Jeremia 51 - Mukanda Wa Zambi 1970

¹ Mwene Zambi kanambe ngwenyi: “Ngunaneha fuji yakwonona yakulimika ni Babilonia ni atu jenyi.

² Mungutuma yilambala hanga enyeke Babilonia ngwe fuji yinakombo yiswaswa. Muze tangwa lize lia kwenyeka hilieza, yilambala kumeeza ku kanda jeswe ni kwenyeka che chifuchi.

³ Kanda nutayiza tujita twenyi kukwata mata jo a kwasa hanji kuzala yitwa yo ya jita. Chibwe akweze kanda nweecha! Nwonona tujita eswe!

⁴ Kumaabwa tupaza, kumaafwa mu majila a mu membo jo.

⁵ Yami, Mwene Zambi Mukwa Ndundo Jeswe, chehukile ko Aisraele ni Ayuda, chibwe haananguvulumuna yami, Munangi wa Aisraele.

⁶ Aisraele ni Ayuda Chinenu Ababilonia! Chinenu nulamwine miono yenu! Kanda anushiha mumu ha milonga ya Ababilonia. Haliabwila ngunamwesa Ababilonia lamba ngwe chize ayo amwesene akwo lamba.

⁷ Babilonia yabwa ngwe musenge wa oru mu kwoko liami, wakuzengesa akwa hashi eswe. Mavungu yaanwa vinyu yenyi, yaazauka.

⁸ Susumuku Babilonia yalimbuka yafwa! Mulilenu! Senu yitumbo ha yilonda yenyi, hanji mahinduka.

⁹ Yilambala waze te atwama ko yaamba ngwo: ‘Yitweseka kuwuka Babilonia, alioze kuma te tangwa hiliabalika. Haliabwila tumuhichikenu, tuhilwoke ku mahietu. Zambi, ni ndundo jenyi jeswe, hamwesa Babilonia lamba, hamwenyeka liakulu.’ ”

¹⁰ Mwene Zambi kanambe ngwenyi: “Atu jami kololokenu ngwenu: ‘Mwene Zambi hatulweza ngwenyi, yenu nunasambe. Tuyenu tulweze akwa Yerusaleme chize Mwene Zambi, Zambi yetu, hatulingila.’ ”

¹¹ Mwene Zambi havundula mianangana ja chifuchi cha Media, mumu kanambe kwenyeka Babilonia. Chenacho makala zuwo lienyi lia kuwayila lize abuzwile Ababilonia. Miata ja tujita kaanambe ngwo: “Kalulenu mivwi yenu! Andenu kebwe jenu nikawashi!

¹² Mikenu bendelo ni kulweza ngwo, butulenu kubuzula yipanga ya Babilone. Takamisenu tujita! Senu tufunga! Senu malunga ajikinyine!” Mwene Zambi halinga chize hamba kulinga kuli Ababilonia.

¹³ Chifuchi chize chili ni njiji jinji ni ubite unji, alioze tangwa hiliakundama, hijamukangana kuchina alamwine mwono wenyi.

¹⁴ Mwene Zambi Mukwa Ndundo Jeswe halishinga ngwenyi, matuma tujita anji ngwe yizavu ya makumbi ase jita ni Ababilonia, kumaatwa milolo mumu haakumba.

Mwaso: chichimiekenu Zambi

¹⁵ Mwene Zambi watangile hashi ni ndundo jenyi; yatanga ho ni mana jenyi, yazazulula lilu.

¹⁶ Ku liji lienyi meya kaakulundumuka kwilu; kakukakumwisa malelwa ku masongo a hashi. Kakutuma njaji mu vula, kakutuma fuji kuma liayo.

¹⁷ Ha kumona yuma yino, atu kaakunyonga ngwo, tuli yelo ni yihepuke; waze akulinga mahamba kaakwivwa sonyi, mumu mazambi waze akulinga kaali amokomoko, keeshi mwono.

¹⁸ Kaali amokomoko, chatamba kwalelesa. Muze Mwene Zambi makeza ni kubulwila atu, mahamba kumaakaakuwisa.

¹⁹ Zambi ya Yakoba keshi ngwe ayo; iye mwe watangile yuma yeswe, yatongola Aisraele kubwa atu jenyi. Mwene Zambi Mukwa Ndundo Jeswe lie jina lienyi.

Mweto wa Mwene Zambi

²⁰ Mwene Zambi kanambe ngwenyi: “Babilonia, yena uli mweto wami, yitwa yami ya jita. Te nakuwonda ne mavungu ni mawanangana,

²¹ kufwenya tuvwalu ni waze akwendela ho, ni matemba ni waze akweendesa;

²² kushiha malunga ni mapwo, ni makulwana ni akweze, ni ana a malunga ni a mapwo;

²³ kwonona tufunga ni e mapanga jo, ni njimi ni e tuvwalu two, ni akwa kuyula ni miata a tujita.”

Mwene Zambi mamwesa akwa Babilonia lamba

²⁴ Mwene Zambi kanambe ngwenyi: “Kumunumona chize mungufwetesa Babilonia ni atu jenyi mumu ha ungulungulu weswe uze haanalingi mu limbo lia Zione.

²⁵ Babilonia yena uli ngwe mulundu uze wakwonona hashi heswe, alioze yami Mwene Zambi, nguli mukwa kole ye. Mungukukwata, mungukuhulumuna hashi, ni kukupwisa uto.

²⁶ Nilimwe lia ku mawe akwenyeka cha yena maakatunga nalio zuwo, muukabwa ngwe puya ku miaka yeswe. Yami Mwene Zambi nachamba.

²⁷ “Mikenu bendelo ha kulweza ngwo, butukenu jita! Humunenu chitavwi hanga mavungu ahase kwivwa! Lulikenu mavungu ase jita ni Babilonia! Lwezenu yifuchi ya Ararate, ni Mini, ni Askenaze ase jita. Tongolenu umwe mwata wa tujita. Nehenu tuvwalu ngwe yizavu ya makumbi.

²⁸ Lulikenu mavungu ase jita ni Babilonia. Tambikenu mianangana ja Media, ni akwa lutwe ni miata a tujita, ni tujita a mu yifuchi yeswe muze akuyula.

²⁹ Hashi kuhananyiki ni kunyikumuka mumu Mwene Zambi kanalulika kupwisa Babilonia puya, kuze niumwe kechi kutwama ko.

³⁰ Tujita twa Babilonia haalitwamina kwasa jita, mumu te keeshi nawa ni hamu, haabwa ngwe mapwo. Yajilo ya limbo haayimakwona, mazuwo kaanalekwoka kahia.

³¹ Tunganda kaanalikaula ni kwambulwila mwanangana wa Babilonia ngwo, limbo hiliabuzuka heswe.

³² Akwa kole haatambula yau, hoocha ye yipanga. Tujita twa Babilonia kaanazazata ni mwongo.

³³ Susumuku maalimbwila hashi ni kwaliataliata ngwe mbuto ku chizungwilo. Yami Mwene Zambi Mukwa Ndundo Jeswe, Zambi ya Israele, nachamba.”

³⁴ Mwanangana wa Babilonia hanabatula Yerusaleme, hanamuli. Hananu limbo ngwe yuma ya mu mulondo; hanaliminya ngwe ngongo. Hanatambula yize anazange, hanambila yize yasala ho.

³⁵ Akwa Zione ambe ngwo: “Babilonia kanahi mumu ha upupilo uze hanatulingi!” Akwa Yerusaleme ambe ngwo: “Babilonia amone lamba mumu ha lize atumwesene yetu!”

Mwene Zambi makwasa Aisraele

³⁶ Chenacho Mwene Zambi anambila akwa Yerusaleme ngwenyi: “Mungunuhakwila, mungufwetesa akwa kole jenu mumu chize haananulingi. Mungumisa yito ya lwiji wa Babilonia ni ana jenyi eswe.

³⁷ Chifuchi chino muchibwa mulumba wa kwenyeka kuze mukutwama tushitu a mu yambu. Mukubwa kole ni mwongo ha kuchimona; niumwe kechi kutwama mo nawa.

³⁸ Ababilonia eswe kaanabwozo ngwe tambwe, kaanakenana ngwe mievu a tambwe.

³⁹ Kaali ni lwahu lwa yakulia, nyi? Mungwalulikila chimwe chiteleka ni kwazengesa ni uwahililo, mba maaya tulo. Keechi kuhinduka nawa.

⁴⁰ Mungwatwala ku chishihilo, ngwe ana mapanga, ni pembe, ni kuji a mapanga. Yami Mwene Zambi nachamba.”

Lamba lia Babilone

⁴¹ Mwene Zambi kanambe hakutwala ku Babilone ngwenyi: “Limbo lize akwa hashi eswe achichimiekene haalitambula! Mavungu eswe kaakulishimwoka ha kulimona!

⁴² Kalunga lwiji hazala, hafuka Babilone ni mikanya yenyi.

⁴³ Yihunda yenyi hiyabiha, hiyabwa puya yamokomoko, kuze niumwe kahashile kutwama ko chibwe kwendangana ko.

⁴⁴ Bele, mwe zambi ya Ababilonia, mungumumwesa lamba. Yuma yize hanabubu mu jita, mayihilwisa. Mavungu hikeechi kumuwayila nawa. “Yipanga ya Babilone hiyabuzuka.

⁴⁵ “Yenu Aisraele, chinenu ko! Chinenu ha kulilamwina ku utenu wami.

⁴⁶ Kanda nulekumuka hanji kwivwa woma ha ndundumwino yize munwivwa. Mwaka weswe wakubwa ni sango jeka, sango ja upupilo mu chifuchi, ni ja umwe mwanangana yoze unase jita ni mukwo.

⁴⁷ Kashika tangwa kulineza lize mungubalwola mahamba ja Babilonia. Atu eswe mu chifuchi sonyi meevwa, eswe maashiha.

⁴⁸ Eswe waze ali hashi ni lilu maakololoka ni chiseke muze Babilonia malimbuka, muze moonona kuli atu a ku chifuchi cha ku norde.

⁴⁹ Ababilonia haanashihi atu anji hashi heswe. Haashiha nawa Aisraele anji, kashika haliabwila Ababilonia chaatamba kufwa nawa. Yami Mwene Zambi nachamba.”

Liji lia Mwene Zambi kuli Aisraele mu Babilonia

⁵⁰ Mwene Zambi yambila atu jenyi Aisraele mu chifuchi cha Babilonia ngwenyi: “Hinwachina kufwa! Haliabwila yeenu! Kanda nushimbula! Chibwe ku mahienu kusuku, ngunyongenu yami, Mwene Zambi, iwulukenu Yerusaleme.

⁵¹ Nunambe ngwenu: ‘Haanatulelesa, tunevu sonyi. Tuli ni mulekeleke mumu yilambala haanatambula yibatulo ya chijila mu zuwo lia Zambi.’

⁵² Kashika, yami ngunambe ngwami, tangwa kulineza lize mungubalwola mahamba ja Ababilonia, ni waze haalemana kumaateta mu chifuchi cheswe.

⁵³ Chibwe Babilone mazezuka kwilu ni kutunga ko mazuwo akukoleka, hindu mungutuma ko atu ni kumubuzula. Yami Mwene Zambi nachamba.”

Kwenyeka cha Babilone

⁵⁴ Mwene Zambi kanambe ngwenyi: “Banjikenu liji lia kuteta mu Babilone atu kaanalili mbimbi mumu ha kwenyeka cha chifuchi.

⁵⁵ Ngunenyeka Babilone, ni kumuholesa kuluu. Liji lia tujita linahiohio ngwe miavu ya meya, kaanase jita ni milolo.

⁵⁶ Heeza ni kwenyeka Babilone; tujita twenyi haakwata funge, mata jo a manana haamakwoka. Nguli Zambi yoze wakumwesa yingulungulu lamba, Babilone mungumulinga ngwe chize chinalite.

⁵⁷ Akwa kuyula jenyi mungwazengesa, akwa mana, ni miata, ni tujita. Kumaaya tulo keechi kuhinduka nawa. Yami mwanangana nachamba, nguli Mwene Zambi Mukwa Ndundo Jeswe.

⁵⁸ Yipanga ya Babilone mukwa tachi kumayibuzula, ni yajilo yenyi yisuku kumaayocha. Milimo ya mavungu muyibwa yamokomoko; yitanga yo ya tachi muyilekwoka kahia. Yami Mwene Zambi Mukwa Ndundo Jeswe nachamba.”

Maliji ja Jeremia kuli Ababilonia

⁵⁹ Ha mwaka wa muchiwana wa kuyula cha Zedekia mwanangana wa Yuda, Seraya mwana wa Neria mujikulu wa Maseya kavumbi ka mwanangana Zedekia yaya hamwe nenyi ku chifuchi cha Babilonia. Te hinasoneka kulu mukanda wa kuya nawo.

⁶⁰ Yingusoneka mu mukanda yuma yikalu yeswe yize muyikeza ku Babilonia, ni yuma yikwo yeka ni yeka yakutwala ku Babilonia.

⁶¹ Yingulweza Seraya ngwami: “Muze hiwaheta ku Babilone, ukatanga ku meso ja atu eswe yuma yize hinasoneka.

⁶² Mba muulemba ngwe: ‘Mwene Zambi, hiunambe ngwe muwenyeka muma muno, kumuchi kusala Chuma nichimwe cha mwono, chibwe mutu chibwe kashitu. Muchibwa puya ndoo ku miaka yeswe.’

⁶³ Yena Seraya, muze hiwamanununa kutangila atu mukanda uno, mba muukasa ku liwe ni kuumbila mu lwiji Ufrateze.

⁶⁴ Muwamba ngwe: ‘Chenacho muchibwa hali Babilonia, kumakashimbama, kechi katutuka nawa nichimwe, mumu ha kwenyeka chize Mwene Zambi maneha ho.’ ” Maliji ja Jeremia kaanasulila hano.