Jeremia 40 - Mukanda Wa Zambi 1970

Jeremia yatwama hamwe ni Gedaliya

¹ Mwene Zambi yanguhanjikisa muze Nebuzaradane, mwata wa tujita, hangutusula ku limbo lia Rama. Te hangutwala ko wakukasa ni ngoji ja utale, hamwe ni atu eswe akwo a mu Yerusaleme ni Ayuda waze aatwalile funge ku chifuchi cha Babilonia.

² Mwata wa tujita yangutwala ku tenga yangwamba ngwenyi: “Mwene Zambi, Zambi yenu, hanahanjika kulu hakutwala ku lamba lia chifuchi chino.

³ Haliabwila halinga chize ambile. Yino yeswe yaamuwana mumu atu jenu haanavulumuna Mwene Zambi ni kumukolema.

⁴ Haliabwila ngunakujitula ngoji ja utale ku moko je, hinakutusula. Nyi unazange kuya ku Babilonia hamwe ni yami, acho chili cha yena, mungukufunga kanawa. Alioze nyi kuwazangile kuya, kuheshi Chuma. Tala chifuchi cheswe chili cha yena, muuhasa kuya kweswako unazange.”

⁵ Muze te kanda nguchikumbulula, Nebuzaradane yamba ngwenyi: “Hiluka kuli Gedaliya, mwana wa Ahikame mujikulu wa Shafane, yoze mwanangana wa Babilonia hapwisa mukwa kuyula membo ja Ayuda. Muuhasa kutwama nenyi ni kubwa mukachi ka atu, hanji muuhasa kuya kweswako muuzanga.” Mba yangwaha yawana ni yimwe yakulia ya kuya nayo, yangutayiza nguye.

⁶ Yinguya ni kutwama ni Gedaliya mu limbo lia Mizpa, yingubwa mukachi ka masalila a mu chifuchi.

Gedaliya mukwa kuyula mu Yuda

⁷ Amwe miata ja Ayuda ni tujita yaalituna kulikunjika kuli mwanangana wa Babilonia. No yeevwa ngwo, mwanangana wa Babilonia hapwisa Gedaliya mukwa kuyula mu chifuchi, hamutongola kuyula yiswale eswe waze kaatwalile ko mu undungo mu Babilonia.

⁸ Kashika Ishmaele mwana wa Natania, ni Johanane mwana wa Karea, ni Seraya mwana wa Tanumete, ni ana ja Efai a ku limbo lia Netofa, ni Jezanai Kamaka, yaaya hamwe ni atu jo kuli Gedaliya ku Mizpa.

⁹ Gedaliya yaamba ngwenyi: “Ngunanwambe ngwami, kanda nwivwa woma kuzeyela kuli Ababilonia. Twamenu mu chifuchi chino, lingilenu mwanangana wa Babilonia, mba yuma yeswe muyibwa kanawa.

¹⁰ Yami mwene mungutwama ku Mizpa nikubwa hako lienu muze Ababilonia meeza kuno. Alioze yenu kungululenu vinyu, ni mihuko, ni maji a olive, nutwama mu yihunda yize hinunatambula.”

¹¹ Aisraele eswe waze abwile mu yifuchi ya Moabe, ni Amone, ni Edome, ni mu yifuchi yikwo yeevwa ngwo, mwanangana wa Babilonia hatayiza amwe Aisraele kutwama mu Yuda, nawa ngwo, hapwisa Gedaliya mukwa kuyula.

¹² Kashika yaakatwoka kweswako achinyinyine, yaahiluka ku Yuda. Yeeza kuli Gedaliya ku Mizpa, yaakungulula vinyu yinji ni mihuko yinji.

Aisraele yaashiha Gedaliya

¹³ Mwabwamuze, Johanane ni miata a tujita waze kaalikunjikile ko kuli Ababilonia yeeza kuli Gedaliya ku limbo lia Mizpa,

¹⁴ yaamwamba ngwo: “Kuwanyingikine ngwe, mwanangana Balise wa ku chifuchi cha Amone hatuma Ishmaele hanga akushihe nyi?” Alioze Gedaliya kachifulielele ko.

¹⁵ Mba Johanane yahanjika nenyi ku tenga ngwenyi: “Ngutayize nguye ngushihe Ishmaele, niumwe kechi kunyingika yoze wamushiha. Mumu yika makushihila yena? Nyi ka, Ayuda waze anakunguluka kuli yena maakamwangashana, ni masalila a mu Yuda maakamona lamba.”

¹⁶ Alioze Gedaliya yakumbulula ngwenyi: “Kanda uchilinga! Yeswe yize unahanjika hakutwala kuli Ishmaele yili ya mahuza.”