Jeremia 20 - Mukanda Wa Zambi 1970

Jeremia yalihangujola ni hako Pashure

¹ Muze hako Pashure, mwana wa Imere, mwata wa zuwo lia Zambi, hevwa kwambujola chami,

² yahana Shimbi ya kungulamba ni kungusa mu kuli hehi ni chikolo cha Benjamine ku tunda mu zuwo lia Zambi.

³ Muze hikwacha, ni mwe Pashure yanguchiza mu kuli, yingumwamba ngwami: “Mwene Zambi kakuvulukile ko Pashure, alioze ‘Mwongo Kweswe.’

⁴ Mwene Zambi hamba ngwenyi: ‘Mungukupwisa mukwa kuvwisa mwongo yena ni masepa je. Muumona chize akwa kole jo maashiha eswe ni mikwale. Ayuda eswe mungwakunjika mu chiyulo cha mwanangana wa Babilonia; neye maashiha, amwe akwo maapwisa funge mu chifuchi chenyi.

⁵ Mungutayiza akwa kole jo kububa ubite weswe wa mu limbo lino ni kwanda yikumba yamo yeswe, chibwe ubite wa mianangana ja Yuda, ni kutwala yuma yeswe ku Babilonia.

⁶ Ni yena Pashure, ni akwa jiko lie, eswe kumaanutwala nawa funge ku Babilonia. Kwenako munukafwila, kwenako maakanufunda hamwe ni masepa jenu eswe waze ambujolele maliji anji a mahuza.’ ”

Jeremia yanenganyana ku meso ja Mwene Zambi

⁷ Mwene Zambi hiwangwonga, ni yami hinongoloka. Yena hiwanguhiana tachi, hiwangukumba. Atu eswe kaanangusehe; kaanangukekuna tangwa lieswe.

⁸ Muze nakuhanjika, changutamba kukololoka, nikuhanjika chikolo ngwami: “Upupilo! Kwonona!” Mwene Zambi, hinasauka ni kunguchoka tangwa lieswe mumu nakwambujola maliji je.

⁹ Muze nakwamba ngwami: “Munguvulama Mwene Zambi, chichi kwambujola nawa mu jina lienyi,” maliji je kaakubwa ngwe kahia kaze kanangwocho mu mbunge. Nakweseka kulihumikiza, alioze Chishi kuhasa.

¹⁰ Nakwivwa atu eswe kulinyenyeta ngwo: “Mwongo kuma kweswe! Tumusumenu ku meso ja akwa kuyula!” Chibwe masepa jami kaakuzanga kachi ngulimbuke kama. Kaakwamba ngwo: “Hanji tunahase kumwonga, mba hanga tumukwate, tumufwetese.”

¹¹ Yena Mwene Zambi uli hehi ni yami, mukwa tachi ni ndundo; eswe waze akunguhungumiona kumaalimbwoka. Maakevwa sonyi ndoo ku miaka yeswe, mumu keechi kuhasa kukumba. Sonyi jo keechi kajivulama.

¹² Alioze, Mwene Zambi Mukwa Ndundo Jeswe, yena wakweseka atu ni ululi; unanyingika yize yili mu mbunge jo ni mu manyonga jo. Kashika ngweche ngumone kama chize muungukala kuli akwa kole jami, mumu hinakunjika mulonga wami mu moko je.

¹³ Mwimbilenu Mwene Zambi! Muchichimiekenu! Kakulamwina waze akuhungumiona kuli yingulungulu.

¹⁴ Shinga tangwa lize nasemukine! Vulama tangwa lize mama angusemene!

¹⁵ Shinga yoze wevwishile tata kuwaha muze ayile ni kumulweza ngwenyi: “Pwo lie hasema mwana wa lunga!”

¹⁶ Lunga yoze abwe kama ngwe membo waze Mwene Zambi hoonona, keevwilile ko keke. Lunga yoze evwe kama mutambi wa lamba ha chichamene, ni milolo ya jita tangwa ha muchima,

¹⁷ mumu kangushihile ko muze kanda ngusemuka. Kachi jimo lia mama liabwile fuka liami.

¹⁸ Mumu yika nasemukinyine kwami? Shina ngumone lamba ni yinyengo, nguvwise matangwa a mwono wami sonyi, nyi?