Jeremia 23 - Mukanda Wa Zambi 1970

Amwe Aisraele kumaakahiluka ku chifuchi cho

¹ Ubatwilo wa Mwene Zambi muubwa ukalu hali akwa lutwe waze akushiha atu jenyi ni kwamwanga!

² Mwene Zambi, Zambi ya Israele, kanambila miata waze chatamba kufunga atu jenyi, ngwenyi: “Kunwafungile ko atu jami. Hinunaamwange ni kwaahuma. Haliabwila mungunumwesa lamba mumu ha ungulungulu wenu.

³ Atu jami waze asala ku yifuchi yize hingunamwangina mungwakungulula, mungwahilwisa ku chifuchi cho. Maakasema ana anji, kumaakaliokesa.

⁴ Mungwatongwela akwa kwayula, maakaafunga kanawa. Atu jami keechi kevwa nawa woma hanji mwongo, chichi kaamwesa nawa lamba. Yami, Mwene Zambi, nachamba.”

⁵ Mwene Zambi kanambe ngwenyi: “Tangwa kulineza lize mungukatongola mwanangana umwe wa ululi, wa ku vungu lia David. Mwanangana yoze makayula ni mana, makalinga ni ululi ni yize yinalite mu chifuchi.

⁶ Muze habwa mwanangana, Ayuda ni Aisraele maakabwa mu uhwimino. Maakamuvuluka ngwo: ‘Mwene Zambi Chilamwina chetu.’ ”

⁷ Mwene Zambi kanambe ngwenyi: “Tangwa kulineza, lize Aisraele keechi kulishinga nawa ni yami Zambi ya mwono yoze waatuhwishile mu chifuchi cha Egiptu.

⁸ Alioze maalishinga ni yami Zambi ya mwono yoze watuhwishile Aisraele mu chifuchi cha ku norde ni ku yifuchi yeswe kuze naamwanganyine. Mba maatwama mu chifuchi cho ene.”

Maliji a Jeremia hakutwala kuli akwa munanyi

⁹ Ngunevu chinyengo mu mbunge, ngunachikima. Nguli ngwe mutu yoze unazengewa, yoze hanwa vinyu yinji, mumu hali Mwene Zambi.

¹⁰ Che chifuchi hichazala ni atu waze haalituna Mwene Zambi; Kaali yitanganyanyi, mu chiyulo cho kaakulinga lume yibi. Mumu ha Shingo lia Mwene Zambi, chifuchi chinabinji, ulishilo hiwoma chau;

¹¹ Mwene Zambi kanambe ngwenyi: “Akwa munanyi ni mahako no kaali yitanganyanyi; hingunawane maalinga yibi chibwe mu zuwo lia Zambi.

¹² Majila jo waze akukaula kaali a milima, kanda asenena, mungwatalingisa alimbuke. Munwakokela lamba; tangwa lia lamba lio hiliakundama. Yami, Mwene Zambi, nachamba.

¹³ Hingunamono milonga ya akwa munanyi a mu limbo lia Samaria: haanahanjika munanyi mu jina lia hamba Bale, haanapiangula atu jami.

¹⁴ Alioze hingunamono akwa munanyi a mu Yerusaleme kuvulumuna kuhiana: kaakulinga utanji ni kuhanjika mahuza; kaakushinjika atu alinge yibi, kashika niumwe keshi kwecha kulinga yibi. Ku meso jami ayo eswe kaali abi ngwe akwa Sodome ni Gomora.

¹⁵ “Kashika yami, Mwene Zambi Mukwa Ndundo Jeswe ngunambe hakutwala kuli akwa munanyi a mu Yerusaleme ngwami; mungwalisa mitondo yisasu ni kwanwisa ulembe, mumu haabihisa chifuchi cheswe ni utanganyanyi wo.”

¹⁶ Mwene Zambi Mukwa Ndundo Jeswe kanambila akwa Yerusaleme ngwenyi: “Kanda nubanjika yize anahanjika akwa munanyi; kaananulongesa maliji amokomoko. Kaakunwambulwila yize akunyonga ayo ene, hi yize ko ngunahanjika yami.

¹⁷ Kuli atu waze akulituna longeso liami, kaakwamba ngwo: ‘Munukawaha!’ Kaakulweza akwa pami ngwo: ‘Lamba kulichi kanuwana.’ ”

¹⁸ Yingwamba ngwami: “Niumwe wa kuli akwa munanyi wano Unanyingika chijimbikilo cha Mwene Zambi. Niumwe hevwa kama maliji jenyi, hanji hanyingika, chibwe kwabanjika hanji kwafunga.

¹⁹ Ufwatulo wenyi uli ngwe kangonga, yoze unatukunga ha mitwe ya yingulungulu,

²⁰ kuuchi kuhwa ndoo ni muze halinga yuma yeswe yize anazange kulinga. Mba kulutwe atu jenyi maakanyingika yuma yino kanawa.”

²¹ Mwene Zambi yamba ngwenyi: “Akwa munanyi wano chaatumine ko kwami, hindu haanayi. Chahele ko maliji, hindu kaakuhanjika munanyi mu jina liami.

²² Nyi haananyingika kama chijimbikilo chami, kachi haambujola kama maliji jami kuli atu jami hanga eche ndako jo jibi ni ungulungulu uze akulinga.

²³ “Nguli Zambi yoze watwama kweswe, hi homa hamuwika wika ko.

²⁴ Niumwe mahasa kuswama kuze Chishi kumona. Kunwanyingikine ngwenu, nguli kweswe, mwilu ni hashi, nyi?

²⁵ Ngunanyingika yeswe yize akwamba akwa munanyi waze akuhanjika mahuza mu jina liami ni akwambujola ngwo, hingunalweze maliji jami mu yilota yo.

²⁶ Ndoo shimbu lika akwa munanyi waze meecha kama kupiangula atu jami ni maliji a mahuza waze haanambe?

²⁷ Kaakunyonga ngwo, yilota yize akwaula muyihasa kuvulamisa atu jami jina liami, ngwe chize tushakulu two anguvulamine ni kutewulukila kuli hamba Bale.

²⁸ Mukwa munanyi yoze halota chilota ambe ngwenyi, chili lume chilota cha tulo, alioze mukwa munanyi yoze hevwa maliji jami aambujole lume ni mbunge yimuwika. Kuma mwambu wamokomoko unalifu ni tiriku, nyi?

²⁹ Maliji jami kaali ngwe kahia, hanji ngwe mweto uze wakubalwola mawe.

³⁰ Kunakulimika ni akwa munanyi waze akutambula maliji umwe kuli mukwo ni kwalongesa ngwe maliji jami.

³¹ Nakulimika nawa ni akwa munanyi waze akuhanjika maliji ja ayo ene nikwamba ngwo: ‘Kaali maliji a kuli Mwene Zambi.’

³² Banjikenu yize yami, Mwene Zambi, ngunambe! Nakulimika ni akwa munanyi waze akwaula yilota yo ya mahuza. Kaakwaula yilota yize ni kupiangula atu jami ni mahuza jo ni kulifuza cho. Alioze yami chaatumine ko, ni chaalwezele ko Chuma nichimwe. Keeshi kukwasa atu nichimwe. Yami, Mwene Zambi, nachamba.”

Chiteli cha Mwene Zambi

³³ Mwene Zambi yangwamba ngwenyi: “Jeremia, muze umwe wa kuli atu, chibwe mukwa munanyi, hanji hako, makuhula ngwenyi: ‘Mwene Zambi kuchi anambe?’ mulweze ngwe: ‘Yena uli chiteli kuli Mwene Zambi, kumakumwesa lamba.’

³⁴ Nyi umwe wa kuli atu jami, chibwe mukwa munanyi hanji hako, mamba ngwenyi: ‘Chiteli cha Mwene Zambi,’ mungumumwesa lamba ni akwa jiko lienyi.

³⁵ Alioze, mutu mweswe ahule masepa jenyi ni usoko wenyi ngwenyi: ‘Mwene Zambi kumbululo lika ahana? Kuchi anambe?’

³⁶ Kashika kuchatambile nawa kuhanjika maliji wano ngwo: ‘Chiteli cha Mwene Zambi.’ Mumu nyi umwe wachilinga, mungupwisa maliji jami chiteli muli iye. Atu haanabinjisa maliji ja Mwene Zambi yo, Zambi ya mwono, Mwene Zambi Mukwa Ndundo Jeswe.

³⁷ Jeremia, hula akwa munanyi ngwe: ‘Mwene Zambi kuchi anukumbulula? Kuchi amba?’

³⁸ Nyi ngwe akolema Shimbi jami nikwamba ngwo: ‘Chiteli cha Mwene Zambi,’ hialweze ngwe:

³⁹ Yami Mwene Zambi mungwaanda ni kwambila kusuku ni yami, ayo ni lie limbo lize naahele ni e tushakulu two.

⁴⁰ Mungwakokela sonyi ja miaka yeswe ni lamba lize keechi kalivulama nichimwe.”