;

²⁹ ha mwaka wenyi wa kumi ni wa muchinake, 832;

³⁰ ha mwaka wenyi wa makumi aali ni wa muchitatu, Nebuzaradane yatwala nawa 745. Atu eswe kwoka cho te 4,600.

Ababilonia yaatuhwisa Jehoakine mu zuwo lia lamba

³¹ Ha mwaka uze Evile Merodake yabutuka kuyula mu chifuchi cha Babilonia, yalweza Jehoakine mwanangana wa Yuda utu, yamutuhwisa mu zuwo lia lamba. Yuma yino yabwile ha tangwa makumi aali ni lia muchitano lia kakweji wa kumi ni kaali wa mwaka wa makumi atatu ni wa muchishimbiali chize haze atwalile mwe Jehoakine mu ufunge.

³² Evile Merodake yalingila Jehoakine kanawa, yamusa ha muhela ulemu kuhiana chize alingile kuli mianangana akwo waze abwile mu undungo mu Babilonia.

³³ Yamutayiza kuzula mahina jenyi a mu zuwo lia lamba, ni kulia ku mesa ya mwanangana ha matangwa eswe a mwono wenyi.

³⁴ Matangwa eswe te kakutambula mbongo ja kulanda yeswe yize akuhona.