Jeremia 5 - Mukanda Wa Zambi 1970

Milonga ya akwa Yerusaleme

¹ Yenu akwa Yerusaleme, achizombokenu mu majila jenu! Achitalenu sali ni sali! Limwenenu yenwene! Talenu mu yitanda! Munuhasa kumona umwe mutu yoze unalingi chize chinalite, yoze uneseka kubwa mukwa umwenemwene, nyi? Nyi munuhasa kumumona, mba Mwene Zambi makonekena Yerusaleme.

² Chibwe nwakulishinga ni jina lia Mwene Zambi, hindu nunalishingi ni mahuza.

³ Mwene Zambi kakufupa umwenemwene. Hananulambe, hindu kunwakanyamine; hanuwonda, hindu kunusolo kulilongesa. Nwabwile akwa pami, te kunusolo kwecha shili yenu.

⁴ Mba yingunyonga ngwami: “Wano kaali lume yiswale, keeshi mana. Kaali kwo yihepuke, kaanyingikine jila ya Zambi yo, ni Shimbi jenyi.

⁵ Munguya kuli akwa kuyula, ni kuhanjeka no. Kota kaananyingika jila ya Zambi yo, ni Shimbi jenyi.” Alioze ayo eswe haanalitunu chiyulo cha Mwene Zambi, kaasolo kumwononokena.

⁶ Kashika maakaashiha kuli tambwe a mu usaki, kumaakaapapujola kuli tungunga a mu puya, kolwama kumaakaajikinyina mu yihunda yo. Atu wano, nyi atuhwoka, kumaakaapapujola yihanda yihanda, mumu milonga yo hiyoka, yisuho yinji haanehuka Zambi.

⁷ Mwene Zambi kanahula ngwenyi: “Mumu yika Changutamba kukonekena atu jami milonga yo? Haanangwehuka, haanalishingi ni waze hi mazambi ko. Nalishile atu jami ndoo ni chize haakuta, alioze yaalingalinga utanji, nikuhwisa matangwa jo ni yitanji.

⁸ Te kaali ngwe makuji a tuvwalu a maji anji waze haalisa, waze akuzanga kubwa ni yihwo. Mutu mweswe te kali ni usolo wa pwo lia mwenyembo wenyi.

⁹ Ngwe kuchi mungwecha kwamwesa lamba ha yuma yino ni kukala milonga yibwahaha ya vungu lino?

¹⁰ Mungutuma akwa kole akapakule mitondo ya vinyu ya atu jami, hindu kwoonona liakulu ka. Mungukaalweza akasalule mitondo yayo, mumu hi mitango ya yami ko.

¹¹ Aisraele ni Ayuda haangukwachila mafwefwe, haangulituna liakulu Yami Mwene Zambi nachamba.”

Mwene Zambi yalituna Aisraele

¹² Aisraele haanalitunu Zambi nikwamba ngwo: “Zambi kechi kulinga nichimwe. Kutuchi kumona lamba, chibwe jita hanji zala.”

^13-14 Yaamba nawa ngwo: “Akwa munanyi kaali ngwe fuji wika, keeshi ni maliji a kuli Mwene Zambi.” Mwene Zambi Mukwa Ndundo Jeswe yangwamba ngwenyi: “Jeremia, muze atu wano haahanjika yuma yino, mungusa maliji jami mu kanwa lie ngwe kahia. Atu kumaabwa ngwe kunyi, ni kahia mukalengenya hali ayo.”

¹⁵ Yenu Aisraele, Mwene Zambi haneha limwe vungu lia kusuku ase nenu jita. Lili vungu likulu ni lia tachi. Kunwanyingikine liji lio.

¹⁶ Akwa mata a kwasa, kaali tujita a tachi, kaakushiha keeshi keke.

¹⁷ Kumaakalia mbuto jenu ni yakulia yenu; kumaakashiha ana jenu a malunga ni a mapwo; maakashiha yimuna yenu ni kupakwola mitondo yenu ya vinyu ni mikuyu. Kumaakabuba membo jenu akukoleka hali waze nwakujikijila.

¹⁸ Mwene Zambi kanambe ngwenyi: “Chibwe chocho, ha matangwa waze chichi kwonona atu jami liakulu.

¹⁹ Muze atu maahula chikuma chize nalingilile yuma yino yeswe, yena Jeremia, alweze ngwe: ‘Hinunehuka Mwene Zambi ni kulingila mazambi a tundaka mu chifuchi chenu, Chenacho nawa munukalingila yilambala mu chifuchi cho?’ ”

Zambi yakanyamisa atu jenyi

²⁰ Mwene Zambi kanambe ngwenyi: “Lweza vungu lia Yakoba, lweza Yuda:

²¹ kanyamenu, yenu yihepuke ni yizuzuke. Nuli ni meso, alioze kunushi kumona; nuli ni matwi, alioze kunushi kwivwa.

²² Yami nguli Mwene Zambi, mba kuchi kunushi kunguvwila woma? Mumu yika kunushi kuchikima ku meso jami? Hingunase masekeseke ngwe njiza ya kalunga lwiji, njiza yize kalunga lwiji kahashile kubalika. Kalunga lwiji mahasa kubinda, alioze meya keechi kahiana. Miavu muyihasa kulifwita, alioze kuyichi kubalika.

²³ Alioze yenu atu! Nuli akwa pami ni yihulia; hinunapianguka, hinunangwehuka.

²⁴ Kunwanyongene ko kungulemesa nichimwe, chibwe hinatuma vula musazu ni wa mubatuko, ni hingunanwehe changa cha kuhela mbuto mwaka ha mwaka.

²⁵ Alioze milonga yenu hiyanumina yino yeswe.

²⁶ “Yingulungulu kaatwama mukachi ka atu jami; kaakujikinyina ngwe atu waze anatela tujila Wanda, alioze kaanate miheto yo yakwoza atu.

²⁷ Ngwe chize yanga akuzalisa zuwo lienyi ni tujila, no haanazalisa mazuwo jo ni yuma yakububa. Kashika haanabu akwa kutakama ni pichi,

²⁸ kashika haatohwa ni haabema. Yitanga yo yili lume yibi. Keeshi kulingila ana a shiwa yibema, chibwe kubatwila akwa lamba ni ululi.

²⁹ “Alioze yami Mwene Zambi, mungukaamwesa lamba mumu ha yuma yino; mungukaakala kuli vungu lino.

³⁰ Atu kaakwivwa mwongo ni kaakulishimwoka ha yuma yize hiyabwa mu chifuchi:

³¹ akwa munanyi kaakuhanjika lume mahuza; mahako kaakuyula ngwe chize akwalweza kuli akwa munanyi; ni atu jami kaakuchitayiza. Alioze kuchi maakalinga ku songo?”