Jeremia 34 - Mukanda Wa Zambi 1970

Maliji hakutwala kuli mwanangana Zedekia

¹ Mwene Zambi yahanjika ni yami muze mwanangana Nebukanezore wa ku chifuchi cha Babilonia ni tujita twenyi, ni mavungu eswe a mu chiyulo chenyi, yaasa jita ni Yerusaleme ni membo eswe waze te amujingilika.

² Mwene Zambi, Zambi ya Israele, yangutuma kuli Zedekia, mwanangana wa Yuda hanga ngumulweze ngwami: “Yami, Mwene Zambi, mungukunjika limbo lino mu moko ja mwanangana wa Babilonia hanga alioche kahia.

³ Kuuchi kuchina; tujita kumaakukwata ni kukunjika mu moko jenyi. Muumumona meso ni meso ni kuhanjika nenyi; mba muuya ku Babilonia.

⁴ Mwanangana Zedekia, banjika yize ngunambe. Keechi kukushihila mu jita.

⁵ Muukafwa mu uhwimino. Ngwe chize atu te akwocha yitumbo ya vumba libema muze afunjile tushakulu two, waze abwile mianangana shimbu yena te kanda uchibwa ko, ni yena che maakakwochela yuma ya vumba libema. Kumaakakulila nikwamba ngwo: ‘Mama yamiee hiii, mwanangana wetu hafwa!’ Yami Mwene Zambi nachamba.”

⁶ Mba yingulweza mwanangana Zedekia mu Yerusaleme maliji wano,

⁷ muze tujita twa mwanangana wa Babilonia te anase ni akwa limbo. E tujita te kaanase nawa jita ni akwa membo ja Lakishi ni Azeka. Shina membo akukoleka waze aali e asalile mu Yuda.

Ayuda yaatusula ndungo jo, yaakwata nawa

⁸ Mwanangana Zedekia ni akwa Yerusaleme yaabatula kutusula

⁹ ndungo ja Ahebreu, malunga ni mapwo, hanga niumwe kechi kabita usoko wenyi Aisraele.

¹⁰ Atu eswe ni miata jo yaatayiza ngwo: “Mututusula usoko wetu; kutuchi kwapwisa nawa ndungo.” Chenacho aatuswile,

¹¹ alioze kulutwe yaalumuna mbunge jo, yaahilwisa nawa mu undungo ni tachi.

¹² Mba Mwene Zambi,

¹³ Zambi ya Israele, yaangwamba nguhanjike kuli atu, ngwenyi: “Yami nakolesele Usendo ni tushakulu twenu muze naachijile mu chifuchi cha Egiptu ni kwatusula mu undungo. Yingwalweza ngwami,

¹⁴ ha mwaka weswe wa muchishimbiali chaatamba kutusula Kahebreu mweswe yoze halingila miaka yisambano. Alioze tushakulu twenu kaanguvwile ko, kaangubanjikile ko.

¹⁵ Matangwa amwe haabalika, yinwalumuna mbunge jenu, yinulinga yize yinanuwahila. Yenu eswe yinutusula enyembo jenu Aisraele, yinulinga Usendo ku meso jami, mu zuwo lize te nwakunguwayila.

¹⁶ Munwabwamuze yinwalumuna nawa mbunge jenu, yinungulelesa. Yenu eswe yinuhilwisa enyembo jenu mu undungo nawa ni tachi.

¹⁷ Kashika haliabwila, yami Mwene Zambi ngunanwambe ngwami, hinwangukolema. Kunwatuswile ko usoko wenu Aisraele. Nyi Chenacho, mba yami mungukanutusula: utuswilo wa kufwila mu jita, ni wa kufwa ni misongo, ni zala. Mavungu eswe a hashi mungukeevwisa mwongo ha yize mungukanulinga.

^18-19 Akwa kuyula mu Yuda ni mu Yerusaleme, hamwe ni akwa kuyula a mu zuwo lia mwanangana, ni mahako, ni miata eswe yaakunguluka ni kukolesa Usendo ni yami muze endanganyine mukachi ka yipinji yaali ya chimbembe wa kuji yoze te haabatula. Alioze yaashiha Usendo, kaakawile ko ndako jawo. Kashika mungukalinga ngwe chize ayo anakalinga chimbembe wa kuji.

²⁰ Mungukaakunjika ku moko ja akwa kole jo, hanga aashihe, akaalie kuli tujila ni tushitu a mu yambu.

²¹ Mungukakunjika nawa mwanangana Zedekia wa Yuda ni akwa kuyula mu moko ja waze anambe kwashiha. Mungukaakunjika mu moko ja tujita twa Babilonia, waze haalitwamina kwasa nenu jita.

²² Mungukaaha Shimbi, hanga akahiluke nawa ku limbo lino. No maakasa jita ni e akwa limbo, maakatambula lie limbo ni kuliocha kahia. Membo ja Ayuda mungukaapwisa ngwe puya kuze niumwe kechi katwama ko. Yami Mwene Zambi nachamba.”