Jeremia 24 - Mukanda Wa Zambi 1970

Tupaya aali a makuyu

¹ Mwene Zambi yangulweza tupaya aali a makuyu akutumbika kulutwe lia zuwo lia Zambi. (Chino chabwile muze mwanangana Nebukanezore wa ku chifuchi cha Babilonia hachiza mwanangana Jehoakine ku Yerusaleme ni kumutwala funge ku Babilonia, hamwe ni miata ja Ayuda, ni akwa utotombo, ni fuli.)

² Mu kapaya mutangu yimubwa makuyu abema, te haahia kulu; mu kapaya mukwo yimubwa makuyu abi, te hi abema ko ni kulia.

³ Mba Mwene Zambi yanguhula ngwenyi: “Jeremia, yika unamono?” Yingukumbulula ngwami: “Makuyu amwe kaali abema kuhiana, akwo kaali abi kuhiana, hi abema ko ni kulia.”

⁴ Mba Mwene Zambi ngwenyi:

⁵ “Yami, Mwene Zambi, Zambi ya Israele, ngunamono ngwami, atu waze atwalile ku Babilonia kaali ngwe makuyu abema, mungwalinga yibema.

⁶ Mungwafunga ni kwahilwisa mu chifuchi chino. Mungwatungisa ngwe zuwo, chichi kwalimbwisa nawa. Mungwatumba ngwe mbuto, chichi kwachiza nawa.

⁷ Mungukapwisa ni zango lia kungunyingika yami Mwene Zambi. No maabwa atu jami, ni yami mungubwa Zambi yo, mumu maatewulukila kuli yami ni mbunge jo jeswe.

⁸ “Alioze hakutwala kuli Zedekia, mwanangana wa Yuda, ni miata waze amujingilika, ni akwa Yerusaleme waze haasala mu chifuchi chino hanji waze haaya ku Egiptu, yami, Mwene Zambi, mungwalinga ngwe makuyu abi waze kaahashile kwaha.

⁹ Mungwakokela lamba linji, mba mavungu eswe a hano hashi meevwa mwongo. Kumaakekuna, ni kwachoka ni kwalelesa, ni kwalumuna jina kubwa lia Shingo kweswako mungwamwangina.

¹⁰ Mungwakokela jita, ni zala, ni misongo, ndoo niumwe kechi kusala mu chifuchi chize naahele ayo ni tushakulu two.”