Jeremia 50 - Mukanda Wa Zambi 1970

¹ Mwene Zambi yahanjika hakutwala ku limbo lia Babilone ni atu jalio ngwenyi:

² “Alweze akwa vungu sango jaha! Jambujole! Lweza chinyingi, wambujole sango! Kanda ujisweka! Babilone halimbuka! Marduke zambi yenyi kanatatajala! Mahamba ja Babilone heevwa sonyi, tuponya twenyi haawonda!

³ “Limwe vungu lia ku norde kumeeza ni kwasa jita ni Babilonia kumaalipwisa puya. Atu ni tushitu kumaachina, niumwe kechi kutwama ko.”

Kuhiluka cha Aisraele

⁴ Mwene Zambi kanambe ngwenyi: “Muze tangwa lize hiliaheta, Aisraele ni Ayuda kumaakeza ni kulila, nikungufupa, yami Zambi yo.

⁵ Kumaakahula jila ya Zione mba maakatalikisa ku kanda yize. Maakakolesa Usendo wa miaka yeswe ni yami, keechi kaushiha nawa nichimwe.

⁶ “Atu jami kaali ngwe mapanga waze tufunga haatokesa ha milundu. Haanalihiji ngwe mapanga waze anakatuka ku mulundu umwe ni kuya ku mulundu ukwo. Haanavulama ku mahio.

⁷ Eswe waze anaamono, kaanalimika no. Akwa kole jo kaanambe ngwo: ‘Haanavulumuna Mwene Zambi, kashika yeswe yize tunaalingi hi yibi ko. Tushakulu two te kaakujikijila hali Mwene Zambi, ni ayo te chaatamba kujikijila hali iye nawa.’

⁸ “Yenu Aisraele, Chinenu, nukatuke ku Babilonia! Katukenu mu chifuchi! Bwenu atangu kukatuka!

⁹ Munguvundula mbunga ya mavungu a tachi a ku norde hanga ase jita ni Babilonia. Kumaalilonga mu jita ni kulimika ni akwa chifuchi ni kutambula che chifuchi. Kaali mayanga a mana, kaakwasa mivwi ni kutondekeza, kupiya ka.

¹⁰ Babilonia maamububa, waze maamububa kumaanda yuma yeswe yize anazange. Yami, Mwene Zambi, nachamba.”

Akwa kole maakumba akwa Babilonia

¹¹ Mwene Zambi kanambe ngwenyi: “Yenu akwa Babilonia, hinunabubu vungu liami. Nunawahilila ni kulikwiza, nuli ngwe chihwo cha ngombe yoze unazungula mbuto, hanji ngwe kavwalu yoze unalihembula.

¹² Alioze limbo lienu linene kumulikeha, mulivwa sonyi. Babilonia kumabwa mulelu kuhiana mavungu eswe; kumabwa puya yamokomoko.

¹³ Mumu ha utenu wami niumwe kechi katwama nawa mu Babilone; kumaalienyeka, eswe waze maabalika ko maalisoza ni kulishimwoka.

¹⁴ “Akwa mata akwasa, katukenu nululike jita ni akwa limbo lia Babilone, nuliseleke. Mwasenu mivwi yenu yeswe, mumu haananguvulumuna yami Mwene Zambi.

¹⁵ Twenu milolo ya jita ha kujingilika lie limbo! Haliabwila akwa Babilone haazeya. Yipanga ya lie limbo hiyabuzuka. Mungukala atu jami kuli akwa Babilonia. Kashika akuwisenu, alingenu ngwe chize ayo alingile akwo.

¹⁶ Kanda nutayiza atu kukuwa mbuto mu chifuchi chize hanji kubatula mbuto. Yilambala eswe waze atwama ko meevwa woma wa jita yize, mba maahilwoka ku mahio.”

Kuhiluka cha Aisraele

¹⁷ Mwene Zambi kanambe ngwenyi: “Aisraele kaali ngwe mapanga, waze haazomba ni haamwanga kuli tambwe. Hatangu, mwanangana wa Asuria yasa no jita. Mba mwanangana Nebukanezore wa Babilonia yabolotota yifwaha yo.

¹⁸ Ha chino, yami Mwene Zambi Mukwa Ndundo Jeswe, Zambi ya Israele, mungumwesa lamba mwanangana Nebukanezore ni che chifuchi chenyi, ngwe chize namwesene lamba mwanangana wa Asuria.

¹⁹ Mungukahilwisa Aisraele mu chifuchi cho. Kumaakalia yakulia ya ku mulundu wa Karmele ni ya mu chifuchi cha Bashane. Kumaakalia yeswe yize anazange ya mu yifuchi ya Efraime ni Gileade.

²⁰ Muze tangwa lize mulikeza, mu Israele keechi kawana mo nawa shili niyimwe, chibwe mu Yuda keechi kawana mo ungulungulu, mumu waze haasala ni mwono mungwakonekena. Yami Mwene Zambi nachamba.”

Mwene Zambi mabatwila Ababilonia

²¹ Mwene Zambi kanambe ngwenyi: “Asenu jita ni akwa yifuchi ya Merataime ni Pekode. Ashihenu, nwanongese. Lingenu yuma yeswe yize ngunanwambe. Yami Mwene Zambi nachamba.

²² Zungo lia jita kaanalivu mu chifuchi, kwonona chinene chili ko.

²³ Ababilonia haanenyeka hashi heswe ni mweto, alioze haliabwila mweto uze haaubatwola! Atu eswe kaanalishimwoka ha yuma yize hiyabwa mu chifuchi.

²⁴ Yena Babilonia, te wakwasa jita ni yami, alioze hiwafwa mu muheto wami, chibwe kuwaunyingikine.

²⁵ Hingunazulula muma muze te nasweka yikungo yami, hinayituhwisa mo ni ufwatulo wami, mumu yami Mwene Zambi Mukwa Ndundo Jeswe, nguli ni milimo ya kulinga mu chifuchi cha Babilonia.

²⁶ Asenu no jita ku kanda jeswe, mwangenu machila jenyi! Mbuto yize hinwamwanga yilumbikenu milumba! Enyekenu chifuchi cheswe! Kanda nuhichika mo Chuma nichimwe!

²⁷ Shihenu tujita two eswe! Ababilonia, lamba lio, tangwa lio lia lamba hiliakundama!”

²⁸ (Akwa kuchina anakatuka ku Babilonia, kaaneza ku Zione, kaanambulula chize Mwene Zambi, Zambi yetu hakala yibi yize Ababilonia haanalingi ku zuwo lia Zambi.)

²⁹ “Lwezenu akwa kwasa ase jita ni akwa Babilone. Tumenu eswe waze anyingika kwasa jita ni mata a kwasa. Selekenu limbo, niumwe kanda achina. Muhilwishilenu yeswe yize hanalingi, mulingenu ngwe chize hanalingi akwo, mumu mu kulengumuka chenyi hanalimiki ni yami, Zambi Munangi wa Aisraele.

³⁰ Kashika akweze jenyi maakafwila mu majila a mu limbo, tujita twenyi kumoonona ha tangwa lize. Yami Mwene Zambi nachamba.

³¹ “Yena Babilonia, wakulengumuka kuhiana. Kashika yami Mwene Zambi Mukwa Ndundo Jeswe ngunalimika ni yena! Tangwa hiliakundama lia kukumwesa lamba.

³² Akwa kulengumuka kumaatalinga ni kulimbuka, niumwe kechi kumukwasa. Limbo lienu kumunguliocha, yuma yamo yeswe kumungukayenyeka.”

³³ Mwene Zambi Mukwa Ndundo Jeswe kanambe ngwenyi: “Aisraele ni Ayuda kaanaabinjisa. Eswe waze aakumbe, kaanaakakaminya, kaasolo kweecha aye.

³⁴ Alioze yoze makaakula kali ni tachi kuhiana, jina lienyi Mwene Zambi Mukwa Ndundo Jeswe. Mwenawo mabatula milonga yo ni kuneha uhwimino hashi, alioze makamwesa Ababilonia lamba.”

³⁵ Mwene Zambi kanambe ngwenyi: “Babilonia afwe kwenyi! Atu jenyi afwe kwo! Ni e miata jenyi, ni akwa mana jenyi.

³⁶ Akwa munanyi a mahuza afwe kwo, kaali yihepuke! Tujita twenyi afwe kwo, mwongo anevu!

³⁷ Shihenu tuvwalu twenyi, enyekenu matemba jenyi! Shihenu tujita twenyi waze akambile, keeshi tachi! Bubenu ubite wo; nuumbate!

³⁸ Changa chize ha chifuchi cho, chumise njiji jo. Chifuchi cha Babilonia chili ni mahamba waze akuvwisa mwongo waze haapwisa atu jacho yihepuke.

³⁹ “Kashika limbo lia Babilone maakalizomba kuli mwiku ubi ni wa luchisa, ni tujila a luchisa. Atu niamwe keechi kutwama mo nawa, chibwe ku miaka yize muyiza ho.

⁴⁰ Ngwe chize enyekene membo ja Sodome ni Gomora hamwe ni yihunda yize te yinasulangana ko, Chenacho nawa muchibwa ni Babilone. Niumwe kechi katwama mo nawa. Yami Mwene Zambi nachamba.

⁴¹ “Atu kaaneza a ku chifuchi cha ku norde, vungu lia tachi lia kusuku; mianangana anji analulika jita.

⁴² Kaanambata mata jo akwasa, ni mikwale; kaali yiswii, keeshi keke. Muze akwendela ha tuvwalu two, lushindo wo kali ngwe lundunjila wa kalunga lwiji. Haalulika kulu kwasa jita ni Ababilonia.

⁴³ Muze mwanangana wa Babilonia hevwa sango jize, ni mwe mu moko kekee. Kanevu yikola ngwe pwo yoze unafumbajala, kanalifwichi.

⁴⁴ “Ngwe chize tambwe akutuhuka mu mushitu ku mbumbulu ya Yordau nikuya kuze akulishila yimuna, yami Mwene Zambi, mungwiza ni kuhanga Ababilonia susumuku mu limbo lio. Mba mutu yoze mungukatongola makayula lie vungu. Iya walifwa ni yami? Iya mahamuka ha kulimika ni yami? Mukwa kuyula iya mangulituna?

⁴⁵ Banjikenu ku manyonga jami ha kulimika ni akwa Babilone ni chize ngunambe kulinga ni akwa limbo lize. Chibwe ana jo kumaambulumuna, atu eswe meevwa mwongo.

⁴⁶ Muze Babilone malimbuka, zungo linji mulibwa ko, hashi heswe muhanyika, kuteta cho cha mwongo kumaachivwa kuli mavungu akwo.”