Jeremia 38 - Mukanda Wa Zambi 1970

Jeremia mu shima liumu

¹ Shefatia mwana wa Matane, ni Gedaliya mwana wa Pashure, ni Jukale mwana wa Shelemia, ni Pashure mwana wa Malkia yeevwa ngwo, yami hinalweza atu ngwami:

² “Mwene Zambi hamba ngwenyi: ‘Mweswe yoze masala mu limbo kumafwa mu jita, hanji ni zala, hanji ni musongo. Alioze yoze matuhuka ni kuliondela kuli akwa Babilonia kechi kufwa; ku machina.’

³ Mwene Zambi hamba nawa ngwenyi: ‘Mungukunjika akwa limbo lino mu moko ja tujita twa Babilonia, kumaatambula lie limbo.’ ”

⁴ Mwabwamuze akwa kuyula yaaya kuli mwanangana, yaamba ngwo: “Vulie mwanangana! Mutu yono chamutamba kufwa. Mumu maliji jenyi kaakulekumwisa tujita ni atu akwo eswe waze haasala mu limbo. Kasolo kukwasa atu, kanazange shina kwamwesa lamba.”

⁵ Mwanangana Zedekia yakumbulula ngwenyi: “Chinabeme, lingenu cheswacho nunazange; chichi kunukanda.”

⁶ Kashika yaangukwata, yaangukasa ni mihipu, yaangusa mu shima lia Malkia, mwana wa mwanangana, lize te lili mu yiize ya zuwo lia mwanangana. Te kumushi meya, shina malowa wika; yingutwema mo.

⁷ Alioze Ebedmeleke wa ku chifuchi cha Sudane, umwe wa kutunguna yoze wakulinga milimo mu zuwo lia mwanangana, yevwa ngwo, haangusa mu shima. Ha tangwa lize mwanangana te kanasopesa milonga mu chota hehi ni chikolo cha Benjamine,

⁸ mwe Ebedmeleke yaya ko, yalweza mwanangana ngwenyi:

⁹ “Vulie mwanangana! Atu wano chibi alinga; haasa Jeremia mu shima. Kumafwila mo ni zala, mumu mu limbo kumushi nawa mbolo.”

¹⁰ Mba mwanangana yambila mwe Ebedmeleke eze hamwe ni atu atatu ni kunguchiza mu shima, kuchina mungufwa.

¹¹ Mba Ebedmeleke yaya hamwe ni e atu ku zuwo lia mwanangana mu chibatulo muze akuswekela mahina, yaanda mo yimwe yibuzu yayisosa mu shima ni mihipu.

¹² Yaangulweza hanga ngupachike ye yibuzu mu makahwa, hanga mihipu kuyichi kungulemeka. Yingulinga Chenacho.

¹³ No yaangusosa ni kungutuhwisa mu shima. Mwabwamuze yaangufunga mu yiize ya zuwo lia mwanangana.

Mwanangana Zedekia yahula mana kuli Jeremia

¹⁴ Tangwa likwo mwanangana Zedekia yangutambikila ku chikolo cha muchitatu cha zuwo lia Zambi, ngwenyi: “Ngunahula chihula, ungulweze kama umwenemwene weswe.”

¹⁵ Yingumukumbulula ngwami: “Vulie mwanangana, chibwe ngunwambulwile umwenemwene, hindu kumunungushiha, chibwe ngunulweze mana, hindu kunuchi kubanjika.”

¹⁶ Mba mwanangana yalishinga ku tenga ngwenyi: “Ni Mwene Zambi, Zambi yoze wakutwaha mwono, chichi kukushiha hanji kukukunjika mu moko ja waze anazange kukushiha.”

¹⁷ Mba yingulweza mwanangana chize Mwene Zambi Mukwa Ndundo Jeswe, Zambi ya Israele, hanambe ngwenyi: “Nyi ngwe nwalikunjika kuli akwa kuyula ja mwanangana wa Babilonia, kachi kunuchi kufwa, ni limbo lino keechi kuliocha kahia, yenu ni akwa majiko jenu munutwama ni mwono.

¹⁸ Alioze nyi ngwe kunwalikunjikile kuli ayo, limbo lino kumaalikunjika mu moko ja Ababilonia, no maaliocha, kunuchi kuchina.”

¹⁹ Alioze mwanangana ngwenyi: “Ngunevu woma kuli akwa chifuchi chetu waze haachinyina kuli Ababilonia, kumaangukunjika ku moko jo ni kungumwesa lamba.”

²⁰ Yami yingwamba ngwami: “Vulie mwanangana! Keechi kunukunjika kuli ayo. Ngunanulembe nwononoke ku maliji a Mwene Zambi; mba yeswe muyiwaha kuli yenu, keechi kunushiha.

²¹ Alioze Mwene Zambi hangulweza mu Usolwelo chize muchibwa nyi ngwe kunusolo kulikunjika kuli Ababilonia.

²² Mu Usolwelo uze yingumona mapwo eswe waze haasala ku zuwo lia mwanangana wa Yuda kaanaatwala kuli akwa kuyula ja mwanangana wa Babilonia. Banjika maliji waze ahanjekele muze te anende: ‘Masepa ja mwanangana haamwonga, haamuyula. Molu jenyi haashimbama mu malowa, tusendo twenyi haamwehuka.’ ”

²³ Mba yinguweza ho ngwami: “Mapwo jenu eswe ni ana jenu eswe kumaakwata kuli Ababilonia, ni yena mwene kuuchi kuchina. Kumaanutwala funge kuli mwanangana wa Babilonia, limbo lino kumaliocha kahia.”

²⁴ Mwanangana ngwenyi: “Kanda ulweza mutu niumwe pande jino, mba kuuchi kubwa mu utoji.

²⁵ Nyi ngwe akwa kuyula evwa ngwo, nakutambikanga ni kuhanjika ne, kumeeza ni kukuhula yize hitwahanjika. Maakulakenya ngwo, keechi kukushiha nyi walweza yuma yeswe.

²⁶ Alweze lume ngwe: ‘Te ngunamulembejeka hanga kechi kunguhilwisa nawa mu zuwo lia lamba, ngukafwile mo.’ ”

²⁷ Mba akwa kuyula eswe yeeza, yaanguhula. Yingwalweza ngwe chize mwanangana angwambile. Hi kamwene ko nawa chize maalinga, mumu niumwe kanyingikine ko pande jize.

²⁸ Yaangufunga mu yiize ya zuwo lia mwanangana ndoo ni tangwa lize Ababilonia akumbile Yerusaleme.