Jeremia 27 - Mukanda Wa Zambi 1970

Jeremia yalijichika kanga ni yikaba ha kota

¹ Muze Josia mwana wa Zedekia habwa mwanangana wa Yuda, Mwene Zambi yangwamba ngwenyi:

² “Lilingile kanga ni ukende yikaba, ulijichike ha kota.”

^3-5 Mba Mwene Zambi yangwamba nawa ngwenyi: “Yako uhanjike ni akwa kuyula waze anakeza ku Yerusaleme ni kutala mwanangana Zedekia, ulweze mianangana a yifuchi ya Edome, ni Moabe, ni Amone, ni a membo ja Tiru ni Sidone maliji wano ngwe: ‘Yami Mwene Zambi Mukwa Ndundo Jeswe, Zambi ya Israele, natangile hashi, ni atu eswe, ni tushitu eswe ni kwoko liami lia chindume, nakuyihana kuli mweswawo ngunazange.

⁶ Yami nasele mavungu wano eswe mu chiyulo cha kavumbi kami mwanangana Nebukanezore wa Babilonia, yingusa nawa tushitu a mu yambu amulingile.

⁷ Mavungu eswe kumaamulingila; maakalingila nawa mwanenyi ni mujikulu wenyi ndoo ni kuze wanangana wenyi muukasula. Ha matangwa waze atu jenyi maakalingila mavungu eka alemu, ni mianangana eka a tachi.

⁸ “ ‘Alioze nyi limwe vungu hanji umwe mwanangana keechi kuzeyela ku chiyulo chenyi, mba yami mungukamwesa vungu lize lamba mu jita, ni zala, ni musongo, ndoo mungukatayiza Nebukanezore kulimanununa liakulu.

⁹ Kanda nubanjika kuli akwa munanyi jenu, hanji umwe yoze unalichichimieka ngwenyi, mahasa kwambujola yuma yize muyiza ho, chibwe ya ku yilota, hanji ya kuhanjika ni afu ni tufutafuta. Ayo eswe kaananwambe ngwo, kanda nuzeyela kuli mwanangana wa Babilonia.

¹⁰ Kananwongo. Nyi ka, akwa kole maakanutwala ku chifuchi kusuku mumu hali ayo. Mungunutuhwisa hanga anwonone.

¹¹ Alioze nyi limwe vungu maazeyela kuli mwanangana wa Babilonia ni kumulingila, mba mungwatayiza kutwama mu chifuchi cho ene ni kulima mo. Yami, Mwene Zambi, nachamba.’ ”

¹² Nalweza mwanangana Zedekia wa Yuda maliji waze ene ngwami: “Zeyela kuli mwanangana wa Babilonia. Umulingile, ni e atu jenyi, mba nubwe ni mwono.

¹³ Mumu yika yena ni atu je munufwila mu jita, chibwe ni zala, hanji ni musongo? Mwene Zambi kanambe kumuchibwa ku vungu lize keeshi kuzeyela kuli mwanangana wa Babilonia.

¹⁴ Kanda nubanjika kuli akwa munanyi waze ananwambe ngwo: ‘Kanda nuzeyela kuli mwanangana wa Babilonia. Kaananwongo!’

¹⁵ Mwene Zambi iye mwene hamba ngwenyi: ‘Chaatumine ko kwami. Kaananwongo mu jina liami.’ Ha chino, mungunutuhwisa mu chifuchi chenu hanga anushihe, yenu ni e akwa munanyi jenu waze akunulweza yuma ya mahuza.”

¹⁶ Mba yingulweza mahako ni atu maliji waze Mwene Zambi ambile ngwenyi: “Kanda nubanjika kuli akwa munanyi waze anambe ngwo: ‘Yuma ya mu zuwo lia Zambi yize anakatwala ku Babilonia, ha shimbu likepe maayihilwisa.’ Kaananwongo.

¹⁷ Kanda nwabanjika. Zeyelenu kuli mwanangana wa Babilonia mba nubwe ni mwono! Mumu yika limbo lino mulibuzukila?

¹⁸ Nyi kaali akwa munanyi amwenemwene, nyi kaali ni longeso liami, anguhule yami Mwene Zambi Mukwa Ndundo Jeswe hanga akwa kole keechi kanda yikashi yize yasala mu zuwo lia Zambi ni mu zuwo lia mwanangana ni kuyitwala ku Babilonia.”

^19-20 (Muze mwanangana Nebukanezore atwalile mwanangana wa Yuda mu Babilonia, Jehoakine mwana wa Jehoakime, ni akwa lutwe ja Ayuda ni Yerusaleme, yahichika manguji, ni luchitende lwa unengu, ni yimanyino, ni yimwe yuma ya mu zuwo lia Zambi.)

²¹ “Banjikenu yize yami Mwene Zambi Mukwa Ndundo Jeswe, Zambi ya Israele, ngunambe hakutwala ku yuma yize yasala mu zuwo lia Zambi ni mu zuwo lia mwanangana mu Yerusaleme.

²² Kumaayitwala mu Babilonia; kwenako muyikasala ndoo ni muze yami mwene mungukayinyonga nawa. Mba mungukayihilwisa ni kuyineha kuno. Yami, Mwene Zambi, nachamba.”