Jeremia 32 - Mukanda Wa Zambi 1970

Jeremia yalanda munda

¹ Mwene Zambi yanguhanjikisa ha mwaka wa muchikumi wa kuyula cha Zedekia mwanangana wa Yuda, wenawo te we mwaka wa kumi ni nake wa kuyula cha Nebukanezore mwanangana wa Babilonia.

² Ha matangwa waze tujita twa mwanangana wa Babilonia yaasa jita ni Yerusaleme; yami te haangusa mu zuwo lia lamba mu yiize ya zuwo lia mwanangana.

³ Mwanangana Zedekia yangusa mu zuwo lia lamba mumu te hinamba ngwami: “Mwene Zambi yamba ngwenyi: ‘Mungutayiza mwanangana wa Babilonia atambule limbo lino.

⁴ Mwanangana Zedekia kechi kuchina. Mungumukunjika mu moko ja mwanangana wa Babilonia; makamumona meso ni meso nikuhanjika nenyi.

⁵ Zedekia maakamutwala ku chifuchi cha Babilonia kuli Nebukanezore, kwenako makasala ndoo ni kuze mungukamunyonga nawa. Chibwe akase jita ni akwa Babilonia hindu kechi kakumba. Yami Mwene Zambi nachamba.’ ”

⁶ Mwene Zambi yangulweza ngwenyi:

⁷ “Hanamele, mwana wa nokotu Shalume, kumeza kuli yena ni kuhula nyi unazange kulanda munda wenyi ku chihunda cha Anatote mu chifuchi cha Benjamine, mumu yena uli usoko wenyi, uli ni chiyulo cha kuulanda.”

⁸ Hohene, nikulita ni chize ambile Mwene Zambi, musonyami Hanamele yeza kuli yami mu yiize ya zuwo lia mwanangana, yanguhula hanga ngulande munda. Mba yingunyingika ngwami, kuma Mwene Zambi hangulweza cho.

^9-10 Yingulanda we munda wa Hanamele, yingumupezalisa je mbongo; ndando yiibwa ya mbongo ja prata makumi shimbiali. Yingwanda mukanda wa ndando ya we munda, yingusoneka ho jina liami, yela no yaasoneka ho majina jo.

¹¹ Mba yingwanda ye mikanda yaali ya ndando ya munda yakusa kulu chinyingi: umuwika wa kukasa uze uli ni Shimbi ja kulanjisa, ukwo wa kukasulula.

¹² Yinguyihana kuli Baruke, mwana wa Neria mujikulu wa Maseya. Yingumuhela yo ku meso ja Hanamele ni ku meso ja yela waze asonekene majina jo ha mukanda wa ndando, ni ku meso ja atu eswe waze te anatwama mu yiize ya mwanangana.

¹³ Mba yingwambila Baruke ku meso ja atu eswe ngwami:

¹⁴ “Mwene Zambi Mukwa Ndundo Jeswe, Zambi ya Israele, hanakwambe utambule mikanda yino, uze wa kukasa ni uze wakukasulula, ni kuyisa mu mulondo wa uma, hanga yikalinduluke miaka yinji.

¹⁵ Mwene Zambi Mukwa Ndundo Jeswe, Zambi ya Israele, hanambe ngwenyi, mazuwo, ni minda ya mbuto, ni ya vinyu, atu kumaakayilanda nawa mu chifuchi chino.”

Jeremia yalemba

¹⁶ Muze hinahana mukanda kuli Baruke, yingulemba ngwami:

¹⁷ “Mwene Zambi, yena watangile lilu ni hashi ku ndundo je jahiana; kukushi Chuma nichimwe chize muchikukalila yena.

¹⁸ Hiunalweze zango lie lize kulishi kuhwa kuli tununu twa atu; alioze wakumwesa nawa atu lamba mumu ha milonga ya yisemi jo. Yena uli Zambi munene ni wa tachi, Mukwa Ndundo Jeswe.

¹⁹ Yena uli ni manyonga anji wa kulinga yuma ya ndundo. Kuwakumona yuma yeswe yize atu akulinga, kuwakwakundulula nikulita ni yitanga yo.

²⁰ Ku shakulu walingilie yilayi ni yikomokeso mu Egiptu; kuwakuyilinga ndoo ni musono uno mu Israele ni mukachi ka mavungu akwo. Kashika haliabwila atu haakunyingika kweswe.

²¹ Watuhwishile atu je Aisraele mu Egiptu ni ndundo; wachilingile ni yilayi ni yikomokeso, yize yevwishile akwa kole jetu mwongo.

²² Yiwaaha chifuchi chino cha chinuno, ngwe chize walakenyene tushakulu two.

²³ Alioze muze haanjila mo, haachizuka, kononokene ko ku Shimbi je hanji kufunga longeso lie; kaalingile ko nichimwe cha yuma yize waalwezele. Kashika yiwaamwesa lamba lino lieswe.

²⁴ “Ababilonia haaseleka limbo, haalumbika mavu a kuswama, kaanase jita. Mumu ha jita, ni zala, ni misongo, akwa limbo maaholokela mu moko ja akwa kole jo. Kuma, yeswe yize wambile hiyamanunuka.

²⁵ Hindu yena Mwene Zambi unangwambe ngulande we munda ku meso ja yela, chibwe limbo kaanalitambula kuli akwa Babilonia.”

²⁶ Mba Mwene Zambi yangwamba ngwenyi:

²⁷ “Yami nguli Mwene Zambi, Zambi ya atu eswe. Kukushi nichimwe chize chinangukalila.

²⁸ Mungukunjika limbo lino mu moko ja mwanangana Nebukanezore wa Babilonia ni tujita twenyi. Kumaalitambula

²⁹ ni kuliocha kahia. Kumaaliocha hamwe ni mazuwo ja waze haanangwihi ha kwochela Bale yuma ya vumba libema ha mafulumba, ni kuzujila vinyu kuli mazambi eka.

³⁰ Aisraele ni Ayuda hasuku achiza kungusosomba ni kunguvwisa utenu mumu ha yitanga yo yibi.

³¹ Akwa limbo lino haanangwihi ngutenuke, ngwivwe ufwatulo chize kuze atungile lie limbo. Hingunabatula kulibuzula,

³² mumu ha wubi weswe uze haanalingi Ayuda ni akwa Yerusaleme, hamwe ni mianangana, ni miata, ni mahako, ni akwa munanyi jo.

³³ Haanangumbu nyima. Chibwe nanyongonwene ni kwalongesa, hindu kaangubanjikile ni kaalilongesele ko.

³⁴ Haanase mazambi jo a yizelwokeso mu zuwo lize atungile lia kunguwayila, haanalipwisa lia luchisa.

³⁵ Haanatungila hamba Bale yilumbilo mu chikulo cha Hinome, ya kulambula ana jo a malunga ni a mapwo milambu kuli zambi yo Moleke. Yami chaalwezele cho kuchilinga, ni mwene kuchabwile ko mu manyonga jami ha kulinga Chuma chize ni kuvulumwisa Ayuda.”

Chilakenyo: Aisraele kumaakahiluka nawa mu chifuchi cho

³⁶ Mwene Zambi, Zambi ya Israele, yangwamba ngwenyi: “Jeremia, atu kaanambe ngwo, jita, ni zala, ni musongo muyikunjika akwa limbo lino mu moko ja mwanangana wa Babilonia. Haliabwila banjika maliji wano ngunawezela ngwami,

³⁷ mungukakungulula atu chize kuze naamwanginyine ni ufwatulo ni utenu. Mungukaahilwisa mu chifuchi chino hanga abwe mu uhwimino.

³⁸ Mba maakabwa atu jami, ni yami mungukabwa Zambi yo.

³⁹ Mungukaaha nyonga limuwika lia kungulemesa matangwa eswe, mumu ha yibema yo ene ni ha yibema ya vungu lio.

⁴⁰ Mungukakolesa no Usendo ku miaka yeswe. Chichi kalitwamina nichimwe ha kwalingila yibema, mungukaapwisa akwa kunguvwila woma ni mbunge jo jeswe, hikeechi kangwehuka nawa nichimwe.

⁴¹ Munguwahilila ni kwalingila yuma yibema; mungukatwamisa mu chifuchi chino matangwa eswe.

⁴² “Ngwe chize namwesene atu wano lamba, Chenacho mungukawahisa nawa ngwe chize naalakenyene.

⁴³ Atu kaakwamba ngwo, chifuchi chino muchikabwa puya muze atu chibwe tushitu kaahashile kutwama mo; maakachihana kuli Ababilonia. Alioze minda kumaakayilanda nawa mu chifuchi chino.

⁴⁴ Atu kumaakayilanda, ni ha ye mikanda maakasoneka ho majina ni yinyingi, ni ye mikanda maakayikasa. Chino muchikabwa mu chifuchi cha Benjamine mu yihunda yize yajingilika Yerusaleme, ni mu membo ja Ayuda, ni mu membo a ku milundu, ni mushi lia milundu, ni ku sali lia sude mu Yuda. Mungukahilwisa atu mu chifuchi cho. Yami Mwene Zambi nachamba.”