Jeremia 26 - Mukanda Wa Zambi 1970

Akwa lutwe yaasopesa Jeremia

¹ Muze Jehoakime mwana wa Josia habwa mwanangana wa Yuda,

² Mwene Zambi yangwamba ngwenyi: “Mana mu yiize ya zuwo lia Zambi, wambujole yeswe yize hinakwamba kulweza atu waze aneza ku membo ja Ayuda ni kuwayila ko. Kanda uhichika liji nilimwe.

³ Hanji atu maabanjika kama ni kwehuka majila jo abi. Nyi ngwe achilinga kama, mba mungwalumuna mbunge yami hakutwala ku kwonona chize hinabatula hali ayo mumu ha ungulungulu wo.”

⁴ Mwene Zambi yahanjika nikulweza atu ngwenyi: “Yami, Mwene Zambi, hinamba ngwami, chatamba kungwononokena ni kufunga longeso lize hinanulongesa,

⁵ ni kukanyama ku maliji a tuvumbi twami, akwa munanyi, waze te nakunutumina. Kunwalingile nichimwe yuma yize anulongesele.

⁶ Nyi nwabwa lume yihulia, mba mungulinga ku zuwo lino ngwe chize nalingile ku Shilo. Mba mavungu eswe a hashi maavuluka limbo lino mu mashingo jo.”

⁷ Mahako, ni akwa munanyi, ni atu eswe yeevwa maliji jami mu zuwo lia Zambi.

⁸ Mba muze hinamanununa maliji eswe waze Mwene Zambi angwambile kuhanjika, yaangukwata nikukololoka ngwo: “Yena unatela kufwa ha chikuma chino!

⁹ Mumu yika hiwamba mu jina lia Mwene Zambi ngwe, zuwo lino kumulibwa ngwe Shilo, chikwo ngwe, limbo lino mulibwa yikulu, mutu niumwe kechi kutwama mo nawa?” Mba atu yaangulundumukina.

¹⁰ Muze miata ja Ayuda heevwa yuma yize, yaakatuka kapupushi ku zuwo lia mwanangana, yaaya ku zuwo lia Zambi, yaanda yitwamo yo, yaatwama ku chikolo Chaha.

¹¹ Mba mahako, ni akwa munanyi yaambila miata ni atu ngwo: “Mutu yono kanatela kufwa mumu kanalimika ni limbo lietu. Hinwachivwa ni matwi jenu.”

¹² Mba yingwaamba ngwami: “Mwene Zambi hangutuma kwambujola yuma yeswe yize hinwayivwa hakutwala ku zuwo lino lia Zambi ni limbo lino.

¹³ Chanutamba kwalumuna ndako jenu ni yuma yize nwakulinga, ni kwononokena Mwene Zambi, Zambi yenu. Nyi nwachilinga, mba neye malumuna mbunge yenyi hakutwala ku kwonona chize anambe kunukokela.

¹⁴ Alioze hakutwala kuli yami, nguli mu moko jenu! Lingenu cheswacho chanubemena.

¹⁵ Alioze nyingikenu ngwenu, nyi nwangushiha yenu ni akwa limbo lino munubwa ni uhiso wa kushiha mutu yoze keshi mulonga, mumu Mwene Zambi mwe unakangutuma kunukanyamisa.”

¹⁶ Mba miata ni atu yaambila akwa munanyi ni mahako ngwo: “Mutu yono hahanjika ni yetu mu jina lia Mwene Zambi, katelele kufwa.”

¹⁷ Hohene amwe makulwana yaakatuka, yaambila atu waze te haakunguluka ngwo:

¹⁸ “Muze Hezekia abwile mwanangana wa Yuda, mukwa munanyi Mika wa ku Moreshete yalweza atu ngwenyi: ‘Mwene Zambi Mukwa Ndundo Jeswe kanambe ngwenyi: Zione maamuchiba ngwe munda, Yerusaleme kumalumuka yikulu, ni mulundu haze atungile zuwo lia Zambi muubwa usaki.’

¹⁹ Mwanangana Hezekia ni Ayuda kaashihile ko mukwa munanyi Mika. Alioze Hezekia yevwila Mwene Zambi woma, yamuwahisa. Mba Mwene Zambi yalumuna mbunge yenyi hakutwala ku lamba lize ambile kuneha hali ayo. Musono tunambe kulikokela lamba linji.”

²⁰ (Kwabwile umwe mutu mukwo, Uria mwana wa Shemaya wa ku Kiriate Jearime, yahanjika mu jina lia Mwene Zambi ni kulimika ni limbo lino ni vungu lino ngwe chize alinga Jeremia.

²¹ Muze mwanangana Jehoakime, ni tujita twenyi, ni miata a chifuchi heevwa chize ahanjikile Uria, mwanangana yamba kumushiha. Alioze Uria yachivwa, yachina ni woma ku Egiptu.

²² Alioze mwanangana Jehoakime yatuma Elnatane mwana wa Akbore ni amwe malunga akwo ku Egiptu ni kumukwata.

²³ Yaamuhilwisa kuli mwanangana Jehoakime. Neye yamushiha, yamumbila mu mafuka.)

²⁴ Alioze Ahikame mwana wa Shafane yangufunga, kashika kangukunjikile ko mu moko ja atu angushihe.