Jeremia 39 - Mukanda Wa Zambi 1970

Kwenyeka cha Yerusaleme

¹ Ha kakweji wa muchikumi wa mwaka wa muchilivwa wa kuyula cha Zedekia mwanangana wa chifuchi cha Yuda, mwanangana Nebukanazore wa ku chifuchi cha Babilonia yeza ni tujita twenyi eswe, yaasa jita ni limbo lia Yerusaleme.

² Ha tangwa lia muchilivwa lia kakweji wa muchiwana wa mwaka kumi ni umuwika, wa mwanangana Zedekia, yaanungwina yipanga ya limbo hashi.

³ (Muze haakumba Yerusaleme, akwa kuyula eswe ja mwanangana wa Babilonia yeeza yaamana mu chikolo Cha Hakachi, hamwe ni Nergale Sarezere, ni Samgare Nebo, ni Sarsekime, ni Nergale Sarezere mukwo.)

⁴ Muze mwanangana Zedekia ni tujita twenyi eswe haamona yize yabwile, yeeseka kuchina mu limbo ha ufuku. Yaanjila mu munda wa mwanangana, yaatuhukila ku chikolo hakachi ka yipanga yaali yakukoleka, yaachinyina ku sali lia chikulo cha Yordau.

⁵ Alioze tujita twa Babilonia yaakaula, yaakwachila mwanangana Zedekia mu yana hehi ni Yeriku. Yaamutwala kuli mwanangana Nebukanezore, ku limbo lia Ribla mu chifuchi cha Hamate. Kwenako amubatwilile kuli mwanangana Nebukanezore.

⁶ Ku Ribla yaashiha ana ja Zedekia ni mwene kanatale; yaashiha nawa akwa kuyula eswe ja Yuda.

⁷ Mwabwamuze yaalokola meso ja Zedekia, yaamukasa ni ngoji ja utale, yaamutwala ku Babilonia.

⁸ Muze akwa Babilonia hoocha zuwo lia mwanangana ni mazuwo eswe ja atu, yaabuzula yipanga ya Yerusaleme.

⁹ Hakusula Nebuzaradane, mwata wa tujita, yatwala masalila a mu limbo funge ku Babilonia, hamwe ni waze achinyine.

¹⁰ Mu Yuda yimusala amwe yiswale, waze kaabwile ko ni yuma ya ayo ene, yaatetela minda ya vinyu ni minda yikwo.

Mwanangana Nebukanezore yatusula Jeremia

¹¹ Alioze mwanangana Nebukanezore yambila Nebuzaradane, mwata wa tujita, ngwenyi:

¹² “Yako uwane Jeremia, umufunge kanawa. Kanda umumwesa lamba, alioze umulingila yeswe yize mazanga.”

¹³ Hohene Nebuzaradane hamwe ni akwa kuyula alemu Nebushazbane ni Nergale Sarezere, ni miata eswe akwo a mwanangana wa Babilonia,

¹⁴ yaangutwala ku yiize ya mwanangana. Yaangusa mu moko ja Gedaliya, mwana wa Ahikame, mujikulu wa Shafane, yangufunga hanga nguhete ku mahiami ni uhwimino. Yingutwama ko mukachi ka atu.

Mwene Zambi yalamwina Ebedmeleke

¹⁵ Muze te nguchili mu zuwo lia lamba mu yiize ya mwanangana, Mwene Zambi yangwamba

¹⁶ ngulweze Ebedmeleke, Kasudane, ngwami: “Mwene Zambi Mukwa Ndundo Jeswe, Zambi ya Israele, hangulweza ngwenyi: ‘Muchibwa ngwe chize nambile, limbo lino mungulienyeka, hi kuliyukisa ko. Muze yino yeswe muyibwa, yena muyimona ni meso je.

¹⁷ Alioze yami, Mwene Zambi, mungukufunga, chichi kukukunjika mu moko ja waze wakuvwila woma.

¹⁸ Mungukufunga kanawa, kuuchi kufwa. Muuchina ni mwono we mumu hiwajikijila hali yami. Yami Mwene Zambi nachamba.’ ”