Jeremia 4 - Mukanda Wa Zambi 1970

Alumukenu ku mbunge

¹ Mwene Zambi kanambe ngwenyi: “Yenu Aisraele, nyi nunazange kwalumuna, alumukenu nuhiluke kuli yami. Nyi nwambila mahamba waze nakuvutwokela ni kushachila hali yami,

² mba muchilita kuli yenu kulishinga ni jina liami. Hohene mavungu eswe maanguhula ngwawahise, mba maanguchichimieka.”

³ Mwene Zambi kanambila Ayuda ni akwa Yerusaleme ngwenyi: “Limenu minda yenu; kanda nutumba mbuto jenu mukachi ka mingonga.

⁴ Fungenu Usendo wenu ni yami, Mwene Zambi yenu, likunjikenu kuli yami, yenu Ayuda ni akwa Yerusaleme. Nyi ka, munwivwa ufwatulo kuhiana ngwe kahia kaze kakulekwoka mumu ha yibi yize hinunalingi. Kumukalekwoka, kukuchi kubwa niumwe yoze makajima.”

Ayuda lilulikenu mumu ha jita

⁵ Humunenu chitavwi mu chifuchi cheswe! Kololokenu chikolo! Lweza Ayuda ni akwa Yerusaleme achinyine ku membo akukoleka.

⁶ Tulwezenu chinyingi cha kuya ku Zione! Zombokenu nulilamwine! Kanda nulaluka! Mwene Zambi kananeha lamba ni kwonona chinene cha ku norde.

⁷ Ngwe tambwe yoze unakatuka mu chivwenge chenyi, mukwa kwonona mavungu hakatuka. Kaneza ni kwonona Yuda. Membo ja Yuda kumaakenyeka, kukuchi katwama niumwe.

⁸ Kashika zalenu mianji, nulile mbimbi, mumu ufwatulo wa Mwene Zambi kanda uhwa hali Ayuda.

⁹ Mwene Zambi kanambe ngwenyi: “Ha tangwa lize mianangana ni akwa lutwe keechi kabwa nawa ni hamu. Mahako ni akwa munanyi maakevwa mwongo, maakalishimwoka.”

¹⁰ Mba yingwamba ngwami: “Mwene Zambi hiwonga akwa Yerusaleme liakulu! Wambile ngwe mukukabwa uhwimino, alioze mukwale uli ha kota jo.”

¹¹ Tangwa mulikeza lize atu maakalweza akwa Yerusaleme ngwo, fuji ya kahia muyikatuka mu puya ni kutalikisa kuli ayo. Kuyichi kabwa fuji yikepe yize muyikafuza yiswaswa wika.

¹² Fuji yize yinakatuka kuli Mwene Zambi muyikabwa ya tachi kuhiana! Mwene Zambi iye mwene makabatwila atu jenyi.

Yuda haamujingilika kuli akwa kole

¹³ Talenu, akwa kole kaaneza ngwe malelwa. Matemba jo a jita kaali ngwe kangonga, ni tuvwalu two kaali ni tambu kuhiana, ngwe tela. Lwangu mama, kutwanonga! Lamba lietu mama!

¹⁴ Yerusaleme, likose ungulungulu wa ku mbunge ye, mba hanga akulamwine. Miaka yingahi muyibalika mba weche manyonga je abi?

¹⁵ Tunganda a ku limbo lia Dane ni a ku milundu ya Efraime kaanambulula sango jibi.

¹⁶ Heeza ni kukanyamisa mavungu ni akwa Yerusaleme ngwo, akwa kole kaaneza a ku chifuchi kusuku. Akwa kole waze maakakololoka ni kulimika ni membo ja Yuda.

¹⁷ Kumaakajikinyina Yerusaleme ngwe tufunga twa munda, mumu atu jenyi haakatukila Mwene Zambi. Mwene Zambi wachamba.

¹⁸ Yuda, yino yeswe yena mwene walikokela yo ha ndako je jibi, ni yuma yize hiunalingi. Shili ye hiyakukokela lamba lino; hiyakutuwa mu mbunge.

Jeremia yanenganyana mumu hali atu jenyi

¹⁹ Mama lambee! Mama lambee! Mama mbunge yami! Mbunge yami yinabinji! Chahashile kulihumikiza, ngunevu yitavwi ni milolo ya jita.

²⁰ Lamba linakaula lamba ni likwo; chifuchi cheswe haachenyeka. Susumuku heenyeka mazuwo jetu akutunga ni makubu; haatanwona yikalakala yo.

²¹ Matangwa angahi Changutamba kumona bendelo ya jita, ni kwivwa maliji a yitavwi?

²² Mwene Zambi kanambe ngwenyi: “Atu jami kaali yihepuke; kaangunyingikine. Kaali ngwe yihepuke ja ana; keeshi malinjekela. Kaali ni mana akulinga ungulungulu, alioze kaali akwa ngwaza ha kulinga yibema.”

Usolwelo: kwonona chize muchikeza

²³ Natalile hashi, yingumona hamokomoko, hahululu; natalile kwilu, pangu kulishiko.

²⁴ Yingutala milundu, te yinanyiki; yingutala mindundena, te yinatekenga.

²⁵ Yingumona ngwami kuheshi atu; chibwe tujila haachina.

²⁶ Chifuchi cha chinuno yichalumuka puya; membo jacho yeenyeka mumu ha ufwatulo wa Mwene Zambi.

²⁷ (Mwene Zambi hanambe ngwenyi: “Hashi heswe muhakabwa puya, alioze keechi kwonona ho liakulu.”)

²⁸ Hashi muhanenganyana; lilu mulikalaa bwii. Mwene Zambi hanambe; kechi kalumuna manyonga jenyi. Hanabatula, kechi kwalumuna.

²⁹ Ha kwivwa lundunjila wa akwa kwendela ha tuvwalu ni akwa mata a kwasa, atu eswe kumaakachina chizunguzungo. Amwe maakachinyina ku usaki, akwo maakanyina ku mawe. Yihunda yeswe muyikasala yahululu, kumuchi kasala niumwe.

³⁰ Yerusaleme, lamba lie! Mumu yika unazalila mahina abema achila? Mumu yika unalizezejeka yuma ye ya uhenya, ni kulikwita yitumbo ya kulibemesa ku meso? Unalibemesa tuhu chamokomoko! Akwa zango lie haakwehuka, kaanafupu kukushiha.

³¹ Yingwivwa kulila, ngwe umwe pwo unafumbajala, unabinji ha kusema mwanenyi mutangu. Kuma te kulila ni kuhuza cha Yerusaleme, kanazozo moko jenyi nikwamba ngwenyi, “Mama lambee! Kunafwa!”