Jeremia 30 - Mukanda Wa Zambi 1970

Yilakenyo ya Mwene Zambi kuli atu jenyi

¹ Mwene Zambi, Zambi ya Israele, yangwamba ngwenyi:

² “Soneka mu mukanda maliji eswe nakulweza,

³ mumu tangwa kulineza lize mungukahilwisa atu jami, Aisraele ni Ayuda. Mungukaaneha mu chifuchi chize nahanyine kuli tushakulu two, mba maakazuka nawa chihinga cho. Yami, Mwene Zambi, nachamba.”

⁴ Mwene Zambi yambila Aisraele ni Ayuda ngwenyi:

⁵ “Ngunevu chize atu anatete ni mwongo, anatete ni woma.

⁶ Uhwimino wakuhi. Achimanenu nuchinyonge! Lunga mahasa kusema mwana, nyi? Kuchi mba ngunamono lunga mweswe kanakwata moko mu chiminga, ngwe pwo yoze Unevu misongo ya kusema? Mumu yika atu eswe akuyiza?

⁷ Tangwa lia lamba hiliakundama; kukushi tangwa likwo lize mulilifwa nalio. Lili tangwa lia lamba lia atu jami, alioze keechi kwoonona liakulu.”

⁸ Mwene Zambi Mukwa Ndundo Jeswe kanambe ngwenyi: “Muze lie tangwa hilieza, mungukabatula kanga lize lili ha kota jo ni kukasulula ngoji jo ja utale, hikeechi kubwa nawa ndungo ja tundaka.

⁹ Alioze maakalingila yami Mwene Zambi, Zambi yo, ni umwe mutu wa ku vungu lia David, yoze mungukapwisa mwanangana.

¹⁰ “Yenu atu jami, kanda nwivwa woma; yenu Aisraele, kanda nwivwa mwongo. Mungukanulamwina ku chifuchi chisuku, kuze nuli funge. Munukahiluka ku mahienu ni kubwa mu uhwimino; munukabwa ni sambukila, niumwe kechi kanuvwisa nawa woma.

¹¹ Mungukeza kuli yenu ni kunulamwina. Mungukonwona mavungu eswe kuze nanumwanginyine, alioze yenu chichi kanwonona. Mungukanumwesa lamba, alioze hi linji ko. Yami, Mwene Zambi, nachamba.”

¹² Mwene Zambi yambila atu jenyi ngwenyi: “Yilonda yenu kuyichi kuya, mbandu jenu kujichi kujimuka.

¹³ Kukushi niumwe yoze makanufunga, kukushi yitumbo ya kuwuka yilonda yenu, kanda nusako mbunge yakunuwuka.

¹⁴ Masepa jenu eswe haanuvulama; keeshi kunuzanga nawa. Hinakulamba ngwe mukwa kole; lamba lienu hiliabwa likalu, mumu milonga yenu yoka naye, ni ungulungulu wenu unahiana.

¹⁵ Kanda nunenganyana mumu ha yikola yenu; kunuwuka kuchishi ko. Lamba lino ngunanumwesa mumu milonga yenu yoka naye, ni ungulungulu wenu unahiana.

¹⁶ Alioze eswe waze ananumwesa lamba, no kumaakamwesa lamba, akwa kole jenu eswe kumaatwama mu ufunge. Eswe waze akunubinjisa no kumaakaabinjisa, eswe waze maabuba ubite wenu no kumaakaabuba ubite wo.

¹⁷ Kumungukanuwuka nawa; kumungukawuka yilonda yenu. Chibwe akwa kole jenu maakamba ngwo: ‘Zione haamumbila; niumwe unamunyongena.’ Yami, Mwene Zambi, nachamba.”

¹⁸ Mwene Zambi kanambe ngwenyi: “Mungukahilwisa atu jami mu chifuchi cho, ni kuvwila akwa majiko eswe keke; Yerusaleme kumaakamutungulula, ni zuwo lia mwanangana kumaakalitungulula.

¹⁹ Atu eswe waze atwama ko kumaakemba uhaliso; kumaakakololoka ni chiseke. Mungukaawahisa ni kwookesa; ni kwaalemesa.

²⁰ Mungukahilwisa tachi ja atu jami ngwe hatangu, ni kwatakamisa nawa; mungukamwesa lamba eswe waze maakaabinjisa.

^21-22 Mukwa kwayula makakatuka ku vungu lio ene, mwana wa mwanangana wo makabwa wa kuli ayo ene. Muze mungukamutambika kumakangukundama, mumu iya mahasa kukundama nyi yami chamutambikile? Kumaakabwa atu jami, ni yami mungukabwa Zambi yo. Yami Mwene Zambi nachamba.”

^23-24 Utenu wa Zambi uli ngwe kangonga, ngwe fuji ya tachi yize muyihuhwa ha mitwe ya yingulungulu. Songo kulishi ko ndoo halinga cheswe chize anazange kulinga. Matangwa kumaakeza muze atu jenyi maakachinyingika mwazu.