Jeremia 49 - Mukanda Wa Zambi 1970

Mwene Zambi mabatwila Aamone

¹ Mwene Zambi yamba hakutwala kuli Aamone ngwenyi: “Malunga ja Aisraele kuli ali? Kukushi niumwe yoze unahamika kama mumu ha chifuchi cho, nyi? Mumu yika haatayiza atu waze akuwayila zambi Milkome kutambula chifuchi cha vungu lia Gade ni kutwama mo?

² Alioze tangwa kulineza lize munguvwisa akwa limbo lia Raba zungo lia jita. Akwa kole maahichika lie limbo liakwenyeka ni yihunda yalio yakwocha kahia. Mba Aisraele maatambula chifuchi cho kuli waze achichishile.

³ Yenu akwa limbo lia Heshbone, lilenu mbimbi! Limbo lia Ayi haalienyeka! Yenu mapwo ja Raba, lilenu! Zalenu mianji, nulile. Chinenu mu kuyambashana chenu. Zambi yenu Milkome maamutwala mu undungo, hamwe ni mahako ni mianangana jenyi.

⁴ Yenu akwa mafwefwe, mumu yika nwakulichichimieka? Tachi jenu hijahwa. Mumu yika nunajikijila ha tachi jenu nikwamba ngwenu, niumwe kechi kwasa jita ni yetu?

⁵ Mungunukokela mwongo sali ni sali. Yenu eswe kumunuchina. Mutu mweswe makachina ni kulilamwina. Niumwe wakuhi makungulula tujita nawa.

⁶ “Alioze kulutwe mungukayukisa Aamone nawa. Yami Mwene Zambi nachamba.”

Mwene Zambi mabatwila Aedome

⁷ Mwene Zambi Mukwa Ndundo Jeswe yamba hakutwala kuli Aedome ngwenyi: “Kuma akwa limbo lia Temane haanatokesa mana jo, nyi? Kuma yikanyame keeshi nawa ni chiyulo, nyi? Mana jo haahwa, nyi?

⁸ Yenu akwa limbo lia Dedane, katukenu nuchine! Swamenu! Vungu lia Esau kumungulionona, mumu tangwa hiliaheta lize mungwamwesa lamba.

⁹ Muze atu akuhela vinyu, kaakuhichika ko yimwe, ni muze eji akwiza ha ufuku, kaakwiya lume yize anazange.

¹⁰ Alioze yami hinamwanga vungu lia Esau liakulu. Hinamona haze akuswama, hi keechi kuhasa kuswama nawa. Aedome eswe hoonona. Kukwasalile niumwe.

¹¹ Ngukunjikenu ana jenu a shiwa, mungwalela kanawa. Tuliwa jenu ase mbunge hali yami.

¹² “Nyi atu waze kaatelele kumwesa lamba haanwa musenge wa lamba, kuma nunanyongo ngwenu, chichi kunumwesa lamba, nyi? Ka, chanutamba kunnwa!

¹³ Yami mwene hinalishinga ngwami, limbo lia Bozra mulialumuka homa ha mwongo, mulibwa puya. Atu kumaalikekuna ni kulishinga ni jina lialio. Yihunda yeswe yakusulangana kumaayenyeka ku miaka yeswe. Yami Mwene Zambi nachamba.”

¹⁴ Yingwamba ngwami: “Yenu Aedome, hinwevwa maliji kuli Mwene Zambi. Hatuma kanganda ni kulweza akwa mavungu akungulule tujita two hanga alilulike kwasa nenu jita.

¹⁵ Mwene Zambi kumanupwisa amokomoko, atu kumaanusaula.

¹⁶ Kulengumuka chenu hichanwonga. Niumwe keshi kunuvwila woma ngwe chize nunanyongo. Kunwatwama mu yimawe, ha milundu yisuku. Alioze chibwe nuli helu kuhiana ngwe tela, Mwene Zambi manuhulumuna hashi. Mwene Zambi wachamba.”

¹⁷ Mwene Zambi yamba ngwenyi: “Kwonona chize muchiza hali Edome muchibwa chikalu; mweswawo mabalika ko malishimwoka ni kwivwa mwongo.

¹⁸ Ngwe chize membo ja Sodome ni Gomora ni yihunda yize te yinasulangana enyekene, Chenacho muchikabwa mu Edome. Niumwe kechi katwama mo nawa. Yami Mwene Zambi nachamba.

¹⁹ Ngwe chize tambwe unatuhuka mu mushitu ku mbumbulu ya Yordau nikuya kuze akulishila yimuna, Chenacho nawa munguhanga Aedome susumuku mu chifuchi cho. Mba mwata yoze mungukatongola makayula lie vungu. Iya walifwa ni yami? Iya mahamuka ha kulimika ni yami? Mukwa kuyula iya mangulituna?

²⁰ Banjikenu chize mungulimika ni Aedome, ni chize ngunambe kulinga akwa limbo lia Temane. Chibwe ana jo maambulula, atu eswe meevwa mwongo.

²¹ Muze Edome malimbuka, zungo linji mulibwa ko, hashi heswe muhanyika. Kuteta cho cha mwongo kumaachivwa ndoo ku kalunga lwiji Akaba.

²² Akwa kole kumaasa jita ni Bozra ngwe chize tela akuhulumuka ni mapulwa akuzaza. Ha tangwa lize tujita twa Edome meevwa mwongo ngwe pwo yoze unafumbajala.”

Mwene Zambi mabatwila akwa Damasku

²³ Mwene Zambi kanambe hakutwala kuli akwa limbo lia Damasku ngwenyi: “Akwa membo ja Hamate ni Arpade kaanalibikala, kaanevu woma mumu ha sango jibi. Kaanabinji ngwe kalunga lwiji, keshi ni uhwimino.

²⁴ Akwa Damasku haalekumuka, haachina, haakwachika mwongo. Kaali mu lamba ni mu yinyengo ngwe pwo yoze unafumbajala ha kusema.

²⁵ Limbo lia lufuma lize te liabwile ni chiseke hiliabwa puya yamokomoko.

²⁶ Ha tangwa lize anenyi a malunga kumaakashihila mu majila a mu limbo, tujita twenyi eswe kumaakoonona.

²⁷ Mungukocha yipanga ya Damasku ni mazuwo ja mwanangana Benhadade. Yami Mwene Zambi Mukwa Ndundo Jeswe nachamba.”

Mwene Zambi mabatwila vungu lia Kedare ni limbo lia Hazore

²⁸ Hakutwala ku vungu lia Kedare ni akwa yifuchi yize te akuyula akwa Hazore, yize akumbile mwanangana Nebukanezore wa chifuchi cha Babilonia, Mwene Zambi kanambe ngwenyi: “Asenu jita ni akwa Kedare, shihenu vungu lia ku chivumbuko!

²⁹ Bubenu mazuwo jo a makubu, ni yimuna yo, ni yikalakala, ni yuma yeswe ya mu mazuwo jo. Nwanda tumelu two, lwezenu atu ngwenu: ‘Mwongo hiwanujingilika!’

³⁰ “Yenu akwa Hazore, yami Mwene Zambi, ngunanulimwisa nuchine, nuye kusuku, nuswame. Mwanangana Nebukanezore wa ku Babilonia hanutwama punga, kanambe ngwenyi:

³¹ ‘Tuhukenu! Twase jita ni atu waze atwama kanawa ni uhwimino! Limbo lio kulishi yajilochibwe yikungo ya kukasa nayo ku yikolo, kulishi tufunga.’

³² “Bubenu tumelu two ni yimuna yo! Atu waze akukamba kambu jo mungwamwangina sali ni sali, mungwamwesa lamba lize linakatuka ku kanda jeswe.

³³ Hazore maalipwisa puya ku miaka yeswe, muchibwa lume muma mwakutwama mikuza. Mutu niumwe kechi katwama mo nawa. Yami Mwene Zambi nachamba.”

Mwene Zambi mabatwila Aelame

³⁴ Ha kabutu ka kuyula cha mwanangana Zedekia mu Yuda, Mwene Zambi Mukwa Ndundo Jeswe yanguhanjika hakutwala ku chifuchi cha Elame.

³⁵ Ngwenyi: “Mungushiha eswe waze akwasa jita ni mata a manana, waze haanapwisa Elame chifuchi cha tachi.

³⁶ Mungutuma fuji yize yinakatuka ku kanda jeswe. Mungumwangina atu jamo kweswe, ndoo haachinyina mu yifuchi yeswe.

³⁷ Atu ja Elame mungweevwisa mwongo kuli akwa kole jo, waze anambe kwaashiha. Mu utenu wami mungwatumina tujita ni kulimika no ndoo hanongesa eswe.

³⁸ Mungunongesa mianangana jo ni miata jo, ni kusako yitwamo yami.

³⁹ Alioze kulutwe mungukayukisa nawa akwa Elame. Yami Mwene Zambi nachamba.”