Jeremia 3 - Mukanda Wa Zambi 1970

Uhulia wa Israele

¹ Mwene Zambi kanahula ngwenyi: “Nyi lunga halakula pwo lienyi, hamumbata kuli lunga weka, kuma lunga mutangu mahasa kumuhilwisa ku mahienyi, nyi? Ka, nyi wachilinga chifuchi muchibiha liakulu. Alioze yenu Israele, ukwete akwa zango anji, hindu haliabwila unazange kuhiluka kuli yami!

² Achitala ha mulundu. Hali kama hamwe homa hasala haze kanda ulingila utanji, nyi? Te wakushimbwila akwa zango lie mu majila, ngwe chize akulinga umwe mukwa Arabe mu puya. Hiwachisa chifuchi ni utanji we.

³ Kashika vula musazu kanokene ko, ni vula wa mubatuko neye kanokene ko. Chi bwe ku meso je wamonekene ngwe chitanji, kuushi kwivwa sonyi.

⁴ “Ni haliabwila unanguvuluka yami Mwene Zambi ngwe: ‘Yena uli tata, hiunanguzange chize ku wanuke wami.

⁵ Kuuchi kubwa ni ufwatulo matangwa eswe.’ Israele, ayo ye wakwamba, alioze wakulinga yibi yeswe yize wakuzanga.”

Israele ni Yuda chaatamba kwalumuka ku mbunge

⁶ Muze Josia abwile mwanangana, Mwene Zambi yanguhula ngwenyi: “Wamona chize alinga Israele, pwo yoze chitanji? Hangwehuka, halinga utanji ha milundu yeswe ni mushi lia mitondo yeswe ya wisu.

⁷ Nanyongene ngwami, muze halinga yino yeswe, mahiluka kuli yami, alioze kahilukile ko. Ni mwanakwo Yuda chitanji, neye kamona yize yeswe.

⁸ Yuda neye hamona ngwenyi, yami Mwene Zambi hinalakula Israele, hinamwehuka mumu kahilukile ko kuli yami, mumu halinga utanji. Alioze chihulia Yuda, mwanakwo ya Israele, kevwile ko woma, neye yabwa chitanji.

⁹ Kevwile ko sonyi nichimwe, yabihisa che chifuchi nikulinga utanji ni kuwayila mawe ni mitondo.

¹⁰ Mwabwamuze Yuda chihulia, mwanakwo ya Israele, himalihambahamba ha kuhiluka kuli yami, alioze kabwile ko lume mukwa kushishika. Yami Mwene Zambi nachamba.”

¹¹ Mba Mwene Zambi yangwamba ngwenyi: “Chibwe Israele hanangwehuka, te keshi mubi kuhiana ngwe Yuda chihulia.”

¹² Yangutuma ni kulweza Israele ngwenyi: “Yena chihulia, hiluka kuli yami. Nguli mukwa keke, chichi kutenuka, chichi kukutenukina ndoo ku miaka yeswe.

¹³ Tayiza lume ngwe: ‘Ngunahi. Nakatukilile Mwene Zambi, Zambi yami.’ Shikisa ngwe, ‘Mushi lia mitondo yeswe ya wisu hingunazange mazambi a tundaka, Chononokenene ko ku maliji je.’ Yami Mwene Zambi nachamba.

¹⁴ “Yenu yihulia, hilukenu kuli yami. Mungwanda umuwika umuwika ku chihunda cheswe, aali aali a ku jiko lieswe, ni kunuhilwisa ku mulundu wa Zione.

¹⁵ Mungunwaha akwa kuyula waze akungwononokena, maakanuyula ni mana ni yinyingi.

¹⁶ Muze munukabwa anji mu che chifuchi, atu keechi kahanjeka nawa hakutwala ku mushete wa Usendo wami. Hikeechi kaunyonga nawa hanji kuwiwuluka; keechi kauzanga nawa, hanji kuulingila nawa.

¹⁷ Muze tangwa lize mulikeza, Yerusaleme maakamuvuluka ngwo: ‘Chitwamo cha Mwene Zambi,’ ni mavungu eswe maakakunguluka ko ni kuwayila. Keechi kabwa nawa ni pami ja kulinga yuma ya ungulungulu.

¹⁸ Israele makalichinga ni Yuda. Eswe aali maakakatuka hamuwika mu chifuchi cha undungo ku norde ni kuhiluka mu chifuchi chize nahanyine kuli tushakulu twe kubwa chihinga che ku miaka yeswe.”

Atu ja Zambi yaakombelela mahamba

¹⁹ Mwene Zambi kanambe ngwenyi: “Israele nambile kukupwisa mwanami, ni kukwaha chifuchi chibema, chifuchi chinahiana yifuchi yeswe ya hano hashi kubema. Nazangile te unguvuluke ngwe tata, kungwehuka nawa ka.

²⁰ Alioze yiubwa ngwe pwo chitanji, kuwabwile ko mukwa kushishika. Yami Mwene Zambi nachamba.”

²¹ Zungo lili ko helu lia milundu, Aisraele kaanatete nikuliumba, mumu haanavulumuna, haanavulama Mwene Zambi, Zambi yo.

²² Hilukenu, yenu eswe waze nwehukile Mwene Zambi, kumanuwuka, manupwisa akwa ululi. Nwakwamba ngwenu: “Ewa, tuneza kuli Mwene Zambi, mumu kali Zambi yetu.

²³ Muze twawayililile mazambi a tundaka helu lia milundu kuchatukwashile ko nichimwe. Ku kwasa cha Aisraele kuchakwiza shina kuli Mwene Zambi, Zambi yetu.

²⁴ Mumu ha kukombelela hamba Bale, zambi ya sonyi, tunakatokesa yimuna yetu ni ana jetu ni mihuko yeswe ya kuhondangana cha tushakulu twetu.

²⁵ Chinalite yetu kubomba hashi mumu ha sonyi, tulifukenu blankete ni sonyi. Yetu ni tushakulu twetu te twakuvulumiona matangwa eswe ku meso ja Mwene Zambi, Zambi yetu; kutwafungile ko Shimbi jenyi.”