Jeremia 28 - Mukanda Wa Zambi 1970

Jeremia ni mukwa munanyi Hanania

¹ Ha we mwaka uze, mu kakweji wamuchitano ha mwaka wa muchiwana wa kuyula cha mwanangana Zedekia, Hanania mwana wa Azure, mukwa munanyi wa ku limbo lia Gibeone, yanguhanjikisa mu zuwo lia Zambi. Ku meso ja mahako ni atu eswe

² yangwamba ngwenyi: “Mwene Zambi Mukwa Ndundo Jeswe, Zambi ya Israele, hamba ngwenyi: ‘Hinahwisa tachi ja mwanangana wa Babilonia.

³ Muze miaka yaali hiyahwa munguhilwisa yuma yeswe ya mu zuwo lia Zambi yize ambachile mwanangana wa Babilonia.

⁴ Munguhilwisa nawa mwanangana wa Yuda Jehoakine, mwana wa Jehoakime, ni Ayuda eswe waze atwalile mu undungo mu Babilonia. Ewa, munguhwisa tachi ja mwanangana wa Babilonia. Yami Mwene Zambi nachamba.’ ”

⁵ Mba kwe ku meso ja mahako ni atu eswe waze te anamana mu zuwo lia Zambi, yingwambila Hanania ngwami:

⁶ “Chamwenemwene, ni yami mwene che ngunazange. Yami nawa ngunazange Mwene Zambi achilinge. Ahilwise kama atu eswe atwalile mu undungo ku Babilonia ni yuma yeswe ya mu zuwo lia Zambi.

⁷ Alioze banjikenu yize ngunambe kuli yenu ni kuli atu eswe.

⁸ Akwa munanyi waze ahanjekele ku shakulu shimbu te yami ni yena kanda tusemuka, te kaakwambujola ngwo, jita, ni zala, ni misongo muyikeza hali mavungu ni mawanangana anji.

⁹ Alioze nyi umwe mukwa munanyi malongesa ngwenyi ‘Uhwimino muubwa,’ atu maashindakenya ngwo, kali mukwa munanyi yoze Mwene Zambi hanatumu, shina nyi longeso lienyi mulikamanunuka.”

¹⁰ Hohene Hanania yachiza kanga ha kota yami, yayibatwola,

¹¹ mba yamba ku meso ja atu eswe ngwenyi: “Mwene Zambi kanambe ngwenyi: ‘Chenacho mungubatwola kanga lia mwanangana Nebukanezore yize hanajichika ha kota ya mavungu eswe.’ Makachilinga muze miaka yino yaali hiyahwa.” Hohene yami yingutuhuka.

¹² Muze amwe matangwa haabalika Mwene Zambi yangwamba

¹³ nguye ngulweze Hanania ngwami: “Mwene Zambi kanambe ngwenyi: ‘Yena hiwabatula kanga lia mutondo, alioze yami mungusalakanyisa ho kanga lia utale.’

¹⁴ Mwene Zambi Mukwa Ndundo Jeswe, Zambi ya Israele, hamba ngwenyi: ‘Mungujichika kanga ya utale hali mavungu wano eswe. Mba kumaalingila mwanangana wa Babilonia.’ Hamba nawa ngwenyi: ‘Chibwe tushitu a mu yambu kumaalingila mwanangana Nebukanezore.’ ”

¹⁵ Yingulweza Hanania maliji wano ni kuweza ho ngwami: “Banjika, Hanania! Mwene Zambi kakutumine ko; yena kuwakwonga atu wano.

¹⁶ Kashika Mwene Zambi iye Mwene kanambe ngwenyi: ‘Kumungukuchiza hano hashi. Mwaka uno wene kumuufwa, mumu hiwalweza atu alimike ni yami Mwene Zambi.’ ”

¹⁷ Ha kakweji wa muchishimbiali, ha mwaka uze wene Hanania yafwa.