Jeremia 25 - Mukanda Wa Zambi 1970

Mukwa kole wa ku norde

¹ Ha mwaka wa muchiwana wa kuyula cha Jehoakime mwanangana wa Yuda, yingwivwa maliji a Mwene Zambi hakutwala kuli Ayuda eswe. (Te mwaka utangu wa kuyula cha Nebukanezore mwanangana wa chifuchi cha Babilonia.)

² Yingwambila Ayuda ni akwa Yerusaleme eswe ngwami:

³ “Ha miaka makumi aali ni yitatu, chize ku mwaka kumi ni wa muchitatu wa kuyula cha mwanangana wa Yuda Josia, mwana wa Amone, ndoo ni musono, Mwene Zambi hanahanjika kuli yami, chaliwile ko kunulweza yize ambile. Alioze yenu kunwasele ko mbunge.

⁴ Yenu kunwabanjikile ko chibwe kukanyama, chibwe Mwene Zambi te kakunutumina tuvumbi twenyi akwa munanyi.

⁵ Yaanulongesa kwehuka ungulungulu wenu ni yibi yize te nwakulinga, mba hanga nuhase kutwama mu chifuchi chize Mwene Zambi anuhele yenu ni tushakulu twenu kubwa chihinga cha miaka yeswe.

⁶ Yanulongesa nawa ngwo, kanda nuwayila mazambi eka ni kwalingila, kanda nuvwisa Mwene Zambi ufwatulo ni kukombelela mahamba waze nwalingile. Nyi te nwononokena Mwene Zambi, kachi te kanumwesene ko lamba.

⁷ Mwene Zambi iye mwene kanambe ngwenyi: ‘Kunuchi kungubanjika.’ Alioze nwakumwiha ni mahamba jenu ni kulikokela lamba yenwene.

⁸ “Kashika, mumu kunwamubanjikile ko, Mwene Zambi Mukwa Ndundo Jeswe kanambe ngwenyi:

⁹ ‘Mungutambika atu eswe a ku norde ni kavumbi kami mwanangana Nebukanezore wa ku Babilonia. Mungwakoka ase jita ni Ayuda ni enyembo eswe ja mavungu. Mungwonona vungu lino ni e enyembo jo ni kwapwisa amokomoko ndoo ku miaka yeswe, Chuma cha mwongo ni cha kuyunga. Yami, Mwene Zambi, nachamba.

¹⁰ Munguchiza chiseke ni kuwahilila cho ni kulikwiza cha umbachiso mukachi ko. Keechi kubwa ni maji mu ndeya yo, chibwe kubwa ni yakulia.

¹¹ Chifuchi chino cheswe muchibwa yikulu; atu maalishimwoka ha kuchimona. Mavungu enyembo maakalingila mwanangana wa Babilonia miaka makumi shimbiali.

¹² Mba mungukamwesa Ababilonia lamba ni mwe mwanangana wo mumu ha milonga yo. Mungukenyeka chifuchi chize ni kuchihichika yikulu ndoo ku miaka yeswe.

¹³ Mungukabinjisa Ababilonia ni lamba heswe lize nahalile kumwesa nalio mavungu akwo muze nahanjikile kuli Jeremia, lamba heswe lize linasonewa mu mukanda uno.

¹⁴ Mungukafwetesa Ababilonia mumu ha chize haalinga mavungu anji. Mianangana anene anene maakaapwisa funge.’ ”

Zambi mabatwila mavungu

¹⁵ Mwene Zambi, Zambi ya Aisraele, yangwamba ngwenyi: “Uno uli musenge wa vinyu uze unazala ni ufwatulo wami. Utwale kuli mavungu eswe waze ngunakutumu, wanwise wo.

¹⁶ Muze haanwa, kumaatalinga ni kupiepieta mumu ha jita yize ngunatumu ha kulimika no.”

¹⁷ Mba yingutambula musenge ku kwoko lia Mwene Zambi, yinguuhana kuli mavungu eswe kuze Mwene Zambi angutumine, naanwishine wo.

¹⁸ Yerusaleme ni membo eswe ja Ayuda, hamwe ni e mianangana ni e miata jamo, yaaunwa hanga oonone ni kwalumuka puya. Chili Chuma cha mwongo ni cha kulishimwoka, hanga atu alumune jina lio kubwa shingo, ngwe chize akuchilinga ndoo ni musono.

^19-26 Atu waze haanwa ku musenge uze wano: mwanangana wa chifuchi cha Egiptu, ni miata, ni akwa lutwe, ni atu eswe, ni e yilambala; ni mianangana eswe a mu chifuchi cha Uze; ni mianangana eswe a mu membo ja Afilistia, mu Ashkelone, ni Gaza, ni Ekrone, ni waze asala mu Ashdode; ni atu eswe ja Edome, ni Moabe ni Amone; ni mianangana eswe a Tiru ni Sidone; ni mianangana eswe a mu yifuchi yize yinajingilika kalunga lwiji Mediterane; ni akwa membo ja Dedane, ni Tema, ni Buze; ni eswe waze akukamba kambu jo; ni mianangana eswe a chifuchi cha Arabia; ni mianangana eswe a mavungu a mu puya; ni mianangana eswe a Zimri, ni Elame, ni Media; ni mianangana eswe a ku norde, kusuku ni hakamwihi; umwe ni mukwo, ni mavungu eswe a hashi. Hakusula mwanangana wa Babilonia neye maunwa.

²⁷ Mba Mwene Zambi yangwamba ngwenyi: “Lweza atu ngwe: ‘Yami Mwene Zambi Mukwa Ndundo Jeswe, Zambi ya Israele, hinaamba aunwe ndoo ni muze haazengewa ni haasaza, ndoo ni muze haalimbwoka hashi kuhasa kukatuka ka, mumu ha jita yize ngunatumu ya kulimika no.’

²⁸ Nyi maalituna kutambula musenge ku kwoko lie ni kuunwa, mba muwalweza ngwe: ‘Mwene Zambi Mukwa Ndundo Jeswe hamba ngwenyi: Chatamba nuunwe.’

²⁹ Mungubutula milimo yami ya kwonona mu limbo lia yami mwene. Kuma kaananyongo ngwo, keechi kumona lamba, nyi? Ka, kumaalimona, mumu mungutuma jita hali akwa hashi eswe. Yami Mwene Zambi Mukwa Ndundo Jeswe nachamba.

³⁰ “Yena Jeremia, chatamba kwambujola maliji eswe waze hinahanjika. Chatamba kulweza atu wano ngwe: ‘Mwene Zambi mahanjika ni kukulunguza mwilu, mahanjika ni liji lia tachi mwilu. Kumakulunguza ni kulimika ni atu jenyi; kumakololoka ngwe mutu yoze unaliate mihuko ya vinyu. Akwa hashi eswe kumaamwivwa,

³¹ liji kumaalivwa ku mambango eswe a hashi. Mwene Zambi kali ni chikuma cha kusuma nacho mavungu. Kumabatwila atu eswe, yingulungulu kumaashiha. Mwene Zambi wachamba.’ ”

³² Mwene Zambi Mukwa Ndundo Jeswe kanambe ngwenyi: “Lamba kulineza hali mavungu eswe, ngwe kangonga munene yoze unakatuka ku mambango eswe a hashi.”

³³ Ha tangwa lize afu waze Mwene Zambi haashiha kumaakabomba hashi heswe chize ku songo limwe ndoo ku songo likwo. Niumwe kechi kaalila, chibwe kwafunda. Kumakalumbama hashi ngwe milumba ya bolela.

³⁴ Yenu miata, yenu tufunga twa atu jami, kololokenu, lilenu mbimbi! Lilenu nikulilangumuna mu fufuta. Tangwa lia kunushiha hiliakundama, maakanushiha ngwe makuji a panga.

³⁵ Kunuchi kahasa kuchina.

^36-37 Kumunukalila ni kuteta ni chinyengo mumu menyeka chifuchi chenu ni ufwatulo wenyi.

³⁸ Mwene Zambi hehuka atu jenyi ngwe chize tambwe akutuhuka mu chivwenge chenyi. Mwongo wa jita ni ufwatulo wa Mwene Zambi hiwalumuna chifuchi kubwa puya yamokomoko.