Jeremia 44 - Mukanda Wa Zambi 1970

Maliji a Mwene Zambi kuli Aisraele mu Egiptu

¹ Mwene Zambi yanguhanjikisa hakutwala kuli Aisraele eswe waze atwama mu Egiptu; mu membo ja Migdole, ni Tapane, ni Memfise, ni ku sude mu chifuchi.

² Mwene Zambi, Mukwa Ndundo Jeswe, Zambi ya Israele, kanambe ngwenyi: “Hinunamono yenwene chize nenyekene Yerusaleme ni membo eswe ja Yuda. Chibwe haliabwila kaali akwenyeka, niumwe keshimo,

³ mumu atu jamo alingile yibi, yaanguvwisa ufwatulo. Yaalambula milambu kuli mazambi eka, yaalingila mazambi waze chibwe yenu chibwe tushakulu twenu kanda awayila kama.

⁴ Nanutuminyine tuvumbi twami akwa munanyi, waze te akunulongesa ngwo, kuchatambile kulinga Chuma chino chibi chize nakuvutwokela.

⁵ Alioze yenu kunwabanjikile ko chibwe hakepe. Te kunusolo kwehuka yitanga yenu ya ungulungulu ya kulambula milambu kuli mazambi eka.

⁶ Mba mu utenu wami yingwocha Yerusaleme ni membo ja Yuda. Kaali akwenyeka ndoo ni musono.

⁷ “Kashika yami Mwene Zambi, Mukwa Ndundo Jeswe, Zambi ya Israele, ngunahula haliabwila ngwami, mumu yika nwalikokela Chuma chino chibi. Kuma nunazange yenu eswe kufwa: malunga, ni mapwo, ni twanuke, ni ana akemba, hanga niumwe kechi kusala mukachi kenu, nyi?

⁸ Mumu yika nunangwihi ni kukombelela mahamba ni kuwayila mazambi eka a muno mu Egiptu, muze nwatwama? Muze nunachilingi nunalionona yenwene, hanga mavungu eswe a hashi anuchoke ni ashingane ni jina lienu, nyi?

⁹ Kuma hinwavulama kwenu ungulungulu uze akwo mukachi kenu, ni tushakulu twenu, ni mianangana ni mapwo jo, ni yenu ni mapwo jenu nwalinga mu membo ja Yuda ni mu majila ja Yerusaleme, nyi?

¹⁰ Alioze ndoo ni musono kunusolo kulikehesa. Kunusolo kungulemesa chibwe kufunga Shimbi jeswe jize nanuhele yenu ni tushakulu twenu.

¹¹ “Kashika yami Mwene Zambi, Mukwa Ndundo Jeswe, Zambi ya Israele, mungulimika ni yenu ni kwenyeka chifuchi cheswe cha Yuda.

¹² Hakutwala kuli Ayuda waze haasala, haabatula kuya ku Egiptu, ni kutwama mo, mungukalinga chimwe Chuma hanga eswe akafwe. Eswe a kuli ayo, anene ni akepe, kumaakafwila mu Egiptu, chibwe mu jita, hanji ni zala. Atu maakalishimwoka ha kuchimona, maakaalelesa, maakashinga jina lienu.

¹³ Mungukamwesa lamba waze atwama mu Egiptu, ngwe chize hinamwesa akwa Yerusaleme lamba, ni jita, ni zala, ni musongo.

¹⁴ Niumwe wa kuli Ayuda waze haasala ni waze heeza ni kutwama mu Egiptu makasala ni mwono. Niumwe wa kuli ayo makahiluka ku chifuchi cha Yuda, ngwe chize ananyongo shina amwe waze makachina.”

¹⁵ Mba malunga eswe waze te anyingika ngwo, mapwo jo te kaakulambula milambu kuli mazambi eka, ni mapwo eswe waze te akumana ko, kuchinga ni Aisraele waze te atwama ku sude mu Egiptu, mbunga yinene, eswe yaamwamba ngwo:

¹⁶ “Tunalitunu kubanjika yeswe yize Unatulweze mu jina lia Zambi.

¹⁷ Mutulinga yeswayo tunazange. Mutulambula milambu kuli zambi yetu, mwanangana wa pwo wa kwilu, mutumuzujila milambu ya vinyu, ngwe chize twalingile yetu ni tushakulu twetu, ni mwanangana wetu ni miata jetu, mu membo ja Yuda ni mu majila ja Yerusaleme. Ha matangwa aze yitubwa ni yakulia yinji, yituyuka kuhiana, kutwamwene ko lamba.

¹⁸ Alioze chize ku tangwa lize twalitwaminyine kulambula milambu kuli mwanangana wa pwo wa kwilu ni kumuzujila milambu ya vinyu, kutushi nawa Chuma nichimwe, ni atu jetu kaanafu mu jita ni zala.”

¹⁹ Mapwo no yaaweza ho ngwo: “Muze te twalingile mbolo mu kulifwa cha mwanangana wa pwo wa kwilu, ni kumulambula milambu, ni kumuzujila vinyu, malunga jetu te kaakutayiza yize te twakulinga.”

²⁰ Hohene yingukumbulula malunga ni mapwo waze, ngwami:

²¹ “Hakutwala ku milambu yize yenu ni tushakulu twenu, ni mianangana jenu ni miata jenu, ni atu a mu chifuchi nwalambwile mu membo ja Yuda ni mu majila a Yerusaleme, kuma nunanyongo ngwenu, Mwene Zambi kachinyingikine ko, hanji hanavulama, nyi?

²² Kashika musono uno chifuchi chenu haachenyeka, niumwe kechi kutwama mo nawa. Atu kaakulishimwoka ha kuchimona, kaakushingana ni jina liacho, mumu Mwene Zambi te kahashile kulihumikiza nawa ni yenu mumu ha ungulungulu wenu ni yitanga yenu yibi.

²³ Lamba lize lieswe lianuwana musono mumu nwalambwile milambu kuli mazambi eka, ni mumu nwavulumwine ni kukolema Shimbi jenyi.”

^24-25 Yingulweza atu eswe, chibichibi mapwo, chize Mwene Zambi Mukwa Ndundo Jeswe, Zambi ya Israele, anambila atu ja Ayuda waze atwama mu Egiptu ngwenyi: “Yenu ni e mapwo jenu hinunalakenya kulingila zambi mwanangana wa pwo wa kwilu. Hinunalakenya kumulambula milambu ni kumuzujila vinyu, yinufunga yilakenyo yenu. Cheswe cha yenu! Manununenu yilakenyo yenu!

²⁶ Alioze haliabwila banjikenu chize yami Mwene Zambi hinalinga mu jina liami linene kuli Aisraele eswe waze atwama mu Egiptu: chichi kunutayiza nawa kulishinga ni jina liami nikwamba ngwenu: ‘Ni Mwene Zambi!’

²⁷ Mungukalinga chimwe Chuma hanga nukayindame. Yenu eswe kumunukafwa, chibwe mu jita hanji ni musongo, ndoo niumwe kechi kasala.

²⁸ Akepe wika munukachina kufwa ni kuhiluka ku chifuchi cha Yuda. Mba masalila maakanyingika ngwo, maliji amwenemwene kaali a yami, nyi a ayo?

²⁹ Yami, Mwene Zambi, mungunwaha chinyingi chize muchilumbununa ngwo, mungunumwesa lamba mu chifuchi chino, ni Shingo liami lia kunwonona mulibwa liamwenemwene.

³⁰ Mungukakunjika mwanangana Hofra wa Egiptu kuli akwa kole jenyi waze anambe kumushiha, ngwe chize nakunjikile Zedekia mwanangana wa Yuda kuli Nebukanezore wa Babilonia, mukwa kole yenyi yoze wazangile kumushiha.”