Jeremia 43 - Mukanda Wa Zambi 1970

Aisraele yaatwala Jeremia ku Egiptu

¹ Yingumanununa kuhanjika yuma yeswe kuli atu yize Mwene Zambi angutumine kwalweza.

² Mba Azaria mwana wa Hoshaya ni Johanane mwana wa Karea ni akwa kulengumuka eswe akwo yaangwamba ngwo: “Mahuza je. Mwene Zambi, Zambi yetu, kakutumine ko ni kutulweza ngwenyi, kanda tuya tukatwame mu Egiptu.

³ Baruke mwana wa Neria mwe wakuzondola ulimike ni yetu, hanga Ababilonia abwe ni tachi ja kutukumba hanga atushihe hanji kututwala ku Babilonia.”

⁴ Kashika chibwe Johanane chibwe miata ja tujita chibwe atu koononokenene ko ku maliji ja Mwene Zambi atwame mu chifuchi cha Yuda.

⁵ Mba Johanane ni miata a tujita akwo yaatwala eswe waze asalile mu Yuda ku Egiptu, hamwe ni eswe waze ahilukile ku mavungu kuze achinyinyine:

⁶ malunga, ni mapwo, ni ana, ni ana mapwo ja mwanangana. Eswe waze Nebuzaradane mwata wa tujita ahichikile mu moko ja Gedaliya yaatwala, kuchinga ko Baruke ni yami.

⁷ Yaakolema Shimbi ya Mwene Zambi nikuya ku Egiptu, yaaya ndoo ku limbo lia Tapane.

⁸ Kwenako Mwene Zambi yangwamba ngwenyi:

⁹ “Anda amwe mawe anene anene, waavumbike mu ndambo ya kuchinga ni mawe mu mavu mu unjililo ku zuwo lia akwa kuyula, uchilinga ku meso ja Aisraele.

¹⁰ Mba alweze ngwe, yami Mwene Zambi, Mukwa Ndundo Jeswe, Zambi ya Israele, munguneha kavumbi kami Nebukanezore wa Babilonia homa hano. Neye makasa chitwamo chenyi cha wanangana ha mawe wano hinwavumbika, makajika ho zuwo lia mwanangana lia makubu.

¹¹ Nebukanezore makeza ni kwasa jita ni akwa Egiptu. Waze atela kufwa ni musongo, maakafwa ni musongo; waze atela kuya mu ufunge, maakaya mu ufunge; ni waze atela kufwa mu jita, maakafwa mu jita.

¹² Mungukocha mazuwo ja mazambi ja akwa Egiptu; mwanangana wa Babilonia neye kumakocha mahamba jo hanji kuya no. Ngwe chize kafunga akuchiza yina ku mahina jenyi, Chenacho mwanangana wa Babilonia makalinga ku chifuchi cha Egiptu, makabwa mukwa kukumba.

¹³ Kumakabuzwola yingina ya mawe ya chijila ku Heliopolise mu Egiptu ni kwocha mazuwo ja mazambi ja akwa Egiptu.”