Jeremia 41 - Mukanda Wa Zambi 1970

¹ Ha kakweji wa muchishimbiali wa mwaka uzewene, Ishmaele mwana wa Netania, mujikulu wa Elishama, te wa ku jiko lia mwanangana, umwe wa hakachi ka miata ja tujita twa mwanangana, yaya ku Mizpa ni malunga kumi ni kutala Gedaliya. Muze te ayo eswe anali hamuwika,

² Ishmaele ni malunga kumi yaatomona mikwale yo, yaashiha Gedaliya.

³ Ishmaele yashiha nawa Aisraele waze abwile ni Gedaliya mu Mizpa ni tujita twa Babilonia waze abwile ko.

⁴ Muze hikwacha, shimbu niumwe te kanda achinyingika kufwa cha Gedaliya,

⁵ malunga makumi nake a ku membo ja Shekeme, ni Shilo, ni Samaria yaaheta. Te haatewula wevu ni hachanona mahina jo, ni kulilemeka. Te kaanambata mbuto ni yuma ya vumba libema ya kulambula mu zuwo lia Zambi.

⁶ Ishmaele yakatuka ku Mizpa ni kwabatwiza, yaya nikulila. Muze haheta kuli ayo, yaamba ngwenyi: “Lisesa, tweyenu nutale Gedaliya.”

⁷ Muze haanjila mu limbo, Ishmaele ni malunga waze abwile hamwe nenyi yaashiha malunga waze, yaambila mu shima.

⁸ Alioze yikubwa malunga kumi mu mbunga waze ahanjikile kuli Ishmaele ngwo: “Twalemba mwane, kanda nutushiha mwane! Tuli ni tiriku, ni masa, ni maji a olive, ni wuchi yakusweka mu minda.” Kashika kaashihile ko.

⁹ Shima lize Ishmaele ambilile malunga waze ashihile liabwile linene. Mwanangana Asa walifulile muze ashile jita ni mwanangana Basha wa Israele. Ishmaele yalizalisa ni malunga waze ashihile.

¹⁰ Hohene ana mapwo a ku zuwo lia mwanangana yaapwisa funge, ni atu akwo waze asalile mu limbo lia Mizpa, waze Nebuzaradane mwata wa tujita akunjikile mu moko ja Gedaliya aafunge. Ishmaele yakatuka ni kuya no ku chifuchi cha Amone.

¹¹ Johanane ni miata eswe ja tujita yeevwa sango ja yibi yize Ishmaele halinga.

¹² Mba yaamukaula hamwe ni atu jo, yaamuwana ku chitende ku Gibeone.

¹³ Muze funge waze abwile ni Ishmaele haamona Johanane ni miata a tujita yaawahilila,

¹⁴ yaachinyina kuli ayo.

¹⁵ Alioze Ishmaele ni malunga nake yaachinyina ku Amone.

¹⁶ Hohene Johanane ni miata a tujita waze abwile hamwe nenyi yaatambula atu waze Ishmaele akwachile ku Mizpa muze haashiha Gedaliya; ni tujita, ni mapwo, ni ana, ni malunga akutunguna.

^17-18 Yeevwila Ababilonia woma mumu Ishmaele washihile Gedaliya, yoze mwanangana wa Babilonia apwishile mukwa kuyula chifuchi. Kashika yaatuhuka nikuchinyina ku chifuchi cha Egiptu. Mu jila yaamana ku Chimame hehi ni limbo lia Betleheme.