Jeremia 35 - Mukanda Wa Zambi 1970

Jeremia ni Arekabe

¹ Muze Jehoakime mwana wa Josia abwile mwanangana wa Yuda, Mwene Zambi yangwamba ngwenyi:

² “Yako uhanjike ni akwa jimo lia Rekabe. Mba muwatwala mu chibatulo cha mu zuwo lia Zambi, waahe vinyu.”

³ Mba yingwanda akwa jimo lia Rekabe eswe; Jazania (mwana wa Jeremia mukwo, mujikulu wa Habazinia) ni ayayo, ni anakwo eswe,

⁴ yingwatwala mu zuwo lia Zambi, mu chibatulo cha tumbaji twa mukwa munanyi Hanane mwana wa Igadalia. Chibatulo chino yichibwa helu lia chibatulo cha Maseya mwana wa Shalume, mwata mulemu wa mu zuwo lia Zambi, hehi ni yibatulo ya miata akwo.

⁵ Yingutumbika milondo ya vinyu ni misenge ku meso ja Arekabe, yingwamba ngwami: “Tambulenu vinyu yino.”

⁶ Alioze yaakumbulula ngwo: “Kutushi kunwa vinyu. Kashakulu ketu Jonadabe, mwana wa Rekabe, katwambile ngwenyi: ‘Yenu chibwe ana jenu kanda nukanwa vinyu nichimwe.’

⁷ Yatwamba nawa ngwenyi: ‘Kanda nutunga mazuwo hanji kulima minda ya mbuto, chibwe kulima minda ya vinyu hanji kulanda.’ Yatwaha Shimbi ngwenyi, tukabwe mu mazuwo a makubu ngwe ngeji, hanga tukatwame mu chifuchi chino miaka yinji.

⁸ Yitwononokena Shimbi jeswe jize atuhele kaka Jonadabe. Kutushi kunwa kwetu vinyu nichimwe, chibwe mapwo jetu ni ana jetu.

^9-10 Kutushi kutunga mazuwo a kutwama mo, twakutwama kwetu mu mazuwo a makubu. Kutushi ni minda ya yetwene ya vinyu, ni minda ya mbuto. Hitwononokena yuma yeswe yize kashakulu ketu Jonadabe atwambile.

¹¹ Alioze muze mwanangana Nebukanezore hanjila mu chifuchi, yitubatula kwiza ku Yerusaleme ni kuchina tujita twa Babilonia ni Siria. Kashika twatwama kwetu mu Yerusaleme.”

^12-13 Mba Mwene Zambi, Mukwa Ndundo Jeswe, Zambi ya Israele, yangwamba hanga nguye ngulweze Ayuda ni akwa Yerusaleme maliji wano ngwenyi: “Yami, Mwene Zambi, ngunanuhula ngwami, mumu yika nunalitunu kungubanjika ni kwononokena Shimbi jami?

¹⁴ Vungu lia Jonadabe haanononoka ku Shimbi yenyi, haalituna kunwa vinyu, ndoo ni musono niumwe wa kuli ayo wakunwa vinyu. Alioze yami nanyongonona kuhanjika kuli yenu, hindu yenu kunushi kungwononokena.

¹⁵ Matangwa eswe te nakunutumina tuvumbi twami akwa munanyi. No yaanulweza nwehuke ndako jenu jibi ni kulinga yize yinalite. Haananukanyamisa kulitwamina kuwayila ni kulingila mazambi eka, hanga nutwame miaka yinji mu chifuchi chize hingunanwehe yenu ni tushakulu twenu. Alioze kunwangwivilile ko, kunwangubanjikile ko.

¹⁶ Vungu lia Jonadabe yoononoka ku Shimbi jize aheele kuli kashakulu ko, alioze yenu kunushi kungwononokena yami.

¹⁷ Kashika haliabwila, yami Mwene Zambi, Mukwa Ndundo Jeswe, Zambi ya Israele, munguneha kwonona cheswe chize hingunalakenya hali yenu Ayuda ni akwa Yerusaleme. Munguchilinga mumu kunusolo kubanjika ku yize nakuhanjika kuli yenu, kunushi kutayiza muze nakunutambika.”

¹⁸ Mba yingwambila akwa jimo lia Rekabe maliji waze Mwene Zambi Mukwa Ndundo Jeswe, Zambi ya Israele, hamba ngwenyi: “Yenu hinunononokena Shimbi jize kashakulu kenu Jonadabe anuhele; hinunatayiza yiyulo yenyi yeswe; hinunalingi yeswe yize anwambile.

¹⁹ Kashika yami Mwene Zambi Mukwa Ndundo Jeswe, Zambi ya Israele, hinalakenya ngwami, Jonadabe, mwana wa Rekabe, matangwa eswe mabwa ni mwana lunga ku vungu lienyi yoze mabwa ni kungulingila.”