Jeremia 31 - Mukanda Wa Zambi 1970

Kuhiluka cha Aisraele ku chifuchi cho

¹ Mwene Zambi ngwenyi: “Tangwa kulineza lize mungukabwa Zambi ya mavungu eswe ja Aisraele, no maakabwa atu jami.

² Mu puya nalwezele keke atu eswe waze ambile kufwa. Muze Aisraele afupile uhwimino,

³ nakatukile kusuku ni kusoloka kuli ayo. Yenu Aisraele, matangwa eswe te nakunuzanga; Chishi kulitwamina kunulweza zango liami.

⁴ Mungukanutungisa nawa. Munukemba nawa miyaya yenu ni kuhangana ni chiseke.

⁵ Munukatumba nawa minda ya vinyu ha mulundu wa Samaria; atu waze maakayilima maakalia mihuko yayo.

⁶ Ewa, tangwa kulineza lize tufunga maakakololoka ha milundu ya Efraime ngwo: ‘Tukandukenu ku Zione, kuli Mwene Zambi, Zambi yetu.’ ”

⁷ Mwene Zambi kanambe ngwenyi: “Embilenu Aisraele ni uwahililo, vungu linene liahiana. Embenu mwaso wenu wa kuchichimieka ngwenu: ‘Mwene Zambi halamwina atu jenyi; halamwina masalila eswe.’

⁸ Mungukaachiza ku chifuchi cha ku norde, ni kwakungulwila ku masongo a hashi. Hakachi ko, tupuputa, ni yilema, ni tufumbakaji, ni waze ali ni misongo ya kusema, maahiluka mu mbunga yinene.

⁹ Atu jami maakahiluka nikulila, nikulemba muze mungukaahilwisa. Mungukaasongwela ku mashima ja meya, mu jila yalulama muze keechi katalinga. Yami nguli tato ya Aisraele, Efraime mwe mwanami mutangu wa lunga.”

¹⁰ Mwene Zambi kanambe ngwenyi: “Yenu mavungu, banjikenu, ambujolenu maliji jami ku yifuchi ya kusuku. Hingunamwange atu jami, alioze mungukaakungulula, ni kwafunga ngwe chize kafunga akufunga mapanga jenyi.

¹¹ Hingunakulu Aisraele, hingunaalamwina ku vungu lia tachi.

¹² Kumaakeza nikwimba ni chiseke ha mulundu wa Zione. Kumaakawahilila ni yawana yami, yawana ya mbuto, ni vinyu, ni maji a olive, ni ya mapanga, ni ngombe. Kumaakabwa ngwe minda yize yili ni meya; kumaakabwa ni yuma yeswe yize anazange.

¹³ Mba ana mapwo kumaakahangana ni chiseke, ni makulwana, ni akweze, ni tushinakaji, maakalikwiza. Mungukalembejeka ni kwalumuna kulila cho chikabwe uwahililo, chinyengo cho chikalumuke chiseke.

¹⁴ Mungukayukisa mahako ni yakulia ya maji, atu jami maakuta ni yakulia yami yibema. Yami Mwene Zambi nachamba.”

Mwene Zambi yevwila Aisraele keke

¹⁵ Mwene Zambi kanambe ngwenyi: “Atu kaanevu milolo mu Rama, malilo ni kunenganyana kuhiana. Rashele kanalilila ana jenyi; kasolo kutayiza amulembejeke, mumu keeshiko.

¹⁶ Litwamine kulila, kusumuna masoji je. Yeswe yize hiunalingi mumu hali ana je makakukundulula yo; maakakatuka mu chifuchi cha akwa kole, nikuhiluka.

¹⁷ “Sako mbunge ku yuma yize muyiza ho; ana je kumaakahiluka ku chifuchi cho. Yami Mwene Zambi nachamba.

¹⁸ “Hinevwa Aisraele kaanatu mikuma nikwamba ngwo: ‘Mwene Zambi, twabwile ngwe kashitu yoze kaafumbile ko, alioze yena hiwatufumba hanga tuhomboke. Tuhilwise kama; hitwalilulika kulu kuhiluka kuli yena, Mwene Zambi, Zambi yetu.

¹⁹ Twakwehukile, alioze susumuku yituzanga kuhiluka. Muze hiwatumwesa lamba, yitulilamba ha mabambo mumu ha chinyengo. Yitwivwa sonyi kuhiana, mumu ha milonga yetu ya ukweze.’

²⁰ “Israele yena uli mwanami yoze nakuzanga kuhiana. Muze nakwalakana jina lie, nakukunyonga ni zango. Mbunge yami yakulibikala mumu hali yena; mungukuvwila keke.

²¹ Senu yinyingi mu majila, fupenu jila yize nwejilile muze nwachinyine. Yenu Aisraele, hilukenu, hilukenu ku mahienu ku membo waze nwahichikile.

²² Shimbu lika munwecha kama kuyambashana, yenu akwa ufulielo ukepe? Hinalinga chimwe Chuma chaha chalibalikila, chili ngwe pwo unafungu lunga lienyi.”

Yiwape yize muyiza ho kuli atu ja Zambi

²³ Mwene Zambi Mukwa Ndundo Jeswe, Zambi ya Israele, kanambe ngwenyi: “Muze mungukahilwisa Aisraele mu chifuchi cho, atu maamba nawa mu chifuchi cha Yuda ni mu membo jacho ngwo: ‘Mwene Zambi awahise kama mulundu wa chijila wa Yerusaleme, homa ha chijila haze atwama.’

²⁴ Atu kumaakatwama mu chifuchi cha Yuda ni mu membo jacho, kumaakatwama kanawa, tufunga ni e mapanga jo.

²⁵ Munguhwimisa mbunge ja waze anahongo, ni kuyukisa ni yakulia waze haalekumuka ni zala.

²⁶ Mba, atu maakamba ngwo: ‘Nayanga mu tulo, nahinduka kanawa.’ ”

²⁷ Mwene Zambi kanambe ngwenyi: “Tangwa kulineza lize mungukazalisa yifuchi ya Israele ni ya Yuda ni atu ni tushitu.

²⁸ Ngwe chize naahumine, naamwesene lamba, noonwene, Chenacho nawa mungukahilwisa ni kwatakamisa.

²⁹ Muze lie tangwa hilieza, atu hikeechi kwamba nawa ngwo: ‘Yisemi haalia vinyu yisasu, mu makanwa ja ana jo himwabangaminya.’

³⁰ Alioze mweswawo malia vinyu yisasu, mazo jenyi maakabangaminya; mutu mweswe mafwila mulonga wenyi mwene.”

³¹ Mwene Zambi kanambe ngwenyi: “Tangwa kulineza lize mungukakolesa Usendo Waha ni Aisraele ni Ayuda.

³² Kuuchi kabwa ngwe Usendo uze nakolesele ni tushakulu two muze naatuhwishile ni kwoko liami mu Egiptu. Chibwe nabwile ngwe lunga lio, hindu kaafungile ko we Usendo.

³³ Usendo Waha uze mungukakolesa ni Aisraele muukabwa ngwe chino: mungukasa Shimbi jami mu mbunge jo. Mungukabwa Zambi yo, no maakabwa atu jami.

³⁴ Niumwe kechi kalongesa mwenyembo wa mu chifuchi chenyi kunyingika Mwene Zambi, mumu eswe kumaakangunyingika, chize kuli twanuke ndoo kuli makulwana. Mungukakonekena milonga yo, chichi kewuluka nawa uhenge wo. Yami Mwene Zambi nachilinga.”

³⁵ Mwene Zambi kakutwaha tangwa lia kututemwina ha mwalwa, kakweji ni matongonoshi ha ufuku. Kakuvundula kalunga lwiji hanga abwe ni lundunjila; Jina lienyi Mwene Zambi Mukwa Ndundo Jeswe.

³⁶ Yalakenya ngwenyi, vungu lia Israele maakalinduluka, ndoo ni kuze yuma yeswe atangile Zambi muyikahwa.

³⁷ Nyi ngwe limwe tangwa atu maakeseka lilu, ni kuhengula fundamentu ya hashi, kachi Zambi neye makalituna Israele. Yami Mwene Zambi nachamba.

³⁸ Mwene Zambi kanambe ngwenyi: “Tangwa kulineza lize atu maakatungulula Yerusaleme mweswe, chize ku zuwo lisuku liakukoleka lia Hananele ku chitokelo ndoo ku chikolo cha Ha Mbango.

³⁹ Njiza muyikatuka kwe kuze ni kuya ku chitokelo ku mulundu wa Garebe, muyijingilika ndoo ku Goa.

⁴⁰ Chikulo cheswe kuze akufunda afu ni kumbila ko yiswaswa, ni minda yeswe ya ku tunda ya chitwetwe cha Kidrone ndoo ni ku chikolo cha Kavwalu ku chivumbuko, muchikabwa cha chijila. Limbo kechi kalibuzula nawa hanji kulionona.”