Jeremia 33 - Mukanda Wa Zambi 1970

^1-2 Muze nabwile mu zuwo lia lamba mu yiize ya zuwo lia mwanangana, Mwene Zambi, yoze watangile hashi ni kululika ho, jina lienyi Mwene Zambi, yeza ni kunguhanjikisa nawa ngwenyi;

³ “Ngutambikenu mba mungunukumbulula ni kunulweza yuma ya kukomwesa ni ya kusweka, yize kuwayinyingikine.

^4-5 Yami Mwene Zambi, Zambi ya Israele, ngunambe ngwami, mazuwo ja Yerusaleme ni zuwo lia mwanangana lia Yuda maakaabuzula. Nunalikatalisa kwasa jita ni Ababilonia waze haalumbika mavu ku chipanga. Chili lume kuzalisa limbo ni afu waze mungulambula ni ufwatulo ni utenu wami. Limbo lino hinaliumba nyima mumu ha yibi yize atu jamo haalinga.

⁶ Alioze mungukawuka akwa limbo eswe, kumaakahinduka. Mungukanjisa jita ni kwaaha uhwimino.

⁷ Mungukayukisa Ayuda ni Aisraele, mungukaatakamisa ngwe chize abwile hatangu.

⁸ Mungukaachiza milonga yize anguvulumwine, mba mungukaakonekena milonga yo ni uhulia wo.

⁹ Yerusaleme mulikabwa limbo lia chiseke, ni ulemu, ni liakuchichimieka nalio. Mavungu eswe a hashi kumaakevwa woma, kumaakachikima muze maakevwa yuma yibema yize hinalinga akwa Yerusaleme, ni chize hinaayukisa.”

¹⁰ Mwene Zambi yamba ngwenyi: “Atu kaakwamba ngwo, muma muno muli ngwe puya, kumushi atu chibwe tushitu. Chili Chenacho; membo ja Ayuda ni majila a mu Yerusaleme kaali amokomoko; kumushi atu chibwe tushitu. Alioze muma muno kumunukevwa mo nawa

¹¹ kukololoka cha uwahililo ni chiseke, ni kusehejela cha umbachiso. Kumunukevwa atu nikwimba muze aneza ku zuwo lia Zambi ni milambu ya kusakwilila nayo; kumaakemba ngwo: ‘Sakwililenu Mwene Zambi Mukwa Ndundo Jeswe, mumu kali mubema, zango lienyi kulishi kuhwa nichimwe.’ Che chifuchi mungukachihilwisa ngwe chize chabwile hatangu. Yami Mwene Zambi nachamba.”

¹² Mwene Zambi Mukwa Ndundo Jeswe yamba ngwenyi: “Chifuchi chino chili ngwe puya, kumushi atu chibwe tushitu; alioze kumumukabwa ulishilo muze tufunga maakatwala mapanga jo.

¹³ Mu membo ku milundu, ni ku mindundena, ni ku sude mu Yuda, ni mu chifuchi cha Benjamine, ni mu yihunda yize yajingilika Yerusaleme, ni mu membo ja Ayuda, tufunga kumaakalwila mo nawa mapanga jo. Yami Mwene Zambi nachamba.”

¹⁴ Mwene Zambi yamba ngwenyi: “Tangwa kulineza lize mungukamanununa chilakenyo chami kuli Aisraele ni Ayuda.

¹⁵ Ha lie tangwa lize mungukatongola mwanangana wa ululi wa ku vungu lia David. Mwanangana yoze makalinga ni ululi mu chifuchi cheswe.

¹⁶ Ayuda ni akwa Yerusaleme mungukaalamwina, maakabwa mu uhwimino. Lie limbo kumaakalivuluka ngwo: ‘Mwene Zambi Chilamwina Chetu.’

¹⁷ Yami, Mwene Zambi, ngunambe ngwami, ku miaka yeswe mu vungu lia David kumuchi kahona mutu yoze makabwa mwanangana wa Aisraele.

¹⁸ Ku miaka yeswe mahako a ku vungu lia Levi maakangulingila ni kungulambula milambu ya kwocha, ni ya mbuto, ni milambu yikwo.”

¹⁹ Mwene Zambi yangwamba ngwenyi:

²⁰ “Nakolesele Usendo ni mwalwa ni ufuku hanga matangwa eswe yikeze ha ola yayo; Usendo uze kuuchi kafwa nichimwe.

²¹ Chimuwika nawa nakolesele Usendo ni kavumbi kami David hanga mu vungu lienyi kumuchi kahona umwe mwanangana ku miaka yeswe. Nakolesele nawa Usendo ni mahako a ku vungu lia Levi hanga akangulingile matangwa eswe; Usendo uze waali kuwahashile kufwa nichimwe.

²² Mungukokesa vungu lia kavumbi kami David ni mahako a ku vungu lia Levi. Atu keechi kahasa kwaalula ngwe chize keeshi kuhasa kwalula matongonoshi a mwilu hanji masekeseke a ku mbumbulu ya kalunga lwiji.”

²³ Mwene Zambi yangwamba ngwenyi:

²⁴ “Hinwasa chinyingi ku yize atu akwamba ngwo, hingunehuka Aisraele ni Ayuda, majiko wano aali waze natongwele, nyi? Kashika kaakwatala ni kaleleso, keeshi kwaalula ngwe vungu.

²⁵ Alioze yami, Mwene Zambi, nguli ni Usendo ni mwalwa ni ufuku; hingunase Shimbi jino jakuyula hashi ni lilu.

²⁶ Ngwe chize nalingile, mungukakolesa Usendo wami ni vungu lia Yakoba ni lia kavumbi kami David. Mungukatongola umwe mutu wa ku vungu lia David ayule mavungu ja Abrahama, ni Isake, ni Yakoba. Mungukevwila atu jami keke ni kwawahisa nawa.”