Jeremia 21 - Mukanda Wa Zambi 1970

Akwa kole maakumba Yerusaleme

¹ Mwanangana Zedekia wa Yuda yangutumina Pashure mwana wa Malkia, ni hako Zefania mwana wa Maseya ni maliji wano ngwenyi:

² “Twalemba tuhakwile kama kuli Mwene Zambi, mumu mwanangana Nebukanezore wa ku Babilonia ni tujita twenyi haaseleka lie limbo. Hanji Mwene Zambi malinga yimwe yilayi yenyi mumu hali yetu ni kutuhangila kama Nebukanezore ni tachi.”

³ Hohene Mwene Zambi yahanjika ni yami, mba nambile atu waze ejile kuli yami,

⁴ alweze mwanangana Zedekia maliji ja Mwene Zambi, Zambi ya Israele, ngwenyi: “Mungukumba tujita twe waze akwasa jita ni mwanangana wa Babilonia ni tujita twenyi. Mungukungulwila yitwa ya tujita twe mukachi ka limbo.

⁵ Yami mwene mungwasa nenu jita ni ndundo jami jeswe, ni utenu ni ufwatulo wami.

⁶ Mungushiha eswe waze atwama mu limbo lino, atu ni tushitu, ni musongo ukalu.

⁷ Alioze yena ni miata je, ni atu waze maasala ni mwono mu jita, ni ku zala, ni ku musongo, mungunutayiza eswe munuya funge kuli mwanangana Nebukanezore ni akwa kole jenu, waze anazange kunushiha. Nebukanezore manushiha. Kechi kuchiza ko niumwe hanji kumuvwila vumbi hanji keke. Yami, Mwene Zambi, nachamba.”

⁸ Mba Mwene Zambi, yangulweza ngulweze atu ngwenyi: “Banjikenu! Yami, Mwene Zambi, hinanwaha yuma yaali, hanga nutongole, mwono hanji kufwa.

⁹ Mweswawo masala mu limbo kumafwa mu jita, hanji ni zala, chibwe ni musongo. Alioze mweswawo machinyina kuli Ababilonia, waze anaseleka lie limbo, kechi kufwa; malilamwina.

¹⁰ Hingunabatula ngwami, chichi kulamwina limbo lino, alioze shina kulienyeka. Mungulikunjika mu moko ja mwanangana wa Babilonia, mwe maliocha. Yami Mwene Zambi nachamba.”

Ubatwilo wa akwa zuwo lia wanangana wa Yuda

^11-12 Mwene Zambi yangwamba ngulweze akwa zuwo lia wanangana wa Yuda, vungu lia David, maliji wano ngwenyi: “Banjikenu chize yami Mwene Zambi ngunambe. Batulenu ni ululi matangwa eswe. Nyi atu anambe kutambula yuma ya mbala ni uhenge, mukwasenu. Nyi kunusolo, mumu ha ungulungulu wenu, mungwivwa ufwatulo ngwe kahia kaze kunwahashile kujima.

¹³ Yenu, akwa Yerusaleme, nwatwama helu lia yikulo, ngwe liwe lize liatwama mu chana. Alioze mungulimika ni yenu, mumu nwakwamba ngwenu, niumwe kahashile kutukumba hanji kubuzwola yipanga yetu yakukoleka.

¹⁴ Alioze mungunumwesa lamba ha yize hinwalinga. Mungwocha zuwo lienu lia wanangana; ke kahia mukakocha yuma yeswe yize yili hakamwihi. Yami Mwene Zambi nachamba.”