Jeremia 42 - Mukanda Wa Zambi 1970

Atu yahula Jeremia ha kwalembela

¹ Mba miata eswe a tujita, hamwe ni Johanane mwana wa Karea ni Azaria mwana wa Heshaya, ni atu alemu ni alelu yeeza kuli yami,

² yaamba ngwo: “Twalemba mwane, tulingile kama chize tunambe! Tulembele kama Mwene Zambi, Zambi yetu, eswe waze twasala ni mwono. Twabwile anji, alioze haliabwila hitwasala akepe wika, ngwe chize unalimwena.

³ Lembenu hanga Mwene Zambi, Zambi yetu, atulweze kama jila yize chatutamba kuya ni chize chatutamba kulinga.”

⁴ Yingukumbulula ngwami; “Chinabeme. Mungulemba Mwene Zambi, Zambi yetu, ngwe chize hinwamba, mba yeswe yize mamba, mungunulweza yo. Chichi kunuswekela Chuma nichimwe.”

⁵ Mba yangwamba ngwo: “Mwene Zambi atubatwile nyi kutwononokene ku Shimbi jeswe jize matwaha.

⁶ Chibwe maliji abema hanji abi, mutwononokena Mwene Zambi, Zambi yetu, yoze hitwakwamba kutulembela. Yeswe muyiwaha nyi twamwononokena.”

Kumbululo lia Mwene Zambi

⁷ Muze matangwa kumi haabalika Mwene Zambi yanguhanjikisa.

⁸ Kashika yingukungulula Johanane, ni miata eswe a tujita waze abwile hamwe nenyi, ni atu eswe akwo.

⁹ Yingwalweza ngwami: “Mwene Zambi, Zambi ya Israele, yoze nwangutumine nguhule, hamba ngwenyi:

¹⁰ ‘Nyi nunazange kutwama mu chifuchi chino, mungunutakamisa, chichi kunumwanga; mungunukolesa, chichi kunumwesa lamba. Mumu kufwa chize nanushihile chinanguvwisa chinyengo kuhiana.

¹¹ Litwaminenu kuvwila mwanangana wa Babilonia woma. Nguli hamwe ni yenu, kumungunulamwina ku moko jenyi.

¹² Yami nguli mukwa keke, kashika mungumupwisa mukwa keke hanga anweche nuhiluke ku chifuchi chenu. Yami, Mwene Zambi, nachamba.’

^13-15 “Alioze yenu waze nwasala mu chifuchi cha Yuda kanda nukolema Mwene Zambi, Zambi yenu, kulituna kutwama mu chifuchi chino. Kuchanutambile kwamba ngwenu: ‘Ka, mutuya tukatwame mu Egiptu, kuze kutuchi kumona nawa jita hanji chitavwi cha jita hanji kufwa ni zala.’ Nyi nwamba chino, mba Mwene Zambi Mukwa Ndundo Jeswe, Zambi ya Israele, mamba ngwenyi: ‘Nyi hinwazanga lume kuya ni kutwama mu Egiptu,

¹⁶ mba jita yize nunevwila woma muyikanuwana, ni zala yize nunakachina muyikanukaula, munukafwila mu Egiptu.

¹⁷ Atu eswe waze anyongene kuya ni kutwama mu Egiptu maakafwila mu jita, hanji ni zala, hanji ni musongo. Niumwe wa kuli ayo kechi kasala ni mwono. Niumwe kechi kachina lamba lize mungukanumwesa.’

¹⁸ “Mwene Zambi, Zambi ya Israele, kanambe ngwenyi: ‘Ngwe chize nevwilile akwa Yerusaleme ufwatulo ni utenu, Chenacho nawa mungunuvwila yenu nyi nwaya ku Egiptu. Munukevwa mwongo; atu maakanulelesa, maakashingana ni jina lienu. Chifuchi chino kunuchi kachimona nawa.’ ”

¹⁹ Yingwamba nawa ngwami: “Mwene Zambi hanwamba yenu waze nwasala mu Yuda ngwenyi, kanda nuya ku Egiptu. Chenacho ngunanukanyamisa haliabwila

²⁰ ngwami, nunakoko nawa yitela yizeyene. Hinunanguhula kunulembela Mwene Zambi, Zambi yenu, ni yenu hinunakumbulula ngwenu, mutulinga yeswe yize matwamba.

²¹ Mba musono hinanulweza, alioze yenu kunusolo kwononoka ku yuma yeswe yize Mwene Zambi, Zambi yetu, hangutuma ni kunulweza.

²² Kashika ivwenu chino; munukafwila mu jita, ni zala, hanji musongo, mu chifuchi chize nunazange kuya ni kutwama.”