Jeremia 48 - Mukanda Wa Zambi 1970

Kwenyeka cha Moabe

¹ Mwene Zambi Mukwa Ndundo Jeswe yamba kuli Amoabe ngwenyi: “Akwa mulundu wa Nebo evwile kama keke, limbo lio haalienyeka! Kiriataime haamutambula, yipanga yenyi yakukoleka haayibuzula, atu jenyi sonyi anevu.

² Uhenya wa Moabe hiwahwa. Akwa kole haatambula limbo lia Heshbone; kaanatwama punga ha kwonona vungu lia Moabe. Akwa limbo lia Chizaluke kumaakahola kuluu; tujita kumaakalimika no.

³ Akwa limbo lia Horonaime kaanakololoka ngwo: ‘Kwonona! Kwenyeka!’

⁴ “Moabe haamwonona; banjika ana chize analili,

⁵ Ivwa kuteta cho mu jila ya kuya ku limbo lia Luhite, kuteta cha chinyengo mu jila ya ku mwanda ku Horonaime.

⁶ Kaanambe ngwo: ‘Lipupwisenu nulilamwine! Chinenu ngwe chimbulu wa mu yambu!’

⁷ “Amoabe, nwajikijilile ha tachi jenu ni ha ubite wenu, alioze haliabwila ni yenu nawa maanukumba; zambi yenu Chemoshe maamutwala mu undungo, hamwe ni mianangana ni mahako jenyi.

⁸ Kukushi limbo nilimwe lize keechi kwenyeka; mingulunga ni ye yana maayenyeka. Yami Mwene Zambi nachamba.

⁹ Senu chinyingi ha fuka lia Moabe; kumaamwenyeka ha shimbu likepe. Membo jenyi kumeenyeka, kumuchi kutwama nawa mutu niumwe.”

¹⁰ (Kashingiwa mutu yoze keshi kulingila Mwene Zambi ni mbunge yenyi yeswe! Kashingiwa mutu yoze kechi kutomona katana kenyi ni kushiha!)

Kwenyeka cha membo ja Moabe

¹¹ Mwene Zambi yamba ngwenyi: “Moabe matangwa eswe kakutwama ni uhwimino, kanda achimutwala kama mu undungo. Moabe kali ngwe vinyu yize keshi kusunga ni kuyilongalonga mu milondo. Kuyema chenyi kuchalumukine, kuchasamukine nichimwe.

¹² “Kashika haliabwila, tangwa hilieza lize mungutuma atu hanga amwange Moabe ngwe chize atu akumwanga vinyu. Milondo yenyi muyikasala yamokomoko, maayibalwola.

¹³ Mba Amoabe meevwa sonyi ni mwe zambi yo Chemoshe, ngwe chize Aisraele evwile sonyi ni Betele, zambi yo yoze te akujikijila.

¹⁴ “Yenu malunga ja Moabe, kuchi nunalichichimieka ngwenu, tuli malunga, tujita amwenemwene waze akujikiza mu jita?

¹⁵ Membo ja Moabe heenyeka; akweze jamo abema kuhiana haashiha. Yami mwanangana, Mwene Zambi Mukwa Ndundo Jeswe, hinahanjika.

¹⁶ Kwenyeka cha Moabe chinakundama; kulifwila chenyi chineza fuji.

¹⁷ “Lilenu kama mumu ha vungu lize, yenu eswe waze nunanyingika lufuma wo. Ambenu ngwenu: ‘Tachi jenyi hijahwa; uhenya wenyi ni ndundo jenyi kuyishiko nawa.’

¹⁸ Yenu waze nwatwama mu limbo lia Dibone, katukenu ku Chihela chenu cha vumbi, twamenu hashi mu fufuta. Mukwa kwonona Moabe hano hwali, habuzula membo jenu akukoleka.

¹⁹ Yenu waze nwatama mu limbo lia Aroere, manenu mu jila nushimbwile; nuhule waze anabalika mu jila, nunyingike sango jize ali najo.

²⁰ Maakumbulula ngwo: ‘Moabe halimbuka, mulilenu kama; kali ni sonyi. Ambululenu kuli waze atwama ku lwiji Arnone, ngwenu, Moabe haamwenyeka!’

²¹ “Habatwila membo a ku tunda: Holone, ni Jaza, ni Mefate,

²² ni Dibone, ni Nebo, ni Bete Diblataime,

²³ ni Kiriataime, ni Betgamule, ni Betmeone,

²⁴ ni Keriote, ni Bozra. Ubatwilo hiweza ha membo eswe a Moabe, hali waze atwama kusuku ni hakamwihi.

²⁵ Lumbinga lwa Moabe haalubalwola; tachi jenyi hijahwa. Yami Mwene Zambi nachamba.”

Moabe kumamukehesa

²⁶ Mwene Zambi ngwenyi: “Moabe muzengesenu ni walwa, mumu hanalimika ni yami. Kumalangumuka mu yisajilo yenyi, atu kumaamuseha.

²⁷ Moabe unewuluka chize wahungumionene Aisraele, nyi? Waalingile ngwe waze haakwachika ni mbunga ya mihuza.

²⁸ “Yenu waze nwatwama muchifuchi cha Moabe, hichikenu membo jenu! Yeenu nutwame mu yimawe! Bwenu ngwe liembe yoze unatungu chaswa chenyi mu chivwenge.

²⁹ Amoabe kaakulengumuka kuhiana! Hinevwa chize akulengumuka, ni kulisuta, ni kulizelula; kaakulinyonga ayo ene.

³⁰ Yami Mwene Zambi ngunanyingika kulisuta cho. Kulifuza cho chili chamokomoko; yeswe yize akulinga kuyichi kulinduluka.

³¹ Kashika mungulila atu eswe a mu chifuchi cha Moabe ni limbo lia Kiri Herese.

³² Mungulila akwa limbo lia Sibma, kuhiana akwa limbo lia Jazere. Yenu akwa Sibma, nuli ngwe mutondo wa vinyu uze mitango yawo yinatande ndoo ku Jazere muze musali lia chitende cha Kufwa. Alioze haliabwila mihuko yenu yalwiza, ni vinyu yenu haayocha.

³³ Chiseke ni uwahililo haayichiza ku mavu a chinuno. Hinakanjisa vinyu ha kwima; mutu niumwe kechi kukama vinyu ni kukololoka ni chiseke.

³⁴ “Akwa membo ja Heshbone ni Eleale kaanatete; kuteta cho kaanachivu ndoo ku limbo lia Jahaze. Kaanachivu kuli akwa limbo lia Zoare, ndoo ni ku membo ja Horonaime ni Eglate Shelishia. Chibwe mwana lwiji Nimrime homa chau.

³⁵ Mungukanjisa Amoabe kulambula mazambi jo milambu ya kwocha ni ya yuma ya vumba libema. Yami Mwene Zambi nachamba.

³⁶ “Kashika ngunalili Moabe ni akwa limbo lia Kiri Herese, ngwe umwe yoze unembi mwaso ha lundembo, mumu yeswe yize abwile nayo hiyakuhi.

³⁷ Ayo eswe haatewula tuwewe, haakamba wevu wo. Haalilemieka ha moko jo, eswe haazala mianji.

³⁸ Ha mafulumba ja mazuwo eswe ja Amoabe ni ku makano ja majila eswe shina kulila mbimbi wika, mumu hinabalwola Amoabe ngwe mulondo uze niumwe keshi kuuzanga nawa.

³⁹ Moabe haamwenyeka! Lilenu mbimbi! Moabe haamuvwisa sonyi. Hamwenyeka. Mavungu eswe waze anamujingilika kaanamukekuna. Yami Mwene Zambi nachamba.”

Moabe kahashile kuchina

⁴⁰ Mwene Zambi halakenya ngwenyi, limwe vungu maakeza hali Amoabe ngwe chize tela akuhulumuka ni mapulwa akuzaza.

⁴¹ Yihunda ni membo akukoleka kumaakaakumba. Ha tangwa lize tujita twa Moabe maakevwa woma ngwe pwo yoze unafumbajala ha kusema.

⁴² Amoabe kumaakoonona hikeechi kabwa nawa vungu, mumu haangukatukila.

⁴³ Mwene Zambi ngwenyi, yenu Amoabe, mwongo, ni mawumbu, ni makambwila yinanushimbwila.

⁴⁴ Mutu yoze makeseka kuchina mwongo makaholokela mu mawumbu; yoze makachina mawumbu makafwa mu miheto, mumu Mwene Zambi hanatongola tangwa lia kwonona Amoabe.

⁴⁵ Akwa kuchina meeseka kuswama kama mu Heshbone, limbo lize mwanangana Sihone te akuyula, alioze maaliwana linalekwoka kahia. Kahia kanalekwoka ku njiza ni ku milundu yisuku ya akwa kuzanga jita, Amoabe.

⁴⁶ Vwilenu kama Amoabe keke! Atu waze te akuwayila zambi Chemoshe hoonona. Ana jo a malunga ni mapwo haatwala mu ufunge.

⁴⁷ Alioze kulutwe Mwene Zambi makayukisa nawa Amoabe. Yeswe yize Mwene Zambi ahanjikile muyikabwa hali Amoabe.