Jeremia 22 - Mukanda Wa Zambi 1970

Maliji a Jeremia kuli akwa zuwo lia wanangana wa Yuda

^1-2 Mwene Zambi yangwamba hanga nguye ku zuwo lia mwanangana wa Ayuda, wa ku vungu lia David, nguhanjike ni mwanangana, ni miata, ni akwa Yerusaleme, hanga abanjike yize Mwene Zambi hamba. Ngwenyi:

³ “Yami, Mwene Zambi, ngunanwambe ngwami, lingenu ni ululi ni chize chinalite. Nyi atu anambe kutambula yuma ya mbala ni uhenge, mukwasenu. Kanda nulinga ni uhenge hanji kubinjisa tundaka, ni ana a shiwa, ni mapwo waze haanafwisa malunga; kanda nushiha atu waze keeshi mulonga homa hano ha chijila.

⁴ Nyi nwalinga yize nanwamba, mba akwa vungu lia David maanyongonona ni kuhinga wanangana. Mba ayo, hamwe ni miata jo, ni atu jo, maanyongonona ni kubalieka mu yikolo ya zuwo lino lia wanangana ni matemba ni tuvwalu.

⁵ Alioze, nyi kunwononokene ku Shimbi jami, mba mungulishinga ngwami, zuwo lino lia wanangana akwa kole maalienyeka. Yami Mwene Zambi nachamba.

⁶ “Kuli yami, zuwo lia wanangana lia Yuda lili libema ngwe chifuchi cha Gileade, ngwe milundu ya Libano; alioze mungulipwisa liamokomoko kuze mutu niumwe kahashile kutwama.

⁷ Ngunatumu atu ni kulionona. Ayo eswe maambata jimbu jo, maanunguna mitondo sedru yeswe yibema, ni kuyilumba ha kahia.

⁸ “Mba mukubalika tundaka anji nikulihula ene ngwo, mumu yika Mwene Zambi halinga Chuma chino chinene ha limbo lino linene?

⁹ Mba ayo maakumbulula ngwo, mumu haanehuka Usendo wa Zambi yo, haanawayila mazambi eka ni kwalingila.”

Maliji a Jeremia hakutwala kuli mwanangana Joahaze

¹⁰ Yenu Ayuda kanda nulila mwanangana Josia; kanda nunenganyana ha kufwa chenyi. Alioze yekenu mbimbi hali mwanenyi Joahaze; mumu haanamutwala kweka, kechi kahiluka nawa nichimwe, kechi kamona nawa chifuchi muze asemukinyine.

¹¹ Mwene Zambi kanambe hakutwala kuli Joahaze mwana wa Josia, yoze wahingile tato mwanangana wa Yuda ngwenyi; “Haamuchiza kuno, haamutwala kweka, kechi kahiluka nawa nichimwe.

¹² Makafwila mu chifuchi chize haanamutwala, chifuchi chino kechi kachimona nawa.”

Maliji a Jeremia hakutwala kuli mwanangana Jehoakime

¹³ Lamba kuli mutu yoze hatunga zuwo lienyi ni uhenge ni kanalitohwesa ni mbongo ja wiji; yoze wakuhondanganyisa enyembo jenyi milimo yamokomoko, kwafweta ka.

¹⁴ Lamba kuli mutu yoze wakwamba ngwenyi: “Mungutunga zuwo linene lia yami mwene ni yibatulo yinene ya kwilu.” Mba malisa tupenda, ni kuhola ni mabaya a sedru, ni kulikwita ulombo uchila.

¹⁵ Kuma muchikupwisa mwanangana mubema nyi watunga zuwo lia mitondo ya sedru, libema kuhiana mazuwo ja atu akwo, nyi? Tatenu matangwa eswe te kakuwahilila kanawa. Matangwa eswe te kakubatwila atu ni ululi, yayuka ni yuma yeswe yize alingile.

¹⁶ Yabatwila yiswale ni ululi, kuli iye yuma yeswe yiiwaha. Ndako yino yinalumbununa ngwo, te kanyingika Mwene Zambi.

¹⁷ Alioze yena Wakulinyonga lume yena mwene; wakushiha yoze keshi mulonga ni kubinjisa atu je ni uswii. Mwene Zambi wachamba.

¹⁸ Kashika Mwene Zambi unahanjika hakutwala kuli mwanangana Jehoakime, mwana wa Josia ngwenyi: “Niumwe kechi kumulila muze hafwa nikwamba ngwenyi: ‘Mama lambe, mama sepa liamie, mama lambe!’ Niumwe kechi kulinyenga ngwenyi: ‘Mwene wami! Mama, mwanangana wamie!’

¹⁹ Muze hafwa maamufunda ngwe chimbulu, maamukokela haze ni kumumbila ku yikolo ya Yerusaleme.”

Maliji a Jeremia hakutwala ku ubatwilo wa Yerusaleme

²⁰ Akwa Yerusaleme, yeenu ku Libano nukololoke, yeenu ku chifuchi cha Bashane nulile mbimbi; kololokenu ku milundu ya Moabe, mumu masepa jenu eswe haakumba kuli akwa kole jo.

²¹ Mwene Zambi yahanjika ni yenu muze nwayukile, alioze kunwabanjikile ko. Chenacho te nwakulinga matangwa eswe; kunushi kwononoka kuli Mwene Zambi nichimwe.

²² Akwa lutwe jenu kumaatwala ngwe chize fuji yakuhehula yiswaswa, masepa jenu kumaatwala funge mu jita. Mba munwivwa sonyi mumu ha ungulungulu weswe uze hinwalinga.

²³ Yenu nwatwama mu uhwimino mukachi ka mitondo sedru yize nwatambwile ku chifuchi cha Libano; lamba lienu muze munwivwa yikola, ngwe yikola ya pwo yoze unambe kusema.

Zambi mabatwila mwanangana Jehoakine

²⁴ Mwene Zambi yambila mwanangana Jehoakine, mwana wa mwanangana Jehoakime wa Yuda ngwenyi: “Yami Zambi ya mwono ngwami, yena Jehoakine, chibwe uli ngwe kazeya ku munwe wami, kumungukutomona ko,

²⁵ ni kukuhana kuli waze wakuvwila woma, waze akuzanga kukushiha. Mungukuhana kuli mwanangana Nebukanezore wa ku chifuchi cha Babilonia ni kuli tujita twenyi.

²⁶ Yena ni mwe noko yoze wakusemene mungunutwala ni tachi mu undungo. Munuya ku chimwe chifuchi kuze yena ni noko kunwasemukinyine ko; kwenako munukafwila yenu eswe aali.

²⁷ Chifuchi munukachivwila usona, alioze kunuchi kahiluka ko.”

²⁸ Yingwamba ngwami: “Kuma mwanangana Jehoakine hanafu ngwe mulondo uze haanambila, niumwe kechi kuuzanga nawa, nyi? Kuma kashika iye ni ana jenyi haanaatwala mu undungo ku chifuchi chize kaanyingikine ko, nyi?”

²⁹ Aa chifuchi, mama yami chifuchi, lwangu mama yami chifuchi! Banjika ku maliji a Mwene Zambi,

³⁰ Kanambe ngwenyi: “Mutu yono matokesa ana jenyi, kechi kuyuka nichimwe. Kechi kabwa ni vungu waze maakayula mu Yuda ngwe David. Yami, Mwene Zambi, nachamba.”