Jeremia 36 - Mukanda Wa Zambi 1970

Baruke yatanga chivungo cha mukanda mu zuwo lia Zambi

¹ Ha mwaka wa muchiwana wa kuyula cha Jehoakime mwana wa Josia mwanangana wa Yuda, Mwene Zambi yangwamba ngwenyi:

² “Anda chivungo cha mukanda, usoneke ho yuma yeswe yize hinakulweza hakutwala kuli Aisraele ni Ayuda, ni mavungu akwo eswe. Soneka yuma yeswe yize hinakulweza chize ku tangwa litangu lize nabutukile kuhanjika kuli yena, muze Josia abwile mwanangana, ndoo ni musono.

³ Tangwa likwo muze Ayuda meevwa yeswe yize hingunanyongo kulinga hali ayo, maalumuna ndako jo jibi. Mba mungwakonekena ungulungulu wo ni milonga yo.”

⁴ Hohene yingutambika Baruke, mwana wa Neria, yingumulumbunwina yuma yeswe yize te Mwene Zambi hangulumbunwina. Baruke neye yayisoneka yeswe ha chivungo cha mukanda.

⁵ Mba yingwambila Baruke maliji wano ngwami: “Haanangukanjisa kuya mu zuwo lia Zambi.

⁶ Alioze ngunazange yena uyeko muze atu maalitwamina nawa kulia. Utange che chivungo, hanga evwe maliji eswe waze Mwene Zambi hangwamba, yeswe yize hinalumbununa kuli yena. Yako uchilingile kuze atu eswe maahasa kwivwa, ni Ayuda eswe nawa waze haakatuka ku membo jo.

⁷ Hanji maalemba kuli Mwene Zambi, ni kuhichika ungulungulu wo, mumu Mwene Zambi kanambe kumwesa atu wano lamba mu utenu ni ufwatulo wenyi.”

⁸ Mba Baruke yatanga maliji a Zambi mu zuwo lia Zambi ngwe chize namulwezele.

⁹ Ha kakweji wa muchilivwa wa mwaka wa muchitano wa kuyula cha Jehoakime mwanangana wa Yuda, atu yaalitwamina kulia hanga Mwene Zambi eevwile kama keke. Atu eswe waze te atwama mu Yerusaleme ni waze ejile ku membo ja Ayuda yaalitwamina kulia.

¹⁰ Mba, muze atu eswe anabanjika, Baruke yatanga maliji eswe waze namulwezele. Chino yachilinga mu zuwo lia Zambi, mu chibatulo cha Gemaria, mwana wa Shafane, mulopo wa mwanangana. Chibatulo chenyi chabwile mu yiize ku tunda, hehi ni chikolo Chaha cha zuwo lia Zambi.

Baruke yatangila akwa lutwe we mukanda

¹¹ Mikaya, mwana wa Gemaria, mujikulu wa Shafane, yevwa chize te Baruke anatange chivungo cha mukanda wa maliji waze ahanjikile Mwene Zambi.

¹² Mba yaya ku zuwo lia mwanangana, ku chibatulo cha mulopo wa mwanangana, kuze te anakunguluka akwa lutwe eswe. Elishama, mulopo wa mwanangana, ni Delaya mwana wa Shamaya, ni Elnatane mwana wa Akbore, ni Gemaria mwana wa Shafane, ni Zedekia mwana wa Hanania, ni akwa lutwe akwo eswe waze abwile ko.

¹³ Mikaya yaalweza yuma yeswe yize Baruke hatanga ku meso ja atu.

¹⁴ Hohene akwa lutwe yaatuma Jehudi (mwana wa Netania, mujikulu wa Shelemia, mwana wa Kushi) alweze Baruke anehe mukanda uze hatanga ku meso ja atu. Baruke yatwala we mukanda.

¹⁵ Yaamwamba ngwo: “Twama hashi tutangile we mukanda.” Baruke neye yalinga Chenacho.

¹⁶ Muze hautanga, yaalihanjikisa umwe ni mukwo ni woma, yaambila Baruke ngwo: “Chatutamba kutwala mukanda uno kuli mwanangana.”

¹⁷ Yaamuhula ngwo: “Ngwe kuchi unakasoneka yino yeswe? Kota Jeremia unakakwambulwila yo, nyi?”

¹⁸ Baruke yakumbulula ngwenyi: “Ewa, Jeremia unakangulumbunwina yino yeswe, mba yinguyisoneka ha chivungo chino ni ulombo.”

¹⁹ Mba yaamwamba ngwo: “Yena ni Jeremia chanutamba kuswama. Kanda nulweza niumwe kuze nunaswame.”

Mwanangana yocha che chivungo cha mukanda

²⁰ Akwa lutwe yaatwala che chivungo cha mukanda mu chibatulo cha Elishama, mulopo wa mwanangana, mba yaya ku yiize ya mwanangana, yamwambulwila yuma yeswe.

²¹ Mba mwanangana yatuma Jehudi ni kwanda we mukanda. Yawanda mu chibatulo cha Elishama, yautangila mwanangana ni akwa lutwe eswe waze te anamujingilika.

²² Te ha mwaka wa chishika, mwanangana neye yota kahia mu zuwo lia kwotela kahia.

²³ Muze Jehudi hatanga yihanda yitatu hanji yiwana, mwanangana yayibatwola ni poko yenyi yikepe, yayimbila mu kahia. Yachilingalinga ndoo ni muze mukanda weswe wahwile ni kwocha.

²⁴ Alioze mwanangana chibwe akwa kuyula waze evwile maliji waze eswe keevwile ko woma hanji chinyengo.

²⁵ Elnatane, ni Delaya, ni Gemaria yaalembela mwanangana alitwamine kwocha mukanda, hindu kaabanjikile ko.

²⁶ Mba yatuma Jeramele mwana wa mwanangana, ni Seraya mwana wa Azriele, ni Shelemia mwana wa Abdele, hanga angukwate hamwe ni mukwa kusoneka Baruke. Alioze Mwene Zambi yangusweka.

Jeremia yasoneka mukanda ukwo

²⁷ Muze mwanangana Jehoakime hocha chivungo chize nalwezele Baruke kusoneka, Mwene Zambi yangwamba ngwenyi:

²⁸ “Anda chivungo chikwo usoneke ho yuma yeswe yize yabwile ha mukanda utangu.

²⁹ Mba uye ulweze mwanangana ngwe: Yena hiwocha mukanda, hiwahula Jeremia ngwe, mumu yika hiwasoneka ngwe, mwanangana wa Babilonia kumeza ni kwenyeka chifuchi chino ni kushiha atu jamo ni tushitu twamo?

³⁰ Kashika haliabwila, yami Mwene Zambi, ngunambe ngwami, mwanangana Jehoakime, mukwa vungu lie niumwe kechi kayula akwa wanangana wa David. Muze hiwafwa keechi kakufunda, alioze maakakumbila haze ha chivukuminya cha mwalwa ni chishika cha ufuku.

³¹ Mungukakumwesa lamba, ni lie vungu lie, ni akwa kuyula, mumu ha yibi yize nwakulinga. Chibwe yena, hanji akwa Yerusaleme, chibwe Ayuda kunwabanjikile ko maliji jami a kukanyamisa, kashika yenu eswe mungunumwesa lamba lize hinanyonga.”

³² Mba yingwanda chivungo cha mukanda chikwo yinguhana kuli mukwa kusoneka Baruke, yasoneka ho yuma yeswe yize namulwezele. Yasoneka maliji eswe waze abwile ha mukanda utangu ni maliji akwo anji alifwa no.