Jeremia 46 - Mukanda Wa Zambi 1970

Ababilonia yaakumba akwa Egiptu ku Karkemishi

¹ Mwene Zambi yanguhanjikisa hakutwala kuli mavungu,

² yabutula ni chifuchi cha Egiptu. Yahanjika hakutwala kuli tujita twa mwanangana Neko wa Egiptu, yoze akumbile kuli mwanangana wa chifuchi cha Babilonia ku limbo lia Karkemishi hehi ni lwiji Ufrateze ha mwaka wa muchiwana wa kuyula cha Jehoakime mwanangana wa Yuda ngwenyi:

³ “Miata ja tujita twa Egiptu kololokenu ngwenu: ‘Andenu kebwe jenu, yeenu ku jita!

⁴ Jichikenu tuvwalu yikaba, nwanyine! Longenu milongo, zalenu yifulu! Kalulenu makunga jenu! Lipakatenu yikungo ya jita!’ ”

⁵ Mwene Zambi ngwenyi: “Yika ngunamono? Kaanahiluka ni mwongo. Tujita two haalamba, haahiluka munyima; eswe kaali ni mwongo, kaanachina fuji kuhiana, kaasolo kutala kunyima.

⁶ Akwa tambu kaahashile kuchina; tujita kaahashile kwomboka. Ku lwiji Ufrateze ku norde, kaanatalinga ni kulimbwoka.

⁷ Iya yono unafutunuka ngwe Nile, ngwe lwiji unamwanga meya jenyi?

⁸ Kali Egiptu, unavwavumuka ngwe Nile, ngwe lwiji unatutumuna meya jenyi. Egiptu ngwenyi: ‘Mungusopwoka ngufuke hashi heswe; mungwenyeka membo ni kushiha atu waze atwama mo.

⁹ Shinjikenu tuvwalu aye, matemba alundumuke! Tumenu tujita: malunga a ku Sudane ni a ku Libia waze anambata kebwe, ni malunga a ku Lidia waze ananyingika kwasa.’ ”

¹⁰ Lino lili tangwa lia Mwene Zambi Mukwa Ndundo Jeswe: mba himakala milonga; musono kumamwesa lamba akwa kole jenyi. Mikwale yenyi muyaalia ndoo muyikuta, muyinwa manyinga jo ndoo pwila muyihwa. Musono Mwene Mukwa Ndundo Jeswe kanalambula milambu yenyi, ku lwiji Ufrateze ku norde.

¹¹ Yenu akwa Egiptu, yenu ku Gileade, nufupe yitumbo! Yitumbo yenu yeswe yili yamokomoko; kuyahashile kunuwuka.

¹² Mavungu heevwa hakutwala ku sonyi jenu; atu eswe heevwa kuteta chenu. Kajita umuwika kanatalikisa hali mukwo, mba eswe aali kaanalimbukila hashi.

Kwiza cha mwanangana Nebukanezore

¹³ Muze mwanangana Nebukanezore wa Babilonia ashile jita ni akwa Egiptu, Mwene Zambi yanguhanjikisa ngwenyi:

¹⁴ “Ambujolenu mu membo ja Egiptu, Migdole, ni Memfise, ni Tapane ngwenu: ‘Lulikenu jita; eswe munukafwa mu jita!

¹⁵ Mba zambi yenu Apise kuchi halimbuka? Mwene Zambi hamubuzwila hashi!’

¹⁶ Tujita twenu haatalinga, haalimbwoka; kaanalihanjekesa ngwo: ‘Tulipupwisenu! Tuyenu ku mahietu kuli atu jetu, tuchine mukwale wa akwa kole!’

¹⁷ “Tulukenu mwanangana wa Egiptu jina liaha, ‘Mukwa Kulimbambwila Wampkomoko Walilimwine Iye Mwene.’

¹⁸ Yami Mwene Zambi, Mukwa Ndundo Jeswe, nguli mwanangana. Nguli Zambi ya mwono. Ngwe chize Tabore kanahiana milundu yikwo ni Karmele kali musuku helu lia kalunga lwiji, chenacho makabwa tachi ja yoze makasa nenu jita.

¹⁹ Yenu akwa Egiptu, lilulikenu anutwale mu ufunge! Memfise muukalumuka puya, makamwenyeka, niumwe kechi katwama ko nawa.

²⁰ Egiptu kali ngwe chihwo cha ngombe mubema, yoze anasumu kuli chikefwe wa ku norde.

²¹ Chibwe tujita twenyi waze akambile, keeshi tachi, ngwe ana a ngombe waze machisemuka. Keeshi kwasa jita; kaanatewuluka, kaanachina, mumu tangwa lio lia lamba hiliaheta, tangwa lia kufwa cho.

²² Egiptu kaanachina hwaa ngwe kapela, muze tujita twa akwa kole jo kaanakundama. Kaakwasa no jita ni njimbu, ngwe atu waze anapakula mitondo,

²³ ni kupakula usaki unene. Malunga jo kaali anji, kuhasa kwalila ka: tujita two kaali anji kuhiana makumba.

²⁴ Akwa Egiptu heevwa sonyi: haakumba kuli atu a ku norde. Yami Mwene Zambi nachamba.”

²⁵ Mwene Zambi Mukwa Ndundo Jeswe, Zambi ya Israele, kanambe ngwenyi: “Mungumwesa lamba Amone, zambi ya mu limbo lia Tebese, hamwe ni Egiptu ni e mazambi jenyi ni e mianangana. Munguchiza mwanangana wa Egiptu ni waze eswe akumujikijila,

²⁶ ni kwakunjika mu moko ja waze anambe kwashiha, kuli mwanangana Nebukanezore wa ku Babilonia ni tujita twenyi. Alioze kulutwe atu maakatwama nawa mu Egiptu, ngwe chize abwile hatangu. Yami Mwene Zambi nachamba.”

Zambi kumakalamwina atu jenyi

²⁷ “Yenu atu jami, kanda nwivwa woma; yenu Aisraele, kanda nwivwa mwongo. Mungukanulamwina mu chifuchi kusuku, kuze nuli funge. Munukahiluka ku mahienu ni kubwa mu uhwimino; munukabwa ni sambukila, niumwe kechi kanuvwisa nawa woma.

²⁸ Mungukeza kuli yenu ni kunulamwina. Mungukonona mavungu eswe kuze nanumwanginyine, alioze yenu chichi kanwonona. Mungukanumwesa lamba, alioze hi linji ko. Yami Mwene Zambi nachamba.”