Jeremia 47 - Mukanda Wa Zambi 1970

Maliji ja Mwene Zambi hali Afilistia

¹ Shimbu te mwanangana wa Egiptu kanda achasa jita ni limbo lia Gaza, Mwene Zambi yanguhanjikisa hakutwala kuli Afilistia,

² ngwenyi: “Tala! Meya kaanakatuka ku norde, kaanapukumuka ngwe lwiji yoze hazala. Kumaafuka chifuchi cheswe ni yuma yeswe yize yilimo, ni membo ni e atu waze atwama mo. Atu kumaakakolojoka aakwase; akwa hashi heswe kumaakalila mbimbi.

³ Kumaakevwa lushindo wa tuvwalu, ni lundunjila wa matemba, atata keechi kumbata ana jo; kumaakalekumuka mu moko.

⁴ Tangwa lia kwonona Afilistia hilieza, lie tangwa lia kukanjisa atu waze akuzanga kukwasa Tiru ni Sidone. Yami, Mwene Zambi, mungukonona Afilistia, eswe waze akatukile ku mbumbulu ya hongo lia Krete.

⁵ Akwa Gaza kaali ni yinyengo yinji, akwa Ashkelone kaanaholo kuluu. Matangwa angahi Afilistia maalila?

⁶ Nunakolojoka ngwenu: ‘Mukwale wa Mwene Zambi! Ndoo mwiji muka muulitwamina kama? Hiluka mu chindalo che, twama mo, uhwime!’

⁷ Alioze ngwe kuchi muuhwima, muze hinawamba kulu ngwami, linga? Hinawamba wase jita ni Ashkelone, ni atu waze atwama ku mbumbulu ya kalunga lwiji.”