Jeremia 37 - Mukanda Wa Zambi 1970

Zedekia yahula Jeremia amulembele Zambi

¹ Mwanangana Nebukanezore wa ku chifuchi cha Babilonia, yapwisa Zedekia, mwana wa Josia, mwanangana wa Yuda, kusalakana Jehoakine mwana wa Jehoakime.

² Alioze chibwe Zedekia, chibwe akwa kuyula jenyi, chibwe atu akwo koononokene ko ku maliji waze anguhele kuli Mwene Zambi ngwalweze.

³ Mwanangana Zedekia yatuma Jukale, mwana wa Shelemia, ni hako Zefania, mwana wa Maseya, anguhule ngulembe kuli Mwene Zambi, Zambi yetu, hakutwala ku vungu lietu.

⁴ Te kanda achingusa mu zuwo lia lamba, nguchili mukachi ka atu.

⁵ Tujita twa Babilonia te kaanase jita ni akwa Yerusaleme, alioze muze heevwa ngwo, tujita twa chifuchi cha Egiptu haatangunuka njiza, yaachina.

⁶ Mba Mwene Zambi, Zambi ya Israele, yangwamba ngwenyi:

⁷ “Yako ulweze Zedekia ngwe: ‘Tujita twa Egiptu kaaneza ni kukukwasa, alioze maakahiluka ku mahio.

⁸ Mba Ababilonia kumaakahiluka ni kwasa jita ni akwa limbo, maakatambula lie limbo ni kuliocha.

⁹ Yami Mwene Zambi ngunanukanyamisa ngwami, kanda nulionga yenwene ni kunyonga ngwenu, Ababilonia keechi kuhiluka, alioze kumaakahiluka.

¹⁰ Chibwe munukumba tujita eswe a Babilonia, kusale lume akwa yilonda waze anabombo mu mazuwo ja makubu, hindu atu waze kumaakalikolweza ni kwocha limbo lino.’ ”

Akwa lutwe yaakwata Jeremia

¹¹ Tujita twa chifuchi cha Babilonia yaakatuka ku Yerusaleme mumu te tujita twa chifuchi cha Egiptu haakundama.

¹² Mba nakatukile ku Yerusaleme ni kuya ku chifuchi cha Benjamine ni kutambula Chihanda chami cha chihinga cha jiko liami.

¹³ Alioze muze hinakundama ku chikolo cha Benjamine, umwe mwata wa tujita jina lienyi Ilija, mwana wa Shelemia, mujikulu wa Hanania, yangumanyisa ngwenyi: “Yena unachinyina kuli Ababilonia!”

¹⁴ Yingukumbulula ngwami: “Ka! hi chocho ko!” Alioze Ilija kangubanjikile ko. Henaho yangukwata, yangutwala kuli akwa kuyula.

¹⁵ No yaangutenukina, yaangulamba, yaangwajilila mu zuwo lia Jonatane, mulopo wa mwanangana, mumu te haalialumuna zuwo lia lamba.

¹⁶ Yangusa mu wina, yingutwama mo matangwa anji.

¹⁷ Mwabwamuze mwanangana Zedekia yangutambika ku zuwo lienyi, yanguhula ku tenga ngwenyi: “Uli ni amwe maliji a kuli Mwene Zambi, nyi?” Yingukumbulula ngwami: “Ewa mwanangana, maliji ali ko. Kumaanukunjika mu moko ja mwanangana wa Babilonia.”

¹⁸ Mba yingumuhula ngwami: “Vulie mwanangana! Chibi chika nalinga kama kuli yenu, hanji kuli akwa kuyula je, chibwe kuli atu wano, kashika nwangusela mu zuwo lia lamba?

¹⁹ Akwa munanyi jenu waze anulwezele ngwo, mwanangana wa Babilonia kechi kwasa jita ni yenu hanji mu chifuchi chenu, kuli ali haliabwila?

²⁰ Vulie mwanangana! Ngunaliondela, ngubanjikenu kama, nulinge yize ngunakulweze. Nalemba kanda nungutwala nawa mu zuwo lia lamba maha Jonatane. Nyi ka, kumungufwila mo.”

²¹ Kashika mwanangana yalulika kungusa mu zuwo lia lamba mu yiize ya zuwo lia mwanangana. Yingutwama ko. Tangwa heswe te kakupa mbolo yimuwika ndoo mbolo ya mu limbo yahwile.